ເນື່ອງໃນໂອກາດສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ປີ 2022 ຄື: ວັນເຊັນສົນທິສັນຍາມິດຕະພາບການຮ່ວມມືຮອບດ້ານ ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ, ໃນວັນທີ 09 ທັນວາ 2022 ນີ້, ສະຫາຍ ພັນເອກ ຈັນແດງ ຂຸນຍຸລາດ ກຳມະການຄະນະປະຈຳພັກກອງພົນ ຫົວໜ້າຫ້ອງການເມືອງກອງພົນທີ 4 ພ້ອມດ້ວຍ ພະນັກງານຫຼັກແຫຼ່ງທົ່ວກອງພົນ ເຂົ້າຮ່ວມຊົມຫໍມູນເຊື້ອໄຊຊະນະຮ່ວມສຳພັນສູ້ຮົບ ລາວ-ຫວຽດນາມ ບໍລິເວນທາງເລກ9 ບ້ານດົງ, ເມືອງເຊໂປນ, ແຂວງສະຫວັນນະເຂດ.
ສະຫາຍ ພັນເອກຈັນແດງ ຂຸນຍຸລາດ ກຳມະການຄະນະປະຈຳພັກກອງພົນ ຫົວໜ້າຫ້ອງການເມືອງ ກອງພົນທີ 4 ໄດ້ກ່າວສະແດງຄວາມຮູ້ສຶກຕໍ່ປີ ສາມັກຄີມິດຕະພາບລາວ-ຫວຽດນາມ ປີ 2022 ຄື: ວັນເຊັນສົນທິສັນຍາມິດຕະພາບຮ່ວມມືຮອບດ້ານ ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ ເເມ່ນເຫດການທາງການເມືອງ, ປະຫວັດສາດທີ່ສຸດມີຄວາມໝາຍຄວາມສຳຄັນຢ່າງເລິກເຊິ່ງ, ສ້າງໝາກຜົນແຫ່ງການເພີ່ມພູນຄູນສ້າງສາຍສຳພັນການພົວພັນມິດຕະພາບອັນຍິ່ງໃຫຍ່, ສາຍພົວພັນຄວາມສາມັກຄີ ແລະ ການຮ່ວມມືຮອບດ້ານແບບພິເສດທີ່ຫາຍາກ ແລະ ບໍ່ມີອີກແລ້ວໃນໂລກ, ລາວຫວຽດນາມແມ່ນສອງປະເທດອ້າຍນ້ອງທີ່ມີຊາຍແດນຕິດຈອດກັນ, ກອງທັບ ແລະ ປະຊາຊົນສອງຊາດມີມູນນເຊື້ອສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນມາແຕ່ດົນນານ, ພ້ອມກັນຄຽງບາຄຽງໄລ່ຕໍ່ສູ້ກັບສັດຕູໂຕດຽວກັນ, ຮ່ວມສຸກຮ່ວມທຸກ, ຮ່ວມຂຸມຄອງອັນດຽວກັນທີ່ເຕັມໄປດ້ວຍການເສຍສະຫຼະອັນໃຫຍ່ຫຼວງ ນັບທັງຊີວິດ ແລະ ຊັບສິນ, ຍາດເຫື່ອ, ເລືອດເນື້ອ ແລະ ນ້ຳຕາຂອງນັກຮົບປະຕິວັດ ແລະ ປະຊາຊົນບັນດາເຜົ່າຜູ້ຮັກຊາດ ບໍ່ຈັກວ່າເທົ່າໃດເພື່ອແລກເອົາຄວາມເປັນເອກະລາດ, ອິດສະຫຼະພາບ ມາໃຫ້ສອງຊາດ ເຮັດໃຫ້ຄວາມສຳພັນຍິ່ງເພີ່ມທະວີຄວາມສາມັກຄີຂຶ້ນກວ່າເກົ່າ ກ່າຍເປັນມູນເຊື້ອຄວາມສາມັກຄີແບບພິເສດຍິ່ງກວ່າເກົ່າ, ມີຄວາມບໍລິສຸດສັດຊື່, ຜ່ອງໃສ, ໄວ້ເນື້ອເຊື່ອໃຈ ແລະ ເປັນມູນມໍລະດົກກ້ອນລ້ຳຄ່າຂອງສອງຊາດຄືດັ່ງຄຳເວົ້າຂອງ ທ່ານ ໂຮ່ຈິມິນ ໄດ້ກ່າວໄວ້ວ່າ: ຮັກຫອມກັນໝາຍໝັ້ນຫຼາຍສັນພູກໍ່ປີນໄຕ່ ຫຼາຍນ້ຳໃຫຍ່ ແລະ ໂຄກຄ້ອຍຂວາງກັ້ນກໍ່ດຸ່ງໄປ ສອງຊາດລາວ-ຫວຽດນາມໄດ້ ເປັງຄວາມຮັກຢູ່ໃນໃຈ ຮົງຮ່າທັງແມ່ຂອງ ບໍເລິກປຸງປານໄດ້ ແລະ ປະທານ ໄກສອນ ພົມວິຫານ ກ່າວໄວ້: ເຖີງພູອາດຈະຖືກເຊາະເຈື່ອນ ແມ່ນ້ຳລຳເຊຈະເຫືອດແຫ້ງ ແຕ່ສາຍພົວພັນມິດຕະພາບລາວ-ຫວຽດນາມ ຈະໝັ້ນຄົງທະນົງແກ່ນຊົ່ວກາລະນານ ຢືນຍົງຕະຫຼອດໄປ.
ເນື່ອງໃນໂອກາດປີ ສາມັກຄີຮ່ວມມືຮອບດ້ານແບບພິເສດ ລາວ-ຫວຽດນາມ ຂໍອວຍພອນໄຊອັນປະເສີດມາຍັງພັກ, ລັດ, ກອງທັບ ແລະ ປະຊາຊົນທັງສອງຊາດ ຈົ່ງມີສຸຂະພາບເຂັ້ມເເຂງ, ສືບຕໍ່ຊີ້ນຳ-ນຳພາ ປະເທດຊາດໃຫ້ກ້າວຂຶ້ນຢ່າງບໍ່ຢຸດຢັ້ງ, ອວຍພອນແດ່ຄວາມສາມັກຄີມິດຕະພາບແບບພິເສດ, ການຮ່ວມມືຮອບດ້ານຂອງສອງຊາດ, ສອງພັກ, ສອງກອງທັບ ແລະ ປະຊາຊົນທັງສອງຊາດ ລາວ-ຫວຽດນາມ ຈົ່ງຈະເລີນງອກງາມ ແລະ ໝັ້ນຄົງທະນົງແກ່ນຊົ່ວກາລະນານ. ໂອກາດນີ້ພະນັກງານຫຼັກແຫຼ່ງກອງພົນທະຫານຮາບທີ 4 ໄດ້ທ່ຽວຊົມຫໍພິພິທະພັນ ຄັ້ງນີ້ ໄດ້ເຮັດໃຫ້ເຂົ້າໃຈປະຫວັດມູນເຊື້ອອັນດີງາມ ແລະ ການຕໍ່ສູ້ອັນພິລະອາດຫານນານາປະການຂອງສອງກອງທັບລາວ-ຫວຽດນາມ ໂດຍສະເພາະບັ້ນຮົບລາມເຊີນ 719 ບັ້ນຮົບທີ່ດຸເດືອດທີ່ສຸດໃນພາກກາງ ພ້ອມທັງຍາດເອົາໄຊຊະນະອັນໃຫຍ່ຫຼວງມາສູ່ປະຊາຊົນ 2 ຊາດ ໄດ້ຢ່າງໜ້າສັນລະເສີນ ແລະ ບັນທຶກໄວ້ເປັນມູນເຊື້ອຂອງສອງຊາດ ລາວ-ຫວຽດນາມ ໃຫ້ໄດ້ທ່ຽວຊົມ ແລະ ຈົດຈຳຕະຫຼອດໄປ.
ຂ່າວໂດຍ: ຮ້ອຍໂທ ໂພຄຳ ພອນປະເສີດ (ນັກຂ່າວກອງພົນທີ 4)
