ທ່ານ ບຸນຍະວັດ ນິລະໄຊຍ໌ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນນະຄອນຫຼວງວຽງຈັນ (ນວ) ຊຸດທີ II ໃນວັນທີ 9 ກໍລະກົດນີ້ ກ່ຽວກັບຄວາມຄືບໜ້າໃນການຈັດຕັ້ງປະຕິບັດ ໂຄງການປັບປຸງ ແລະ ສ້ອມແປງທາງຫຼວງແຫ່ງຊາດ ເລກທີ 13 ເໜືອ ໄລຍະສາມແຍກສີໄຄ-ສີ່ແຍກສີເກີດ ວ່າ: ໂຄງການປັບປຸງ ແລະ ສ້ອມແປງທາງຫຼວງແຫ່ງຊາດ ເລກທີ 13 ເໜືອ ໄລຍະສາມແຍກສີໄຄ-ສີ່ແຍກສີເກີດ ມີລວງຍາວທັງໝົດ 6 ກິໂລແມັດ, ໜ້າທາງກວ້າງ 23 ແມັດ, ປະກອບມີ 4 ຊ່ອງຈາລະຈອນ, ມີດອນກາງທາງ, ມີໄຟເຍືອງທາງ ແລະ ຮ່ອງລະບາຍນໍ້າຂ້າງທາງແບບປິດ, ມູນຄ່າສັນຍາ 10,29 ລ້ານໂດລາ, ກຸ່ມບໍລິສັດຕັ້ງຈະເລີນ ຈຳກັດ ຜູ້ຮັບເໝົາກໍ່ສ້າງ, ບໍລິສັດທີ່ປຶກສາ ບໍລິສັດ Dongsung ແລະ Dasan ຈາກເກົາຫຼີ ຮ່ວມກັບ Lao Consulting Group ຈາກ ສປປ ລາວ, ໄລຍະເວລາກໍ່ສ້າງ 1.5 ປີ, ໄລຍະເວລາບູລະນະຮັກສາສ້ອມແປງ 3 ປີ, ໂຄງການດັ່ງກ່າວ ກະຊວງ ຍທຂ ເປັນເຈົ້າຂອງໂຄງການ, ແຫຼ່ງທຶນມີ 4 ແຫຼ່ງທຶນ, ປະກອບມີ: ທະນາຄານໂລກ, ທະນາຄານການລົງທຶນໂຄງລ່າງອາຊີ (AIIB), ກອງທຶນນໍດິກເພື່ອການພັດທະນາ (NDF) ແລະ ທຶນສົມທົບຂອງລັດຖະບານ (GoL), ປັດຈຸບັນມີຄວາມຄືບ ໜ້າ 47%, ຫຼຸດແຜນການ 17% ເນື່ອງຈາກວ່າ ໄລຍະນີ້ແມ່ນໄລຍະລະດູຝົນ ບໍ່ສາມາດຈັດຕັ້ງປະຕິບັດວຽກດິນຜົນກະທົບດ້ານສິ່ງແວດລ້ອມຈໍານວນຄອບຄົວທັງໝົດ 587 ຄອບຄົວ, ເຊັນບົດບັນທຶກເຫັນດີຮັບເອົາຄ່າຊົດເຊີຍຈ່າຍ ໄປແລ້ວທັງໝົດ 578 ຄອບຄົວ, ຈໍານວນ 24.729.281.627 ກີບ, ຄິດເປັນ 98,47%, ຍັງເຫຼືອ 9 ຄອບຄົວ, ຂັ້ນຕອນຊົດເຊີຍ,
ວຽກຄົງຄ້າງ: ໂຄງການດັ່ງກ່າວ, ການກໍ່ສ້າງໃນຕົວເມືອງມີຊຸມຊົນໜາແໜ້ນ, ມີຜູ້ຊົມໃຊ້ເສັ້ນທາງ ຕະຫຼອດເວລາ, ມີຜູ້ເຮັດທຸລະກິດ ແລະ ຊາວຄ້າຂາຍ, ມີ 3 ຕະຫຼາດໃຫຍ່: ມີລົດບັນທຸກໜັກແລ່ນຜ່ານ, ກະທົບຕໍ່ກັບ ການກໍ່ສ້າງ, ເກີດມີຂີ້ຝຸ່ນໄຫງ່, ລົດແລ່ນໄວ, ການຍົກຍ້າຍສິ່ງກີດຂວາງຍັງຄ້າງຄາຈໍານວນໜຶ່ງ ແລະ ບັນຫານໍ້າອັ່ງຂ້າງທາງຍັງເກີດມີ ຍ້ອນການກໍ່ສ້າງ ຮ່ອງລະບາຍນໍ້າຍັງບໍ່ທັນແລ້ວ ແລະ ເຊື່ອມຈອດກັນເທື່ອ ພ້ອມກັນນັ້ນ ຄອງລະບາຍນໍ້າອອກຈາກທາງໄປຫາ ຮ່ອງທໍາມະຊາດ ຍັງມີສິ່ງເສດເຫຼືອອຸຕັນ ບໍ່ໄດ້ຮັບການອະນາໄມ ເກີດບັນຫາເຮັດໃຫ້ນໍ້າໄຫຼບໍ່ທັນ.
ທ່ານ ບຸນຍະວັດ ນິລະໄຊຍ໌ ກ່າວຕື່ມວ່າ: ແຜນໃນຕໍ່ໜ້າ ບໍລິສັດຮັບເໝົາ ກໍາລັງດັດແກ້ ແຜນເລັ່ງວຽກ ໂດຍໄດ້ເພີ່ມທີມງານເທໜ້າທາງຂຶ້ນອີກ 2 ທີມ ພ້ອມນັ້ນ, ຕ້ອງໄດ້ເຮັດວຽກ ກາງຄືນໄປພ້ອມ(ເປັນກະ) ເພື່ອໃຫ້ສຳເລັດ. ເພີ່ມທີມງານກໍ່ສ້າງຮ່ອງນໍ້າ, ເລັ່ງຖອນຫຼັກເສົາໄຟຟ້າເກົ່າທີ່ນອນໃນເຂດກໍ່ສ້າງ, ລວມທັງ ກ້ອງວົງຈອນປິດ ແລະ ສາຍໄຍແກ້ວ, ປະສານພະແນກຕຳຫຼວດຈະລາຈອນ ໃນການລະບາຍການສັນຈອນ ເພື່ອອໍານວຍຄວາມສະດວກ ໃຫ້ແກ່ການກໍ່ສ້າງ.
(ຂ່າວ-ພາບ: ແສງຈັນ)
