ໃນວັນທີ 20 ມັງກອນ ນີ້, ການນຳກະຊວງປ້ອງກັນປະເທດ ວາງພວງມາລາຢູ່ອານຸສາວະລີນັກຮົບນິລະນາມ, ສຸສານນັກຮົບປະຕິວັດ (ຫຼັກ 24) ແລະ ວາງກະຕ່າດອກໄມ້ຢູ່ຕໍ່ໜ້າຮູບປັ້ນ ປະທານ ໄກສອນ ພົມວິຫານ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ (20 ມັງກອນ 1949 – 20 ມັງກອນ 2025) ຊຶ່ງນຳໂດຍ ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ ລັດຖະມົນຕີກະຊວງປ້ອງກັນປະເທດ, ມີບັນດາຄະນະນຳກະຊວງປ້ອງກັນປະເທດເຂົ້າຮ່ວມ.
ການວາງພວງມາລາ ແລະ ກະຕ່າດອກໄມ້ຢູ່ແຕ່ລະບ່ອນໃນຄັ້ງນີ້ ກໍເພື່ອເປັນການສະແດງເຖິງຄວາມກະຕັນຍູຮູ້ບຸນຄຸນ-ຄຸນງາມຄວາມດີ ຂອງປະທານ ໄກສອນ ພົມວິຫານ ຜູ້ນຳປະຕິວັດທີ່ແສນເຄົາລົບຮັກຂອງປະຊາຊົນລາວທີ່ໄດ້ນຳພາປົດປ່ອຍປະເທດຊາດ, ຜູ້ສ້າງຕັ້ງ ແລະ ນຳພາກອງທັບປະຊາຊົນລາວ ໃຫ້ເຕີບໃຫຍ່ເຂັ້ມແຂງ ແລະ ທັງເປັນການໄຫວ້ອາໄລເຖິງດວງວິນຍານ, ຄຸນງາມຄວາມດີຂອງພະນັກງານ-ນັກຮົບປະຕິວັດ ທີ່ເສຍສະຫຼະຊີວິດເລືອດເນື້ອເຂົ້າໃນພາລະກິດປະຕິວັດ ໃນການຕໍ່ສູ້ກູ້ຊາດ ເພື່ອປົກປັກຮັກສາເຂດນ້ຳແດນດິນ, ປິຕິພູມທີ່ແສນຮັກຂອງຕົນດ້ວຍຄວາມອົງອາດກ້າຫານ, ເດັດດ່ຽວໜຽວແໜ້ນບໍ່ຍອມຈຳນົນຍາດໄດ້ເອກະລາດ, ອິດສະຫຼະພາບໃຫ້ແກ່ປະເທດຊາດ ແລະ ນຳເອົາຄວາມຢູ່ເຢັນເປັນສຸກມາໃຫ້ແກ່ປະຊາຊົນລາວບັນດາເຜົ່າ.
(ຂ່າວ-ພາບ: ໜັງສືພິມກອງທັບ)
