ແຫລ່ງຂ່າວຈາກ ແຂວງຫລວງນ້ຳທາ ໃຫ້ຮູ້ວ່າ: ແຂວງຫລວງນໍ້າທາ ປະກາດຮັບຮອງເປັນແຂວງຍຸດຕິການຖ່າຍຊະຊາຍ ໃນວັນທີ 17 ມັງກອນ 2025 ໂດຍການເຂົ້າຮ່ວມຂອງ ທ່ານ ດຣ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ທ່ານ ວຽງສະຫວັດ ສີພັນດອນ ເຈົ້າແຂວງໆຫລວງນໍ້າທາ ພ້ອມດ້ວຍຜູ້ຕາງໜ້າຈາກບັນດາແຂວງ, ພະແນກການ, ພະນັກງານ, ທະຫານ, ຕຳຫລວດ ແລະ ປະຊາຊົນເຂົ້າຮ່ວມ.
ທ່ານ ວຽງສະຫວັດ ສີພັນດອນ ໄດ້ກ່າວວ່າ: ພັກ ແລະ ລັດຖະບານ ຍາມໃດກໍໄດ້ຖືສໍາຄັນເປັນຫ່ວງເປັນໄຍຕໍ່ກັບ ບັນຫາສຸຂະພາບ ແລະ ການດໍາລົງຊີວິດ ຂອງປະຊາຊົນບັນດາເຜົ່າ ໂດຍຖືເອົາວຽກງານອະນາໄມກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍ ໂດຍເນັ້ນໃສ່ວຽກງານສຸຂະພາບຈະເລີນພັນແມ່ ແລະ ເດັກ, ໂພຊະນາການ, ສ້າງບ້ານສາທາລະນະສຸກແບບຢ່າງ, ໜຶ່ງໃນກິດຈະກໍາທີ່ສໍາຄັນແມ່ນການຫັນມາຊົມໃຊ້ນໍ້າສະອາດ, ການຊົມໃຊ້ວິດຖ່າຍ ໄປພ້ອມກັບການບໍລິການສາທາລະນະສຸກໃຫ້ທົ່ວເຖິງ ເພື່ອປະກອບສ່ວນ ໃນການບັນລຸເປົ້າໜາຍ ການພັດທະນາແບບຍືນຍົງ ແລະ ການລຶບລ້າງຄວາມທຸກຍາກ ຂອງປະຊາຊົນຫລຸດລົງເທື່ອລະກ້າວ. ສະນັ້ນ, ຄະນະນໍາຂອງແຂວງ ໂດຍສະເພາະ ຂະແໜງສາທາລະນະສຸກແຕ່ລະຂັ້ນ ໄດ້ເປັນເຈົ້າການປະສານສົມທົບ ກັບພາກສ່ວນທີ່ກ່ຽວຂ້ອງ ລົງສຶກສາອົບຮົມ, ປຸກລະດົມອົງການປົກຄອງບ້ານ ແລະ ປະຊາຊົນບັນດາເຜົ່າ ເປັນເຈົ້າການຈັດຕັ້ງປະຕິບັດ ວຽກງານກໍ່ສ້າງວິດຖ່າຍ ຢູ່ພາຍໃນຄອບຄົວຂອງຕົນເອງ ຈົນສາມາດປະກາດບ້ານຢຸດຕິການຖ່າຍຊະຊາຍ ຢູ່ທຸກບ້ານພາຍໃນແຂວງ, ເຊິ່ງນສໍາເລັດດັ່ງກ່າວ ແມ່ນໄດ້ປະກອບສ່ວນອັນສໍາຄັນ ເຂົ້າໃນການພັດທະນາ ເສດຖະກິດ-ສັງຄົມຂອງແຂວງ, ເມືອງ, ບ້ານ, ການພັດທະນາ ຄົວເຮືອນ ແລະ ເຮັດໃຫ້ຄອບຄົວຫລຸດພົ້ນ ອອກຈາກຄວາມທຸກຍາກເທື່ອລະກ້າວ.
ທ່ານ ຕຽງສະໜອນ ພອນປະເສີດ ຫົວໜ້າພະແນກສາທາລະນະສຸກ ແຂວງຫລວງນ້ຳທາ ໄດ້ຍົກໃຫ້ເຫັນເຖິງຄວາມສຳຄັນ ຂອງວຽກງານຊຸມຊົນເປັນເຈົ້າການ ດ້ານສຸຂະອະນາໄມ (ຊຈສ) ເພື່ອຢຸດຕິການຖ່າຍຊະຊາຍ ເຊິ່ງໃນປີ 2008-2010, ສູນອະນາໄມສິ່ງແວດລ້ອມ ແລະ ຈັດຫານໍ້າສະອາດ ໂດຍການຮ່ວມມືກັບອົງການນໍ້າ ແລະ ອະນາໄມ ຂອງທະນາຄານໂລກ (WSP) ໄດ້ທົດລອງຈັດຕັ້ງປະຕິບັດຢູ່ແຂວງຈໍາປາສັກ ແລະ ແຂວງເຊກອງ. ຮອດປີ 2013 ສູນນໍ້າສະອາດ ແລະ ອະນາໄມສິ່ງແວດລ້ອມ ກະຊວງສາທາລະນະສຸກ ໄດ້ຮ່ວມມືກັບອົງການຈັດຕັ້ງສາກົນຕ່າງໆ ພັດທະນາຄູ່ມື ເພື່ອເປັນບ່ອນອີງແກ່ທົ່ວປະເທດ ໃນການຈັດຕັ້ງປະຕິບັດ ພ້ອມທັງຈັດຝຶກອົບຮົມການນຳໃຊ້ຢ່າງກວ້າງຂວາງ ຢູ່ ສປປ ລາວ ໃນການດໍາລົງຊີວິດ ໂດຍສະເພາະ ການຖ່າຍໃສ່ວິດ ເຊິ່ງເປັນການຕັດຕ່ອງໂສ້ ເສັ້ນທາງຕິດຕໍ່ຂອງເຊື້ອພະຍາດຕ່າງໆ ເຊັ່ນ: ພະຍາດຖອກທ້ອງ, ແມ່ກາຝາກ, ໂປລີໂອ (ເປ້ຍລ່ອຍ), ພະຍາດອະຫິວາ, ການຂາດສານອາຫານໃນເດັກ ແລະ ພະຍາດອື່ນໆ. ສາມາດເຮັດໃຫ້ສະພາບການເຈັບເປັນຂອງປະຊາຊົນ ຫລຸດຜ່ອນລົງເທື່ອລະກ້າວ. ສໍາລັບແຂວງຫລວງນໍ້າທາ ໄດ້ເລີ່ມຈັດຕັ້ງປະຕິບັດໃນປີ 2016 ຢູ່ເມືອງວຽງພູຄາ 46 ບ້ານ, ຮອດຕົ້ນປີ 2019 ສາມາດປະກາດຮັບຮອງ ໄດ້ 10 ບ້ານ ເທົ່າກັບ 21,7% ຂອງຈໍານວນບ້ານພາຍໃນເມືອງ. ໃນທ້າຍປີ 2019 ທ່ານຮອງເຈົ້າແຂວງ ໄດ້ເຂົ້າຮ່ວມກອງປະຊຸມວຽກງານ ຊຈສ ແລະ ໄດ້ເຊັນຮັບຮອງເອົາແຜນການສ້າງ ແລະ ປະກາດຮັບແຂວງຫລວງນໍ້າທາ ເປັນແຂວງຢຸດຕິການຖ່າຍຊະຊາຍ ຮ່ວມກັບບັນດາແຂວງໃນຂອບເຂດທົ່ວປະເທດ. ປີ 2020 ປະກາດໄດ້ 21 ບ້ານ ກວມ 6%; ຮອດປີ 2021 ປະກາດໄດ້ 158 ບ້ານ ກວມ 45%; ຮອດປີ 2022 ປະກາດໄດ້ 285 ບ້ານ ກວມ 81,19%; ຮອດປີ 2023 ປະກາດໄດ້ 319 ບ້ານ ກວມ 90,88% ມາເຖິງປີ 2024 ປະກາດໄດ້ 351 ບ້ານ ກວມ 100% ຂອງຈໍານວນບ້ານທັງໝົດ ສາມາດປະກາດ ແລະ ຮັບຮອງເອົາບັນດາເມືອງທັງ 5 ເມືອງຂອງແຂວງເປັນເມືອງຢຸດຕິການຖ່າຍຊະຊາຍ ໃນກາງເດືອນ ພະຈິກ 2024.
ໃນພິທີ ຍັງໄດ້ມີການມອບໃບຍ້ອງຍໍໃຫ້ກົມກອງດີເດັ່ນ 16 ກົມກອງ ແລະ ບຸກຄົນດີເດັ່ນ 49 ທ່ານ ທີ່ໄດ້ປະກອບສ່ວນ ວຽກງານຊຸມຊົນເປັນເຈົ້າການ ດ້ານສຸຂະອະນາໄມ ເພື່ອຍຸດຕິການຖ່າຍຊະຊາຍ ຕື່ມອີກ.
ຂ່າວ: ແກ້ວ
