ຄະນະຄຸ້ມຄອງເຂດເສດຖະກິດພິເສດ (ຄຂສພ) ນະຄອນຫຼວງວຽງຈັນ (ນວ) ຮ່ວມກັບ ພະແນກແຮງງານ ແລະ ສະຫວັດດີການສັງຄົມ ນວ, ພະແນກສຶກສາທິການ ແລະ ກິລາ ນວ, ຜູ້ພັດທະນາ ແລະ ລົງທຶນ ໂຮງຮຽນວິຊາຊີບ, ສູນຝຶກອົບຮົມ ທີ່ມີຄວາມຕ້ອງການແຮງງານໃນເຂດເສດຖະກິດພິເສດ ນວ ຈັດກອງປະຊຸມພົບປະແລກປ່ຽນວຽກງານການສະໜອງແຮງງານໃຫ້ຫົວໜ່ວຍທຸລະກິດ ເມື່ອວັນທີ 28 ທັນວາ 2023 ທີ່ເຂດເສດຖະກິດກວມລວມໄຊເຊດຖາ ນວ ພາຍໃຕ້ການເປັນປະທານຂອງທ່ານ ພູວົງ ວົງຄຳຊາວ ຮອງເຈົ້າຄອງ ນວ, ມີບັນດາຫົວໜ້າ-ຮອງຫົວໜ້າພະແນກ, ຫ້ອງການ, ອົງການທຽບເທົ່າ, ຜູ້ພັດທະນາ ແລະ ລົງທຶນ, ຜູ້ປະກອບການ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ພູວົງ ວົງຄຳຊາວ ກ່າວວ່າ: ກອງປະຊຸມຄັ້ງນີ້ ຈັດຂຶ້ນກໍມີເປົ້າໝາຍຫຼັກ ເພື່ອພົບປະແລກປ່ຽນລະຫວ່າງພາກສ່ວນຕ່າງໆທີ່ກ່ຽວຂ້ອງໂດຍສະເພາະພາກລັດ ພາກເອກະຊົນ ແລະ ຜູ້ປະກອບການ ເພື່ອກໍານົດກົນໄກ ແລະ ວິທີການໃນການສ້າງ ສະໜອງບຸກຄະລາກອນ ທາງດ້ານແຮງງານໃຫ້ແກ່ຄວາມຕ້ອງການນໍາໃຊ້ແຮງງານເຂົ້າເຮັດວຽກຢູ່ບັນດາເຂດເສດຖະກິດພິເສດ ນວ ເພື່ອແນໃສ່ສາມາດຕອບສະໜອງໄດ້ບຸກຄະລາກອນທີ່ມີຄວາມຮູ້ ຄວາມສາມາດ ຈາກສະຖາບັນການສຶກສາທີ່ເປັນບ່ອນບໍາລຸງກໍ່ສ້າງບຸກຄະລາກອນ ສະໜອງໃຫ້ຂົງເຂດຕ່າງໆ. ພ້ອມນັ້ນ, ເພື່ອກ້າວໄປສູ່ການກຳນົດກົນໄກການຮ່ວມມືກັນຂອງຜູ້ສ້າງແຮງງານ ແລະ ຜູ້ນໍາໃຊ້ແຮງງານໃຫ້ເປັນຂະບວນການຕໍ່ເນື່ອງກັນເລີ່ມຈາກຂະບວນການສ້າງຫຼັກສູດ, ການຝຶກວຽກງານການສະໜອງແຮງງານ, ສະຖານປະກອບການຮອງຮັບເຂົ້າເຮັດວຽກ ແລະ ອື່ນໆ ພາຍໃນ ນວ ປະກອບມີເຂດເສດຖະກິດພິເສດ 5 ເຂດເປົ້າໝາຍໃນການພັດທະນາ ເພື່ອສ້າງເປັນເຂດອຸດສາຫະກຳ ເຂດຕົວເມືອງໃໝ່, ການທ່ອງທ່ຽວ, ການຄ້າການບໍລິການ ການຂົນສົ່ງ ແລະ ອື່ນໆ ໃນໄລຍະຜ່ານມາການພັດທະນາເຫັນວ່າມີບາດກ້າວຂະຫຍາຍຕົວຢ່າງຕໍ່ເນື່ອງ ໂດຍສະເພາະວຽກງານດຶງດູດການລົງທຶນ ການພັດທະນາພື້ນຖານໂຄງລ່າງ ການສ້າງວຽກເຮັດງານທຳ ການຖ່າຍທອດເຕັກໂນໂລຊີ ການປະກອບສ່ວນພັນທະເຂົ້າງົບປະ ມານຂອງລັດ ການຜະລິດສິນຄ້າທົດແທນການນຳເຂົ້າ ການສົ່ງອອກສິນຄ້າ ແລະ ອື່ນໆ ມີວິສາຫະກິດທີ່ເຂົ້າມາລົງທຶນຈໍານວນຫຼາຍຮ້ອຍບໍລິສັດ ຊຶ່ງພາໃຫ້ເກີດມີການສ້າງວຽກເຮັດງານທຳໄດ້ 9.623 ຄົນ, ໃນນັ້ນ ແຮງງານລາວ 7.242 ຄົນ ແຮງງານຕ່າງປະເທດ 2.381 ຄົນ ຈາກຕົວເລກແຮງງານດັ່ງກ່າວ ສະແດງໃຫ້ເຫັນມີການຈ້າງງານທີ່ຫຼາຍ ແຕ່ຖ້າທຽບໃສ່ການຂະຫຍາຍຕົວຂອງການພັດທະນາຕາມເປົ້າໝາຍທີ່ວາງໄວ້ຍັງເປັນຂໍ້ຈໍາກັດໃນການດຶງດູດການລົງທຶນ ເນື່ອງຈາກແຮງງານເປັນປັດໃຈຕົ້ນຕໍໜຶ່ງທີ່ສໍາຄັນເຮັດໃຫ້ທຸລະກິດສາມາດດຳເນີນການໄດ້.
ຮອງເຈົ້າຄອງ ນວ ຍັງກ່າວຕື່ມອີກວ່າ: ເປົ້າໝາຍທີ່ໜຶ່ງທີ່ສໍາຄັນຂອງການພັດທະນາ ເພື່ອກ້າວໄປສູ່ແຮງງານທີ່ຊໍານານງານສະເພາະດ້ານໃນການຖ່າຍທອດຄວາມຮູ້ ເຕັກໂນໂລຊີ ຈາກຊ່ຽວຊານວິຊາການສະເພາະດ້ານຂອງຕ່າງປະເທດ ໃນຜ່ານມາເຫັນວ່າຄະນະຄຸ້ມຄອງເຂດ ແລະ ພາກສ່ວນຕ່າງໆທີ່ກ່ຽວ ຂ້ອງໄດ້ຮ່ວມກັນຈັດຕັ້ງປະຕິບັດຕາມພາລະບົດບາດຂອງຕົນໃນການຊຸກຍູ້ ສົ່ງເສີມວຽກງານແຮງງານດ້ວຍຫຼາກຫຼາຍວິທີການ ແຕ່ທຽບໃສ່ການຂະຫຍາຍຕົວຂອງການລົງທຶນໃນບັນດາເຂດເຫັນວ່າຍັງບໍ່ທັນຕອບສະໜອງໄດ້ຕາມປະລິມານຄວາມຕ້ອງການທີ່ແທ້ຈິງໃນການນໍາໃຊ້ແຮງງານຢູ່ພາຍໃນເຂດເສດຖະກິດພິເສດ ນວ ສະນັ້ນ ເພື່ອເຮັດໃຫ້ວຽກງານການສ້າງ ການສະໜອງແຮງງານ ໃນອະນາຄົດຮັບປະກັນໄດ້ທາງດ້ານປະລິມານ-ຄຸນນະພາບ ແລະ ແທດເໝາະກັບຄວາມຕ້ອງການທີ່ແທ້ຈິງຂອງວິສາຫະກິດແຕ່ລະໄລຍະ ຈຶ່ງຈັດກອງປະຊຸມເພື່ອແລກປ່ຽນຄໍາຄິດຄໍາເຫັນດ້ານວິຊາການຢ່າງກົງໄປກົງມາຕາມຂອບເຂດສິດ ແລະ ພາລະບົດບາດຂອງຕົນ ເພື່ອເຮັດໃຫ້ໄດ້ຮັບຜົນສໍາເລັດຕາມຈຸດປະສົງຄາດໝາຍ ແລະ ເປັນທິດທາງໃນການຈັດຕັ້ງປະຕິບັດໃນຕໍ່ໜ້າ.
ໃນໂອກາດດັ່ງກ່າວ, ທ່ານຮອງເຈົ້າຄອງ ນວ ກໍຍັງໄດ້ຊີ້ນໍາເພີ່ມເຕີມເພື່ອເປັນທິດທາງໃນການຈັດຕັ້ງປະຕິບັດໃນຕໍ່ໜ້າ ໃຫ້ຄະນະຄຸ້ມຄອງເຂດເສດຖະກິດພິເສດເປັນໃຈກາງໃນການປະສານງານ ເພື່ອຈັບຄູ່ຮ່ວມມືກັນລະຫວ່າງ ຜູ້ພັດທະນາ ຜູ້ລົງທຶນ ກັບຂະແໜງການທີ່ກ່ຽວຂ້ອງ ປັບປຸງຫຼັກສູດການຮຽນ-ການສອນ ໃຫ້ແທດເໝາະກັບຄວາມຕ້ອງການແຮງງານຕົວຈິງ ພາຍໃນເຂດເສດຖະກິດພິເສດ ສ້າງກົນໄກການຮ່ວມມື ຫຼື ສ້າງເປັນ (MOU) ລະຫວ່າງຜູ້ລົງທຶນ ກັບ ສະຖາບັນການສຶກສາຕ່າງໆ ໃນການຝຶກງານຕົວຈິງ ໃນສະຖານປະກອບການ (ໂຮງງານ ແລະ ອຶ່ນໆ) ໃຫ້ຜູ້ພັດທະນາ ຜູ້ລົງທຶນ ມີນະໂຍບາຍຮັບ ນັກສຶກສາ ໄລຍະພັກແລ້ງ ເຂົ້າເຮັດວຽກ ເພື່ອສ້າງຈິດສໍານຶກ ຄວາມມັກຮັກ ແລະ ຄຸ້ນເຄີຍກັບໜ້າວຽກ.
ຂ່າວໂດຍ ສົງການ ພັນແພງດີ
