ໃນໄລຍະສະຫລອງປີໃໝ່ລາວ 2024 ທີ່ຈະມາເຖິງນີ້, ຕະຫລາດລາວ ຂາຍຍົກ-ຂາຍຍ່ອຍ ໄດ້ກຽມຄວາມພ້ອມ ຮອບດ້ານເພື່ອສະໜອງສິນຄ້າ ປະເພດຕ່າງໆ ເປັນຕົ້ນ ຊີ້ນໝູ, ຊີ້ນງົວ-ຄວາຍ, ພືດຜັກຕ່າງໆ ແລະ ສິນຄ້າອື່ນໆ ໃຫ້ພຽງພໍກັບຄວາມຮຽກຮ້ອງຕ້ອງການຂອງຜູ້ບໍລິໂພກ ຢູ່ນະຄອນຫລວງວຽງຈັນ, ພ້ອມທັງວາງມາດຕະການຢ່າງເຂັ້ມງວດ ເພື່ອຄວບຄຸມລາຄາສິນຄ້າ ຢູ່ພາຍໃນຕະຫລາດ ເພື່ອບໍ່ໃຫ້ພໍ່ຄ້າ-ຊາວຂາຍ ສວຍໂອກາດ ຂຶ້ນລາຄາສິນຄ້າ ຕາມລໍາພັງໃຈ ແລະ ອື່ນໆ.
![](https://medialaos.net/wp-content/uploads/2024/04/434425239_867847025369605_7437685834780550201_n.jpg)
ທ່ານ ສົມຫວັງ ໄຊສົມພູ ຫົວໜ້າຈັດສັນ ຕະຫລາດລາວ ຂາຍຍົກ-ຂາຍຍ່ອຍ ໃຫ້ສຳພາດໃນວັນທີ 9 ເມສາ 2024 ນີ້ວ່າ: ໃນໄລຍະສະເຫລີມສະຫລອງປີໃໝ່ລາວ 2024 ທີ່ຈະມາເຖິງນີ້, ຕະຫລາດລາວ ຂາຍຍົກ-ຂາຍຍ່ອຍ ກຽມຄວາມພ້ອມຮອບດ້ານ ເພື່ອສະໜອງສິນຄ້າປະເພດຕ່າງໆ ໃຫ້ພຽງພໍກັບຄວາມຕ້ອງການຂອງຜູ້ບໍລິໂພກ,ພ້ອມທັງວາງມາດຕະການຢ່າງເຄັ່ງຄັດ ເພື່ອຄວບຄຸມລາຄາສິນຄ້າ ໂດຍຈະຈັດຕັ້ງທີມງານລົງໄປກວດກາລາຄາສິນຄ້າ, ກວດກາຕາຊັ່ງ ແລະ ວາງຊິງກາງ ທັງໝົດ 6 ຈຸດ, ພ້ອມທັງໃຫ້ແມ່ຄ້າ ຕິດປ້າຍລາຄາ ສິນຄ້າຕ່າງໆຢ່າງຊັດເຈນ ເພື່ອບໍ່ໃຫ້ແມ່ຄ້າ ເອົາລັດເອົາປຽບຜູ້ບໍລິໂພກ, ທັງເປັນຢັ້ງຢືນໃຫ້ຜູ້ບໍລິໂພກ ມີຄວາມໝັ້ນໃຈທີ່ຈະຊື້ສິນຄ້າປະເພດຕ່າງໆ ດ້ວຍຄວາມສະບາຍໃຈ. ແຕ່ຢ່າງໃດກໍຕາມ ພໍ່ຄ້າ-ຊາວຂາຍ ທີ່ລະເມີດຕໍ່ລະບຽບການ ຂອງຕະຫລາດວາງອອກ ເປັນຕົ້ນ ສວຍໂອກາດຂຶ້ນລາຄາສິນຄ້າ, ປັບຕາຊັ່ງຊິງ ແລະ ອື່ນໆ ຈະຖືກດຳເນີນຄະດີຕາມລະບຽບ ທີ່ວາງໄວ ຢ່າງເຄັ່ງຄັດ ຄື: ຖ້າກະທຳຜິດເທື່ອທຳອິດ ຈະອອກໃບແຈ້ງເຕືອນເຖິງຮ້ານ, ເທື່ອທີ່ສອງ ຈະເຮັດໃຫ້ບົດບັນທຶກ ແລະ ກະທຳຜິດ ເທື່ອທີສາມ ຈະໃຫ້ຢຸດເຊົາກິດຈະການຊົ່ວຄາວ ແລະ ປັບໃໝ ຕາມລະບຽບການ.
![](https://medialaos.net/wp-content/uploads/2024/04/434030109_867847135369594_6947548806243994552_n.jpg)
ສຳລັບ ສິນຄ້າທີ່ນຳມາວາງຂາຍ ຢູ່ຕະຫລາດລາວ ຂາຍຍົກ-ຂາຍຍ່ອຍ ແມ່ນໄດ້ມາຈາກຫລາຍແຫ່ງ ເປັນຕົ້ນ ພືດຜັກຕ່າງໆ ໄດ້ຈາກສະຫະກອນບ້ານທ່າຊ້າງ, ບ້ານທົ່ງມັ່ງ, ຈາກກາສີ ແລະ ແຂວງຊຽງຂວາງ ຈຳນວນໜຶ່ງ ເຊິ່ງນຳເຂົ້າມາຂາຍໃນຕະຫລາດ 6-7 ພັນກິໂລຕໍ່ມື້. ສ່ວນຊີ້ນໝູພັນ ພໍ່ຄ້າຊາວຂາຍ ນຳມາວາງຂາຍ 2 ພັນກວ່າກິໂລຕໍ່ມື້, ໝູລາດ 15 ໂຕຕໍ່ມື້, ຊີ້ນງົວ-ຄວາຍ 600 ກິໂລ, ເປັດ-ໄກ່ 55 ໂຕຕໍ່ມື້, ປາ 2 ພັນກວ່າກິໂລ, ອາຫານທະເລ 600 ກວ່າກິໂລ ແລະ ໝາກໄມ້ 400 ກວ່າກິໂລຕໍ່ມື້. ໃນນັ້ນ, ລາຄາ ຊີ້ນໜູພັນ 78 ພັນກີບຕໍ່ກິໂລ, ໜູລາດ 80 ພັນກີບຕໍ່ກິໂລ, ຊີ້ນງົວ-ຄວາຍ 130.000 ກີບຕໍ່ກິໂລ, ເປັດ-ໄກລາດ 120.000 ກີບຕໍ່ກິໂລ ແລະ ປານິນ 45 ພັນກີບຕໍ່ກິໂລ.
![](https://medialaos.net/wp-content/uploads/2024/04/434473414_867847165369591_7842800727981542512_n.jpg)
ທ່ານ ສົມຫວັງ ໄຊສົມພູ ຍັງໃຫ້ຮູ້ອີກວ່າ: ຕະຫລາດລາວ ຂາຍຍົກ-ຂາຍຍ່ອຍ ເລີ່ມເປີດບໍລິການໃນເດືອນມັງກອນ 2022 ເປັນຕົ້ນມາ ຢູ່ບ້ານສະພັງເມິກ ເມືອງໄຊທານີ ນະຄອນຫລວງວຽງຈັນ, ມີເນື້ອທີ່ປະມານ 70 ພັນຕາແມັດ, ເນື້ອທີ່ອາຄານປະມານ 25 ພັນຕາແມັດ. ໃນນັ້ນ, ປະກອບມີ: ອາຄານຫ້ອງການບໍລິຫານ-ຈັດສັນຕະຫລາດ, ອາຄານຕະຫລາດ ແບ່ງເປັນຈຸດຂາຍລະອຽດຄື: ຈຸດຂາຍຊີ້ນ, ຂາຍເປັດ-ໄກ່, ຂາຍປາ, ຂາຍຜັກ, ຂາຍຂອງກິນສຸກ, ຂາຍສິນຄ້າປຸງແຕ່ງ, ຂາຍເຄື່ອງນຸ່ງຫົ່ມ, ສິນຄ້າອຸປະໂພກ-ບໍລິໂພກ ແລະ ຈຸດບໍລິການ ປະເພດຫ້ອງ, ປະເພດໂຕະ ແລະ ປະເພດລ໋ອກ ສຳລັບຂາຍຍົກ. ນອກນັ້ນ, ຍັງມີ ອາຄານສາງເຢັນ ເພື່ອເກັບຮັກສາສິນຄ້າສົດ ເຊັ່ນ: ພືດຜັກ-ໝາກໄມ້, ຊີ້ນ-ປາ ແລະ ສາງແຫ້ງ ສຳລັບເກັບມ້ຽນສິນຄ້າສຳເລັດຮູບປະເພດສິນຄ້າປຸງແຕ່ງຕ່າງໆ.
ຂ່າວ: ທະນູທອງ
ພາບ: ຂັນໄຊ