ວິທະຍຸກະຈາຍສຽງຫວຽດນາມລາຍງານວ່າ: ໃນການຢ້ຽມຢາມ ຫວຽດນາມ ຢ່າງເປັນທາງການ ຂອງທ່ານ ມິຄາອິລ ມິຊູສຕິນ (Mikhail Mishustin) ນາຍົກລົດຖະມົນຕີ ຣັດເຊຍ (ແຕ່ວັນທີ 14 – 15 ມັງກອນ 2025), ໃນວັນທີ 15 ມັງກອນ ຜ່ານມາ ຢູ່ນະຄອນຫຼວງຮ່າໂນ້ຍ ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ແລະ ທ່ານ ມິຄາອິລ ມິຊູສຕິນ ນາຍົກລັດຖະມົນຕີ ຣັດເຊຍ ໄດ້ເປັນປະທານກອງປະຊຸມສົນທະນາວິສາຫະກິດຂັ້ນສູງ ຫວຽດນາມ – ສະຫະພັນ ຣັດເຊຍ ດ້ວຍຫົວຂໍ້ “ພັດທະນາການຄ້າ – ການລົງທຶນ, ພະລັງງານ ແລະ ການຂົນສົ່ງ ຫວຽດນາມ – ສະຫະພັນ ຣັດເຊຍ ແບບຍືນຍົງ.
ຂ່າວລະບຸວ່າ: ນາຍົກລັດຖະມົນຕີສອງທ່ານໄດ້ຮັບຟັງ ແລະ ຕອບບັນດາຄຳຖາມຂອງວິສາຫະກິດສອງປະເທດ, ສະແດງຄວາມເອົາໃຈໃສ່ເປັນພິເສດ ແລະ ໃຫ້ຄຳໝັ້ນສັນຍາໃນການແກ້ໄຂບັນດາຮົ້ວກີດຂວາງ, ຊຸກຍູ້ການພົວພັນຮ່ວມມືລະຫວ່າງປະຊາຄົມວິສາຫະກິດສອງຝ່າຍ.
ກ່າວຄຳເຫັນສະຫຼຸບ, ທ່ານ ຟ້າມມິງຈິງ ສະເໜີໃຫ້ສອງຝ່າຍ ຊຸກຍູ້ການຫັນຜະລິດຕະພັນ, ລະບົບສະໜອງ, ຕະຫຼາດເປັນຫຼາຍຮູບຫຼາຍແບບເພື່ອໃຫ້ມີສິນຄ້າຫຼາຍປະເພດໄດ້ແລກປ່ຽນຄ້າ – ຂາຍຢູ່ຕະຫຼາດຂອງກັນ.
ໃນຕອນເຊົ້າວັນດຽວກັນ ຢູ່ນະຄອນຫຼວງຮ່າໂນ້ຍ, ທ່ານ ຟ້າມມິງຈິງ ແລະ ທ່ານ ມິຄາອິລ ມິຊູສຕິນ ໄດ້ເຂົ້າຮ່ວມຮັບຊົມລາຍການສະແດງສິລະປະ ສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ – ຣັດເຊຍ.
