ວັນທີ 13 ມັງກອນ 2025 ສູນກາງຊາວໜຸ່ມປະຊາຊົນປະຕິວັດລາວ (ສຊປລ) ຮ່ວມກັບ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ມະຫາວິທະຍາໄລແຫ່ງຊາດ, ໜ່ວຍກູ້ໄພ ມູນນິທິຊ່ວຍເຫຼືອຄົນທຸກຍາກແຫ່ງ ສປປ ລາວ ແລະ ອົງການຢູນີເຊັບ ປະຈຳ ສປປ ລາວ ໄດ້ເປີດການຝຶກອົບຮົມອາສາສະໝັກສິນໄຊ ຊ່ວຍເຫດສຸກເສີນ ເພື່ອສົ່ງເສີມທັກສະໃຫ້ກັບອາສາສະໝັກໄວໜຸ່ມ ຢູ່ແຂວງຫຼວງນ້ຳທາ ເພື່ອຕອບສະໜອງຕໍ່ກັບໄພພິບັດທີ່ເກີດຈາກດິນຟ້າອາກາດໃຫ້ມີປະສິດທິພາບຫຼາຍຂຶ້ນ.
ແຂວງຫຼວງນ້ຳທາ ເປັນໜຶ່ງໃນແຂວງທີ່ໄດ້ຮັບຜົນກະທົບໜັກໜ່ວງທີ່ສຸດຈາກພາຍຸໄຕ້ຝຸ່ນຢາກິ ໃນປີທີ່ຜ່ານມາ ເຊິ່ງສົ່ງຜົນກະທົບຕໍ່ປະຊາຊົນຫຼາຍກວ່າ 250,000 ຄົນໃນທົ່ວປະເທດ. ການຝຶກອົບຮົມດັ່ງກ່າວຈະສ້າງຄວາມອາດສາມາດໃຫ້ແກ່ອາສາສະໝັກ 31 ຄົນຈາກ 5 ເມືອງທີ່ມີຄວາມສ່ຽງສູງ ໂດຍຜ່ານຄໍາແນະນໍາການກະກຽມພ້ອມຮັບມືກັບໄພພິບັດ, ການປະຖົມພະຍາບານເບື້ອງຕົ້ນ ແລະ ການຊ່ວຍເຫຼືອດ້ານສຸຂະພາບຈິດ. ຫຼັງຈາກນັ້ນ, ອາສາສະໝັກຈະສືບຕໍ່ດໍາເນີນກິດຈະກໍາເຜີຍແຜ່ໃຫ້ຊຸມຊົນທີ່ມີເຖິງ 1,200 ກວ່າຄົນ.
ທ່ານ ນວນທອງ ສຸວັນວິໄຊ, ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ໄດ້ກ່າວວ່າ: “ການເສີມສ້າງທັກສະໃນການຮັບມືກັບໄພພິບັດ ແລະ ການປັບຕົວເຂົ້າກັບດິນຟ້າອາກາດໃຫ້ແກ່ໄວໜຸ່ມຂອງພວກເຮົາຈະຊ່ວຍໃຫ້ຊຸມຊົນມີຄວາມເຂັ້ມແຂງ ແລະ ແຂງແຮງຂຶ້ນ.”
ກອງປະຊຸມດັ່ງກ່າວ, ນຳໂດຍ ສູນກາງຊາວໜຸ່ມປະຕິວັດປະຊາຊົນລາວ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ແລະ ໜ່ວຍກູ້ໄພມູນນິທິຊ່ວຍເຫຼືອຄົນທຸກຍາກແຫ່ງ ສປປ ລາວ, ໄດ້ສາທິດການຝຶກຊ້ອມການບັນເທົາໃນທຸກໄພພິບັດ ແລະ ສະຫຼຸບດ້ວຍກິດຈະກຳປູກຈິດສຳນຶກໃນໂຮງຮຽນທ້ອງຖິ່ນ ແລະ ຊຸມຊົນ.
“ການຮ່ວມມືນີ້ເນັ້ນໜັກເຖິງບົດບາດສຳຄັນຂອງຊາວໜຸ່ມໃນການແກ້ໄຂບັນຫາການປ່ຽນແປງຂອງສະພາບດິນຟ້າອາກາດ” ກ່າວໂດຍ ທ່ານ ໄຊມ້ອນ ນາເຊີ, ຫົວໜ້າພະແນກສື່ສານ ແລະ ໂຄສະນາ ຂອງ ອົງການຢູນີເຊັບ ປະຈຳ ສປປ ລາວ.
“ໂດຍການຈັດການຝຶກອົບຮົມພາກປະຕິບັດໃຫ້ແກ່ພວກເຂົາ ຈຶ່ງຊ່ວຍໃຫ້ພວກເຮົາໝັ້ນໃຈໄດ້ວ່າ ໄວໜຸ່ມມີບົດບາດສຳຄັນທີ່ສາມາດເປັນຜູ້ນຳໄດ້ເມື່ອຊຸມຊົນຮຽກຮ້ອງຕ້ອງການ.”
ນີ້ແມ່ນກໍ່ແມ່ນໝາກຜົນອັນລວມຍອດຕໍ່ການສ້າງຄວາມພະຍາຍາມໃນໂຄງການສິນໄຊກ່ອນໜ້ານີ້, ລວມມີໂຄງການ UPSHIFT ແລະ ໂຄງການ ອາສາສະໝັັກໄວໜຸ່ມ Youth Champions ເຊິ່ງໂຄງການດັ່ງກ່າວ ມີຈຸດປະສົງເພື່ອຊຸກຍູ້ການປະດິດສ້າງທີ່ນໍາພາໂດຍໄວໜຸ່ມ ແລະ ການໂຄສະນາ ເພື່ອແກ້ໄຂສິ່ງທ້າທາຍດ້ານສະພາບດິນຟ້າອາກາດ. ນອກຈາກນັ້ນ, ອົງການຢູນີເຊັບ ຍັງໄດ້ສ້າງຕັ້ງສະຖານທີ່ເປັນມິດກັບເດັກ 4 ແຫ່ງ ຢູ່ແຂວງຫຼວງນໍ້າທາ ໃນປີທີ່ຜ່ານມານີ້, ໂດຍຮ່ວມມືກັບສະຫະພັນແມ່ຍິງລາວ ແລະ ໄດ້ຮັບການສະໜັບສະໜູນຈາກອົງການ USAID ແລະ ລັດຖະບານອົດສະຕຣາລີ, ຊຸກຍູ້ຄວາມເຂັ້ມແຂງ ແລະ ການຟື້ນຟູຊຸມຊົນຕື່ມອີກ.
