ພິທີເຊັນສັນຍາຮ່ວມທຶນລະຫວ່າງອົງການປົກຄອງນະຄອນຫຼວງວຽງຈັນ (ນວ) ຕາງໜ້າໂດຍພະແນກການເງິນ ນວ ແລະ ບໍລິສັດ ທາດຫຼວງພັດທະນາ ຈໍາກັດ ວ່າດ້ວຍການດໍາເນີນໂຄງການ ແລະ ດໍາເນີນທຸລະກິດໂຮງແຮມລ້ານຊ້າງອາວານີ ຈັດຂຶ້ນວັນທີ 28 ທັນວາ 2022 ທີ່ໂຮງແຮມຄຣາວພລາຊາ ໂດຍການລົງນາມຂອງທ່ານ ສິລິລາດທົງສິນ ທອງເພັງ ຫົວໜ້າພະແນກການເງິນ ນວ ແລະ ທ່ານ ຟ້າມ ງັອກ ໂກຍ ຜູ້ອໍານວຍການບໍລິສັດ ທາດຫຼວງພັດທະນາ ຈໍາກັດ ລົງນາມເປັນພະຍານຂອງທ່ານນາງ ບົວວອນ ສຸກລາແສງ ຫົວໜ້າພະແນກແຜນການ ແລະ ການລົງທຶນ ນວ ແລະ ທ່ານ ດວງຕາ ສຸລິວົງ ເຈົ້າເມືອງຈັນທະບູລີ ມີທ່ານ ອາດສະພັງທອງ ສີພັນດອນ ເຈົ້າຄອງ ນວ ພ້ອມດ້ວຍພາກສ່ວນກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.
ການລົງນາມຄັ້ງນີ້ ໂດຍປະຕິບັດຕາມຂໍ້ຕົກລົງຂອງເຈົ້າຄອງ ນວ ສະບັບເລກທີ 1057/ຈນວ ວ່າດ້ວຍການອະນຸມັດໃຫ້ເຊັນສັນຍາຮ່ວມທຶນພັດທະນາກິດຈະການໂຮງແຮມລ້ານຊ້າງ ຕັ້ງຢູ່ບ້ານ ຊຽງຍືນ ເມືອງ ຈັນທະບູລີ ນວ ເຊິ່ງທ່ານ ຟ້າມ ດຶກ ຮຶງ ຮອງອໍານວຍການບໍລິສັດ ທາດຫຼວງພັດທະນາ ຈໍາກັດ ລາຍງານໃຫ້ຮູ້ວ່າ: ອາຄານໂຮງແຮມລ້ານຊ້າງ ແຕ່ກ່ອນເປັນສັນຍະລັກຂອງ ນວ ໂດຍສະເພາະ ແລະ ເປັນສັນຍະລັກຂອງປະເທດລາວໂດຍລວມ ມາຮອດທ້າຍປີ 2019 ອາຄານໂຮງແຮມລ້ານຊ້າງຫຼັງເກົ່າມີຄວາມຊຸດໂຊມ ແລະ ການດໍາເນີນງານບໍ່ມີປະສິດທິຜົນ ທັງສອງຝ່າຍໄດ້ຕົກລົງເຫັນດີເປັນເອກະພາບກັນວ່າຈະທຸບມ້າງອອກທັງໝົດ ແລ້ວກໍ່ສ້າງໃໝ່ ແລະ ຕົກລົງມອບໝາຍໃຫ້ບໍລິສັດ ລົງທຶນ ແລະ ພັດທະນາລ້ານຊ້າງ ຈຳກັດ ເປັນເຈົ້າຂອງໂຄງການປະຕິບັດໂຄງການລົງທຶນກໍ່ສ້າງ ແລະ ດໍາເນີນທຸລະກິດໂຮງແຮມລ້ານຊ້າງຫຼັງໃໝ່ ໃຫ້ກາຍເປັນໂຮງແຮມທີ່ທັນສະໄໝ ໄດ້ມາດຕະຖານສາກົນລະດັບ 5 ດາວ ເຊິ່ງຄາດຄະເນມູນຄ່າການລົງທຶນທັງໝົດ 40 ລ້ານໂດລາສະຫາລັດ ຊື່ຂອງໂຮງແຮມລ້ານຊ້າງຫຼັງໃໝ່ຍັງຮັກສາໄວ້ຄໍາວ່າ “ໂຮງແຮມລ້ານຊ້າງ”.
ເພື່ອເຮັດໃຫ້ໂຮງແຮມໃໝ່ດໍາເນີນທຸລະກິດມີປະສິດທິຜົນ ທັງສອງຝ່າຍກໍຕົກລົງເຫັນດີເປັນເອກະພາບກັນວ່າຈະຈ້າງບໍລິສັດ Minor Hotel Group ເປັນຜູ້ບໍລິຫານການດໍາເນີນທຸລະກິດຂອງໂຮງແຮມດ້ວຍເຄື່ອງໝາຍການຄ້າ AVANI ດັ່ງນັ້ນຊື່ຂອງໂຮງແຮມໃໝ່ຈະປ່ຽນເປັນໂຮງແຮມລ້ານຊ້າງ AVANI ໂດຍໂຄງຮ່າງລວມຈະມີຮູບຊົງຂອງໂຕຊ້າງສະແດງຄວາມເຂັ້ມແຂງ ພັດທະນາ ແລະ ກໍໃກ້ຊິດກັບຊື່ເອີ້ນປະຫວັດສາດຂອງປະເທດລ້ານຊ້າງ ຄາດຄະເນໂຮງແຮມໃໝ່ຈະປະກອບມີ 250-300 ຫ້ອງນອນ ແລະ ບັນດາກິດຈະກໍາສໍາຮອງໄດ້ມາດຕະຖານສາກົນລະດັບ 5 ດາວ ອີງຕາມແຜນການຄາດຄະເນໄລຍະການກໍ່ສ້າງຈະໃຊ້ເວລາ 40 ເດືອນ ໂດຍຈະລົງມືດໍາເນີນການກໍ່ສ້າງນັບແຕ່ມື້ລົງລາຍເຊັນເປັນຕົ້ນໄປ ແລະ ພະຍາຍາມສໍາເລັດໂຄງການກ່ອນແຜນການວາງໄວ້ ເຊິ່ງຈະໃຊ້ເວລາປະມານ 24-25 ເດືອນ.
