ຂ່າວຕ່າງປະເທດລາຍງານ ໃນທ້າຍອາທິດຜ່ານມາວ່າ: ທ່ານ ອັນວາ ອິບຣາຮິມ ນາຍົກລັດຖະ ມົນຕີມາເລເຊຍ ໄດ້ເຂົ້າຮ່ວມພິທີເປີດກອງປະຊຸມລັດຖະມົນຕີພະລັງງານອາຊຽນ ຄັ້ງທີ 43 (AMEM-43) ແລະ ບັນດາກອງປະຊຸມທີ່ກ່ຽວຂ້ອງ, ທ່ານກ່າວວ່າ: ການກໍ່ສ້າງຕາຂ່າຍໄຟຟ້າທີ່ເຊື່ອມໂຍງກັນໂດຍຜ່ານໂຄງການຕາຂ່າຍໄຟຟ້າອາຊຽນ (APG) ຈະເພີ່ມທະວີການເຊື່ອມໂຍງລະດັບພາກພື້ນ, ດຶງດູດການລົງທຶນສີຂຽວທີ່ເປັນມິດກັບສິ່ງແວດລ້ອມ, ສ້າງວຽກເຮັດງານທຳທີ່ມີຄຸນນະພາບ ແລະ ຍົກລະດັບອາຊຽນເປັນສູນກາງພະລັງງານສະອາດ.
ທ່ານ ອັນວາ ກ່າວວ່າ: ຄວາມພະຍາຍາມຮ່ວມກັນ ແລະ ຄວາມຕັ້ງໃຈທາງດ້ານການເມືອງຂອງອາຊຽນໃນການປະສານສົມທົບກັບລະບຽບການ, ສະໜອງເງິນທຶນສຳລັບພື້ນຖານໂຄງລ່າງ ແລະ ສ້າງການປົກຄອງທີ່ມີປະສິດທະພາບຈະຊ່ວຍໃຫ້ບັນລຸເປົ້າໝາຍດັ່ງກ່າວ. ທ່ານຮຽກຮ້ອງໃຫ້ບັນດາສະມາຊິກອາຊຽນທັງໝົດ ເພີ່ມທະວີຄວາມມານະພະຍາຍາມຂອງຕົນ, ທັງເລັ່ງດຳເນີນໂຄງການເຊື່ອມຈອດ, ປະສານງານລະບຽບການ ແລະ ລົງເລິກການຮ່ວມມືລະຫວ່າງພາກລັດ ແລະ ເອກະຊົນຢ່າງແໜ້ນແຟ້ນ.
ທ່ານ ອັນວາ ໃຫ້ຂໍ້ສັງເກດວ່າ: ໂຄງການຕາຂ່າຍໄຟຟ້າຂອງອາຊຽນ ໄດ້ລິເລີ່ມຂຶ້ນໃນໄລຍະ 2 ທົດສະວັດຜ່ານມາ ຊຶ່ງສະແດງໃຫ້ເຫັນເຖິງຄຳໝັ້ນສັນຍາຂອງອາຊຽນ ໃນການເຊື່ອມຕໍ່ລະບົບຕາຂ່າຍໄຟຟ້າ, ການແບ່ງປັນຊັບພະຍາກອນ ແລະ ເສີມສ້າງຄວາມເຂັ້ມແຂງໂດຍຜ່ານການເພິ່ງພາກັນ ຊຶ່ງຈະຊ່ວຍໃຫ້ອາຊຽນສາມາດໝູນໃຊ້ທ່າແຮງດ້ານພະລັງງານໝູນວຽນ, ຫຼຸດຜ່ອນການເພິ່ງພາອາໄສເຊື້ອໄຟຟອສຊິລ ແລະ ສະໜອງໄຟຟ້າຂ້າມຊາຍແດນໃນລາຄາທີ່ເປັນມິດ ແລະ ເຊື່ອຖືໄດ້.
ພູມສັນຖານດ້ານພະລັງງານຂອງໂລກກໍາລັງປ່ຽນແປງ ພາຍໃຕ້ຄວາມກົດດັນຈາກການຫຼຸດການປ່ອຍກາກບອນ, ຄວາມໝັ້ນຄົງດ້ານການສະໜອງ ແລະ ຄວາມສາມາດເຂົ້າເຖິງພະລັງງານໃນລາຄາທີ່ ເໝາະສົມ. ການຫັນປ່ຽນຄັ້ງນີ້ຂອງອາຊຽນ ຊຶ່ງມີປະຊາກອນ 680 ລ້ານຄົນ ແລະ ເປັນໜຶ່ງໃນພາກພື້ນທີ່ເສດຖະກິດເຕີບໂຕໄວທີ່ສຸດໃນພາກພື້ນ ຈຶ່ງຕ້ອງມີຄວາມຮັບຜິດຊອບ ແລະ ຄວາມສາມັກຄີ.
