ສປປ ລາວ ໄດ້ຮັບກຽດເປັນເຈົ້າພາບ ຈັດການແຂ່ງຂັນກິລາດຶງເຊືອກສາກົນ ເປີດກວ້າງລະດັບອາຊຽນ ປະຈໍາປີ 2025 ງານນີ້ຈະມີ ສປປ ລາວ ເຈົ້າພາບ, ມາເລເຊຍ, ບຣູໄນ, ໄທ, ຫວຽດນາມ, ຍີ່ປຸ່ນ, ຟິລິບປິນ ແລະ ມຽນມາ ແຈ້ງເຈດຈໍານົງເຂົ້າຮ່ວມຊີງໄຊ ຈະຈັດຂຶ້ນ ລະຫວ່າງວັນທີ 21-22 ກຸມພາ 2025 ທີ່ໂຮງແຮມດອນຈັນ ພາເລດ ນະຄອນຫຼວງວຽງຈັນ.
ເມື່ອວັນທີ 17 ມັງກອນ 2025 ທີ່ຫ້ອງປະຊຸມ ມສ ວຽງຈັນ ໄດ້ມີພິທີຖະແຫຼງຂ່າວກຽມຈັດການແຂ່ງຂັນກິລາດຶງເຊືອກສາກົນ ເປີດກວ້າງລະດັບອາຊຽນ ປະຈໍາປີ 2025 ໃຫ້ກຽດເຂົ້າຮ່ວມໂດຍ ທ່ານ ອາລຸນແກ້ວ ກິດຕິຄຸນ ປະທານສະຫະພັນກິລາດຶງເຊືອກແຫ່ງຊາດລາວ, ທ່ານ ອຸໄທ ບັນນາວົງ ຮອງປະທານສະຫະພັນດຶງເຊືອກແຫ່ງຊາດລາວ ແລະ ທ່ານ ສຸຊາດ ແຈສຸຣະພາບ ປະທານທີ່ປຶກສາ ສະຫະພັນກີລາດຶງເຊືອກແຫ່ງຊາດລາວ ທັງເປັນຮອງປະທານສະຫະພັນກິລາດຶງເຊືອກແຫ່ງປະເທດໄທ ພ້ອມດ້ວຍຄະນະ, ຄູຝຶກ ແລະ ນັກກິລາເຂົ້າຮ່ວມຢ່າງພ້ອມພຽງ.
ໂອກາດນີ້, ທ່ານ ອາລຸນແກ້ວ ກິດຕິຄຸນ ກ່າວວ່າ: ສະຫະພັນກິລາດຶງເຊືອກແຫ່ງຊາດລາວ ກໍຄື ສປປ ລາວ ໄດ້ຮັບກຽດເປັນເຈົ້າພາບຈັດການແຂ່ງຂັນກິລາ ດຶງເຊືອກສາກົນ ເປີດກວ້າງລະດັບອາຊຽນ ປະຈໍາປີ 2025 ຊຶ່ງເປັນລາຍການຄັ້ງປະຫວັດສາດຂອງຊາດລາວ ຈະໄດ້ຈັດຂຶ້ນລະຫວ່າງວັນທີ 21-22 ກຸມພາ 2025 ໂດຍພວກເຮົາຄະນະໄດ້ຕົກລົງກັນຈະຈັດຢູ່ທີ່ໂຮງແຮມດອນຈັນພາເລດ ໂດຍມີການແຂ່ງຂັນທັງໝົດ 3 ຮຸ່ນ ຄື: ທີມຍິງ, ທີມຊາຍ ແລະ ທີມປະສົມຍິງ-ຊາຍ ເພື່ອໃຫ້ຊາວລາວ ແລະ ຊາວຕ່າງປະເທດໄດ້ເຂົ້າໄປສໍາຜັດກັບການແຂ່ງຂັນໃຫ້ຫຼາຍຂຶ້ນ ພິເສດພາຍໃນງານຈະເປີດໃຫ້ເຂົ້າຊົມຟຣີ ແລະ ມີອາຫານຫວ່າງໃຫ້ຜູ້ຊົມອີກດ້ວຍ. ນອກນັ້ນ ຍັງມີຂ່າວດີເພາະໃນຕອນເຊົ້າຂອງວັນທີ 20 ກຸມພາ 2025 ຈະມີພິທີປະຊຸມເຕັກນິກ ຊຶ່ງໃນພິທີຈະມີການປະກາດປະທານສະຫະພັນກິລາດຶງເຊືອກແຫ່ງອາຊຽນຄົນໃໝ່ ເພາະປະທານຜູ້ເກົ່າແມ່ນຈະໝົດວາລະ ໂດຍເລືອກຂ້າພະເຈົ້າ ທ່ານ ອາລຸນແກ້ວ ກິດຕິຄຸນ ເປັນປະທານຄົນໃໝ່.
ຂະນະດຽວກັນ, ທ່ານ ສຸຊາດ ແຈສຸຣະພາບ ກ່າວວ່າ: ຍິນດີທີ່ມາຈັດການແຂ່ງຂັນລາຍການລະດັບອາຊຽນ ແລະ ພິເສດຈະມີທີມຈາກຍີ່ປຸຸ່ນ ມາເຂົ້າຮ່ວມແຂ່ງຂັນໃນຄັ້ງນີ້ ເຊື່ອວ່າຈະສາມາດພັດທະນາກິລາດິງເຊືອກອາຊຽນໄປອີກຂັ້ນ ໂດຍສະເພາະຈະເປັນການພັດທະນາບຸຄະລະກອນ, ນັກກິລາ, ຄູຝຶກ ແລະ ກໍາມະການໃນ ສປປ ລາວ ຜ່ານການຈັດການແຂ່ງຂັນຄັ້ງນີ້ ເພື່ອຕໍ່ຍອດໄປຈັດໃນຄັ້ງຕໍ່ໆໄປໄດ້ຕາມມາດຖານທີ່ໄດ້ກຳນົດໄວ້.
ຂ່າວ-ພາບໂດຍ ສົງການ ພັນແພງດີ
