ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 17 ມິຖຸນາ ຜ່ານມາ ຢູ່ຫໍສະພາແຫ່ງຊາດ ຫວຽດນາມ ຮ່າໂນ້ຍ, ທ່ານ ເຈິ່ນແທັງເໝິນ ປະທານສະພາແຫ່ງຊາດ ຫວຽດນາມ ໄດ້ໃຫ້ການຕ້ອນຮັບທ່ານເອກອັກຄະລັດຖະທູດ ສະຫະພາບເອີຣົບ (EU) ແລະ ເອກອັກຄະລັດຖະທູດ, ອຸປະທູດບັນດາປະເທດ ສະມາຊິກ EU ປະຈຳ ຮ່າໂນ້ຍ.
ຂ່າວລະບຸວ່າ: ໃນການຕ້ອນຮັບ, ທ່ານ ເຈິ່ນແທັງເໝິນ ຢັ້ງຢືນວ່າ: ການພົວພັນລະຫວ່າງສະພາແຫ່ງຊາດ ຫວຽດນາມ ແລະ ລັດຖະສະພາເອີຣົບ (EP) ພວມພັດທະນາຢ່າງດີງາມ ແລະ ຕັ້ງໜ້າ. ໄລຍະຈະມາເຖິງ, ທ່ານ ເຈິ່ນແທັງເໝິນ ປາຖະໜາວ່າ ບັນດາເອກອັກຄະລັດຖະທູດ, ອຸປະທູດ ຈະເພີ່ມທະວີການແລກປ່ຽນ, ພົບປະ, ສົມທົບກັບບັນດາກຸ່ມສະມາຊິກລັດຖະສະພາມິດຕະພາບຂອງສະພາແຫ່ງຊາດ ຫວຽດນາມ. ຊຸກຍູ້ການຮ່ວມມືສອງຝ່າຍໃນບັນດາຂົງເຂດ, ສືບຕໍ່ເສີມຂະຫຍາຍບັນດາກົນໄກການຮ່ວມມື ເຈລະຈາທີ່ມີແລ້ວໃຫ້ມີປະສິດທິຜົນ, ໂດຍສະເພາະແມ່ນການຮ່ວມມືລັດຖະສະພາ, ແນໃສ່ເສີມຂະຫຍາຍສັນຍາຄູ່ຮ່ວມມື ແລະ ການຮ່ວມມືຮອບດ້ານ ຫວຽດນາມ – EU, ສັນຍາການຄ້າເສລີ ຫວຽດນາມ – EU (EVFTA) ໃຫ້ເປັນຢ່າງດີ, ຊຸກຍູ້ລັດຖະສະພາ 9 ປະເທດສະມາຊິກ EU ທີ່ຍັງເຫຼືອ ໃຫ້ສັດຕະຍາບັນສັນຍາອາລັກຂາການລົງທຶນໂດຍໄວ ເພື່ອໃຫ້ການຄ້າ – ການລົງທຶນ (EVIPA) ສອງຝ່າຍພັດທະນາຢ່າງແຂງແຮງ.
ສ່ວນທ່ານ ຈູລຽນ ເກຣິເຍ ເອກອັກຄະລັດຖະທູດ EU ປະຈຳ ຫວຽດນາມ ເນັ້ນໜັກວ່າ: ການພົວພັນລະຫວ່າງ ຫວຽດນາມ – EU ຍັງມີກຳລັງບົ່ມຊ້ອນຫຼາຍຢ່າງເພື່ອຮ່ວມມືກັນໃນໄລຍະຈະມາເຖິງ. ໃນຂະນະນັ້ນ, ບັນດາເອກອັກຄະລັດຖະທູດ, ອຸປະທູດບັນດາປະເທດ EU ຕີລາຄາສູງບົດບາດ, ທີ່ຕັ້ງ ທີ່ນັບມື້ນັບສຳຄັນຂອງ ຫວຽດນາມ ຢູ່ພາກພື້ນ ແລະ ໃນທົ່ວໂລກ, ກໍຄືບັນດາຜົນງານຂອງ ຫວຽດນາມ ໃນການຮັບປະກັນປະຕິບັດສິດທິມະນຸດ, ບັນດາສິດທີ່ກ່ຽວຂ້ອງເຖິງເດັກ ແລະ ແມ່ຍິງ.
