ກະຊວງເຕັກໂນໂລຊີ ແລະ ການສື່ສານ ຈັດພິທີເປີດງານ ສັບປະດາດິຈິຕອນລາວ 2025 ຂຶ້ນ ໃນວັນທີ 2-6 ເມສາ 2025 ທີ່ຫໍປະຊຸມແຫ່ງຊາດ ໃຫ້ກຽດເຂົ້າຮ່ວມໃນພິທີໂດຍທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ມີທ່ານ ປະເສີດ ຈັນທະຣະຣວງທອງ ຮອງນາຍົກລັດຖະມົນຕີ ລັດຖະມົນຕີ ກະຊວງດິຈິຕອນເພື່ອເສດຖະກິດ ແລະ ສັງຄົມ ແຫ່ງຣາຊະອານາຈັກໄທ ທ່ານ ບັນດິດ ສຈ. ບໍ່ວຽງຄໍາ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ບັນດາລັດຖະມົນຕີ ຮອງລັດຖະມົນຕີ ບັນດາທ່ານເຈົ້າແຂວງ ຮອງເຈົ້າແຂວງ ເຈົ້ານະຄອນ ພ້ອມດ້ວຍພະນັກງານວິຊາການຕະຫຼອດນັກຮຽນ-ນັກສຶກສາ.
ໃນພິທີທ່ານ ບັນດິດ ສຈ. ບໍ່ວຽງຄໍາ ວົງດາລາ ໄດ້ກ່າວວ່າ: ງານສັບປະດາດິຈິຕອນ 2025 ເລີ່ມແຕ່ ວັນທີ 02-06 ເມສາ ພາຍໃຕ້ຄໍາຂວັນ “ພັດທະນາໂຄງລ່າງພື້ນຖານດິຈິຕອນ ຂອງ ສປປ ລາວ ໃຫ້ເຂັ້ມແຂງ ແລະ ຍືນຍົງ” ເຊິ່ງງານດັ່ງກ່າວ ຈະເປັນເວທີແລກປ່ຽນ ແລະ ເປີດໂອກາດໃຫ້ບັນດາ ຜູ້ປະກອບການ ນັກຮຽນ ນັກສຶກສາ ນັກວິຊາການດ້ານເຕັກໂນໂລຊີ ໂທລະຄົມ ແລະ ຄວາມປອດໄພໄຊເບີ ໄດ້ມາສະແດງທັດສະນະແລກປ່ຽນຄຳຄິດຄຳເຫັນ ແລະ ວາງສະແດງຜະລິດຕະພັນ ແລກປ່ຽນຄວາມຮູ້ ປະສົບການ ໃນການພັດທະນາເຕັກໂນໂລຊີດິຈິຕອນ ເພື່ອນໍາໄປຜັນຂະຫຍາຍທຸລະກິດ ແລະ ວຽກງານຂອງຕົນ.
ງານສັປປະດາດິຈິຕອນລາວ 2025 ຄັ້ງນີ້ ເປັນງານທີ່ມີຫຼາຍສີສັນ ແລະ ຫຼາຍກິດຈະກໍາທີ່ສໍາຄັນ ເປັນຕົ້ນແມ່ນ: ກອງປະຊຸມສໍາມະນາ ພະນັກງານການນໍາລະດັບສູງກ່ຽວກັບການຫັນເປັນດິຈິຕອນ ຂອງ ສປປ ລາວ ເຊິ່ງຈະໄດ້ຮັບຟັງບົດຮຽນການຫັນເປັນດິຈິຕອນ ຢູ່ ສປ ຈີນ ສສ ຫວຽດນາມ ຣາຊະອານາຈັກ ກໍາປູເຈຍ ແລະ ບາງປະເທດ ອາຊຽນ ໃນກອງປະຊຸມດັ່ງກ່າວ ຈະໄດ້ແລກປ່ຽນຄໍາຄິດຄໍາເຫັນກ່ຽວກັບການຫັນເປັນດິຈິຕອນ ຢູ່ປະເທດເຮົາ ແລະ ຮັບຟັງການໂອ້ລົມຂອງ ນາຍົກລັດຖະມົນຕີ ແຫ່ງ ສປປ ລາວ ເວທີສໍາມະນາ ແລະ ການເຝິກອົບຮົມ: ເປັນເວທີຖ່າຍທອດ ແລະ ແລກປ່ຽນຄວາມຮູ້ດ້ານດິຈິຕອນ ໂດຍມີບັນດາທ່ານ ລັດຖະມົນຕີ ຮອງລັດຖະມົນຕີ ແລະ ມີບັນດານັກວິທະຍາກອນທີ່ມີຄວາມຊຳນານ ແລະ ປະສົບການສູງທັງພາຍໃນ ແລະ ຕ່າງປະເທດເປັນຜູ້ບັນລະຍາຍ ໃນຫົວຂໍ້ຕ່າງໆ ໂດຍສະເພາະເຕັກໂນໂລຊີປັນຍາປະດິດ AI ແລະ ຫຸ່ນຍົນ Robotic. ການເຝິກອົບຮົມ ແລະ ສໍາມະນາດັ່ງກ່າວຈະເປີດໂອກາດໃຫ້ທຸກພາກສ່ວນໄດ້ເຂົ້າຮ່ວມ ໂດຍບໍ່ເສຍຄ່າໃຊ້ຈ່າຍໃດໆ ການວາງສະແດງສິນຄ້າ ແລະ ນະວັດຕະກໍາ ທາງດ້ານດິຈິຕອນ: ມີບັນດາໜ່ວຍງານຈາກພາກລັດ ເອກະຊົນ ກຸ່ມນັກທູລະກິດ ຂະໜາດນ້ອຍ ຂະໜາດກາງ ແລະ ບໍລິສັດຫ້າງຮ້ານຕ່າງໆ ທັງພາຍໃນ ແລະ ຕ່າງປະເທດເຂົ້າຮ່ວມຫຼາຍກວ່າ 100 ບູດ ເພື່ອວາງສະແດງຜະລິດຕະພັນ ແລະ ສິນຄ້າຂອງຕົນ ເຊັ່ນ: ເຕັກໂນໂລຊີ ປັນຍາປະດິດ AI ກຸ່ມຂໍ້ມູນຜູກພັນ ອິນເຕີເນັດແຫ່ງຊາດ ລວມເຖິງ Cloud Computing ຄວາມປອດໄພທາງໄຊເບີ ຜະລິດຕະພັນຄອມພິວເຕີຕ່າງໆ ຊອຟແວ ແລະ ອື່ນໆ. ນອກຈາກນີ້ກໍຍັງຈະໄດ້ນໍາສະເໜີການເປີດຕົວຫຼຸດລາຄາສິນຄ້າຢ່າງຫຼວງຫຼາຍ ແລະ ຈັບສະຫຼາກລຸ້ນຮັບລາງວັນ ຈາກບັນດາບໍລິສັດຕ່າງໆ ການແຂ່ງຂັນ ລາງວັນ ICT Hackathone ແລະ Makerthon: ຈະເປັນເວທີ່ສໍາຄັນທີ່ສຸດຂອງ ສປປ ລາວ ໃນການຄັດເລືອກ ຜະລິດຕະພັນຂອງຄົນລາວ ທີ່ດີເດັ່ນທາງດ້ານດິຈິຕອນ ເພື່ອເຂົ້າແຂ່ງຂັນໃນເວລາທີສາກົນ ໂດຍສະເພາະການແຂ່ງຂັນປະຈໍາປີລະດັບພາກພື້ນ.
ພ້ອມນັ້ນ ກໍມີການແຂ່ງຂັນ ຂຽນໂປຣແກຣມ ຫຼື ຄວາມສາມາດຂອງນັກປະດິດຄົນລາວ ໃນງານສັບປະດາດິຈິຕອນຄັ້ງນີ້ ກະຊວງເຕັກໂນໂລຊີ ແລະ ການສື່ສານ ຈະໄດ້ຈັດກອງປະຊຸມພົບປະສອງຝ່າຍ ກັບບັນດາປະເທດຮ່ວມຄູ່ພັດທະນາຈາກ ສປ ຈີນ ສສ ຫວຽດນາມ ຣາຊະອານາຈັກ ກໍາປູເຈຍ ຣາຊະອານາຈັກໄທ ເພື່ອປຶກສາຫາລືກ່ຽວກັບການຮ່ວມມືພັດທະນາເຕັກໂນໂລຊີດິຈິຕອນ ສໍາລັບປະເທດລາວ ໃນໂອກາດງານຄັ້ງນີ້ ກະຊວງເຕັກໂນໂລຊີ ແລະ ການສື່ສານ ກໍໄດ້ເຊື້ອເຊີນບັນດາການນໍາຂອງບັນດາຂະແໜງການ ແລະ ທ້ອງຖິ່ນ ພ້ອມດ້ວຍບັນດາ ພະແນກເຕັກໂນໂລຊີ ແລະ ການສື່ສານຂອງທຸກແຂວງເຂົ້າຮ່ວມກອງປະຊຸມວຽກງານເຕັກໂນໂລຊີ ແລະ ການສື່ສານ ແລະ ກິດຈະກໍາອື່ນໆ ອີກ.
