ຕາມຂ່າວຈາກ ເຊອຸນ,ເມື່ອບໍ່ດົນມານີ້, ອັດຕາ ເງິນເຟີ້ຂອງ ສ.ເກົາຫລີ ອາດເພີ່ມຂຶ້ນ 6%ໃນໄລຍະເດືອນ ມິຖຸນາ ເຖິງເດືອນສິງຫານີ້ ຍ້ອນໄດ້ຮັບ ຜົນກະທົບ ຈາກລາຄາ ນ້ຳມັນ,ອາຫານ ແລະ ສິນຄ້າຕ່າງໆ ແພງຂຶ້ນ ທົ່ວໂລກ ພາຍຫລັງ ທ່ານ Chu Gyeong-ho, ລັດຖະມົນຕີ ກະຊວງ ການເງິນ ສ.ເກົາຫລີ ເປີດເຜີຍ ຜ່ານທາງ ໂທລະພາບວ່າ: ລາຄາ ນ້ໍາມັນ ທົ່ວໂລກ ທີ່ຫລຸດລົງ ໃນໄລຍະນີ້ ອາດຈະຊ່ວຍໃຫ້ ອັດຕາ ເງິນເຟີ້ ຂອງເກົາຫລີ ຢຸດການ ເພີ່ມຂຶ້ນ ໄດ້ຊົ່ວຄາວ ເພາະປັດໄຈ ພາຍນອກ ເປັນປັດໄຈຫລັກ ທີ່ເຮັດໃຫ້ ດັດຊະນີ ລາຄາ ຜູ້ບໍລິໂພກ ເພີ່ມຂຶ້ນ, ເຖິງຢ່າງໃດກໍຕາມ, ຄາດວ່າ ອັດຕາເງິນເຟີ້ ຈະສືບຕໍ່ ເພີ່ມຂຶ້ນອີກ ໄລຍະໜຶ່ງ. ລັດຖະບານ ໄດ້ເອົາໃຈໃສ່ ເປັນຢ່າງດີ ຕໍ່ການຮັກສາ ສະຖຽນ ລະພາບ ຂອງລາຄາ ຜູ້ບໍລິໂພກ ທີ່ຜັນຜວນ ມີສະຖຽນ ລະພາບ ແລະ ຈະໃຊ້ມາດ ຕະການ ທັງຫມົດ ທີ່ເປັນໄປໄດ້ ເພື່ອຮັກສາ ໄພເງິນເຟີ້ ພາຍໃຕ້ ການຄວບຄຸມໄດ້. ອັດຕາເງິນເຟີ້ ໃນເດືອນມິຖຸນາ ຫາເດືອນສິງຫາ ສາມາດ ສູງເຖິງ 6% ເພີ່ມຂຶ້ນຈາກ 5,4% ຕໍ່ປີ ໃນເດືອນພຶດສະພາ ຊຶ່ງເປັນອັດຕາ ທີ່ສູງທີ່ສຸດ ໃນຮອບເກືອບ 14 ປີ ແລະ ເພີ່ມຂຶ້ນຈາກ 4,8%ໃນເດືອນເມສາ. ກ່ອນໜ້ານີ້ ກະຊວງການເງິນ ໄດ້ດັດແປງ ຄາດຄະເນ ໄພເງິນເຟີ້ ໃນປີ 2022 ເປັນ 4,7% ເຊິ່ງສູງສຸດ ໃນຮອບ 14 ປີ, ຈາກການ ຄາດຄະເນ ໃນເດືອນທັນວາ ປີນີ້ ຈະຢູ່ລະດັບ 2,2%./. (ພາກຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
