ເພື່ອສົ່ງເສີມການທ່ອງທ່ຽວ ຂອງເມືອງຈໍາພອນ ໃຫ້ເປັນຈຸດໝາຍປາຍທາງຂອງການທ່ອງທ່ຽວ ຕິດພັນກັບການບໍລິການ,ດຶງດູດເອົານັກທ່ອງທ່ຽວທັງພາຍໃນແລະຕ່າງປະເທດ ເຂົ້າມາທ່ອງທ່ຽວແຂວງສະຫວັນນະເຂດ ໃຫ້ຫຼາຍຂຶ້ນ ທັງເປັນການສົ່ງເສີມ ຟື້ນຟູວັດທະນະທໍາ ແລະວິຖີການດໍາລົງຊີວິດຂອງຊຸມຊົນໃນທ້ອງຖິ່ນ;ດັ່ງນັ້ນໃນວັນທີ 13 ທັນວາ 2022 ນີ້ ທ່ານ ປອ ໂພໄຊ ສິດທິຊົນ ຮອງຫົວໜ້າ ພະແນກຖະແຫຼງຂ່າວ ວັດທະນະທໍາ ແລະທ່ອງທ່ຽວແຂວງ ພ້ອມຫົວໜ້າຂະແໜງທ່ອງທ່ຽວ ແລະວິຊາການ ໄດ້ຮ່ວມປະຊຸມເພື່ອປຶກສາຫາລື ກະກຽມການຈັດງານ ເທດສະການອາຫານລີງ ທີ່ບ້ານດົງເມືອງ ເມືອງຈໍາພອນ ໂດຍມີທ່ານ ດວງຈັນ ວຽງວິໄລ ຮອງເລຂາພັກເມືອງ,ທ່ານ ຄໍາຕາ ສິນນະສອນ ຮອງເຈົ້າເມືອງ ພ້ອມບັນດາຂະແໜງການ,ໜ່ວຍງານທີ່ກ່ຽວຂ້ອງ ເຂົ້າຮ່ວມ.
ໃນກອງປະຊຸມ ໄດ້ມີການປຶກສາຫາລື ແລະມີຄວາມເປັນເອກະພາບ ໃນເບື້ອງຕົ້ນ ທາງດ້ານ ວັນ ເວລາ ສະຖານທີ່ ເຊິ່ງຄາດວ່າ ວັນທີ 24 ຫາ 26 ມີນາ 2023 , ຂະໜາດຂອງງານ ແລະ ບັນດາກິຈະກໍາ ທີ່ຈະຈັດໃນງານ ເຊິ່ງໄດ້ວາງໂຄງປະກອບຫຼາຍດ້ານ ເປັນຕົ້ນ ຂະບວນແຫ່ກວຽນໝາກໄມ້,ຂະບວນຫາບກະຕ່າໝາກໄມ້ ທີ່ເປັນອາຫານລີງ,ການອອກຮ້ານວາງສະແດງ ຈໍາໜ່າຍຜະລິດຕະພັນສິນຄ້າກຸ່ມບ້ານ,ອາຫານພື້ນເມືອງ,ການແຂ່ງຂັນກິລາພື້ນເມືອງ,ການປະກວດຮູບແຕ້ມຂອງນ້ອງນັກຮຽນ, ຊົມການຮ້ອງເພງ ຈາກນັກຮ້ອງທີ່ມີຊື່ສຽງຂອງຊາວແຂວງສະຫວັນນະເຂດ,ນອກນີ້ກໍ່ຈະມີຄາຣາວານລົດໃຫຍ່,ລົດຖີບ ທ່ຽວຊົມວົງຈອການທ່ອງທ່ຽວ ຂອງເມືອງຈໍາພອນ,ສ່ວນລາຍລະອຽດ ຍັງຈະມີການປຶກສາຫາລືກັນອີກຄັ້ງໜຶ່ງ ເຊິ່ງໃນເບື້ອງຕົ້ນ ທ່ານຮອງຫົວໜ້າພະແນກ ຖວທ ແຂວງໄດ້ເນັ້ນໃຫ້ເມືອງ ຕ້ອງໄດ້ແຕ່ງຕັ້ງອະນຸກໍາມະການຕ່າງໆ ໃຫ້ໄວແລະເລີ່ມຈັດຕັ້ງປະຕິບັດໜ້າວຽກຂອງຕົນ.
ງານເທດສະການອາຫານລີງ ແມ່ນໜຶ່ງໃນ 4 ກິຈະກໍາຂອງການທ່ອງທ່ຽວ ທີ່ການນໍາຂອງແຂວງອະນຸມັດໃຫ້ຈັດຂຶ້ນ ຄື:ຄາຣາວານລົດຖີບ ສອງຝັ່ງຂອງ ທີ່ໄດ້ຈັດສໍາເລັດແລ້ວ ໃນທ້າຍເດືອນຕຸລາ ຜ່ານມາ, ກິດຈະກໍາອາຫານ 4 ແຜ່ນດິນ,ກິຈະກໍາແຂ່ງຂັນ ແຈັສກີ ແລະ ກິຈະກໍາ ເທດສະການອາຫານລີງ.ເຊິ່ງງານດັ່ງກ່າວຄາດວ່າຈະຈັດຂຶ້ນໃນທຸກໆປີ ໃຫ້ເປັນປະເພນີ ໃນປີຕໍ່ໆໄປ.
