ໃນວັນທີ 14 ມັງກອນ 2025 ທີ່ ໂຮງແຮມ ຄຣາວ ພຣາຊ່າ, ນະຄອນຫຼວງວຽງຈັນ ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ກະຊວງຍຸຕິທຳ. ຕາງໜ້າໂດຍ ກົມຮ່ວມມືສາກົນ ແລະ ມູນນິທິເອເຊຍ ປະຈໍາ ສປປ ລາວ ພາຍໃຕ້ “ໂຄງ ການສົ່ງເສີມການເຂົ້າເຖິງກົດໝາຍ ແລະ ຄວາມຍຸຕິທໍາ ຂອງປະຊາຊົນໃນ ສປປ ລາວ ໄລຍະທີ 2 ” ໂດຍການເປັນປະທານຮ່ວມຂອງ ທ່ານ ເກດສະໜາ ພົມມະຈັນ, ຮອງລັດຖະມົນຕີ ກະຊວງຍຸຕິທຳ ແລະ ທ່ານ ນາງ ແຮັດເຕີ ວາເຣຍອາວາ (Heather Variava) ເອກອັກຄະລັດຖະທູດສະຫະລັດອາເມລິກາ ປະຈໍາ ສປປ ລາວ, ມີຕາງຫນ້າກະຊວງຍຸຕິທໍາ, ມູນ ນິທິເອເຊຍ, ສະຖານທູດອາເມລິກາ ປະຈໍາ ສປປ ລາວ, ອົງການພັດທະນາສາກົນປະເທດສະຫະລັດອາເມລິກາ, ຄູ່ຮ່ວມງານຈາກອົງການຈັດຕັ້ງສາກົນ ແລະ ອົງການຈັດຕັ້ງທາງສັງຄົມ ແລະ ບັນດາພະແນກຍຸຕິທໍາແຂວງ ຈໍານວນ 10 ແຂວງເປົ້າໝາຍເຂົ້າຮ່ວມ.
ຮ່ວມລົງນາມໃນຄັ້ງນີ້ ແມ່ນທ່ານ ຄຳພອນ ສີປະເສີດ, ຫົວໜ້າກົມຮ່ວມມືສາກົນ ແລະ ທ່ານ ໂທມັສ ເອີວິນ ພາກສ໌ IV ( Mr Thomas Irwin PARKS IV ) ຮັກສາການ ຜູ້ຕາງໜ້າອົງການມູນນິທິເອເຊຍ ປະຈໍາ ສປປ ລາວ.
ໂອກາດນີ້ ທ່ານ ເກດສະໜາ ພົມມະຈັນ ຮອງລັດຖະມົນຕີກະຊວງຍຸຕິທຳ ໄດ້ຍົກໃຫ້ເຫັນຄວາມສຳຄັນຂອງການຊ່ວຍເຫຼືອທາງດ້ານກົດໝາຍຕໍ່ນະໂຍບາຍເສດຖະກິດ-ສັງຄົມຂອງລັດຖະ ບານ ແລະ ການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ ໃນ ສປປ ລາວ. ທ່ານ ຍັງໄດ້ເນັ້ນໜັກວ່າ “ຜ່ານການຮ່ວມມືກັບອົງການ USAID ແລະ ມູນນິທິເອເຊຍ, ຂະແໜງຍຸຕິທຳຂອງພວກເຮົາສາມາດສ້າງຕັ້ງການໃຫ້ບໍລິການຊ່ວຍເຫຼືອທາງດ້ານກົດໝາຍໃນທົ່ວປະເທດ ເພື່ອປັບປຸງຄຸນນະພາບ ແລະ ການເຂົ້າເຖິງການບໍລິການເຫຼົ່ານີ້ ເພື່ອຊ່ວຍໃຫ້ປະຊາຊົນເຂົ້າໃຈກົດໝາຍຫຼາຍຂຶ້ນ ແລະ ເຂົ້າເຖິງການຊ່ວຍເຫຼືອ ແລະ ລະບົບຍຸຕິທໍາ ເພື່ອແກ້ໄຂຂໍ້ຂັດແຍ່ງຂອງເຂົາເຈົ້າ.”
ສ່ວນ ທ່ານ ນາງ ແຮັດເຕີ ວາເຣຍອາວາ (Heather Variava) ເອກອັກຄະລັດຖະທູດສະຫະລັດອາເມລິກາ ປະຈໍາ ສປປ ລາວ ໄດ້ກ່າວ: ຈຸດສຳຄັນຂອງການຂະຫຍາຍການຮ່ວມມື ລະຫວ່າງ ສະຫະລັດອາເມລິກາ ແລະ ສປປ ລາວ ແນ່ໃສ່ໃນການພັດທະນາການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ ແລະ ໄດ້ສະແດງຄວາມຍ້ອງຍໍຊົມເຊີຍຕໍ່ກະຊວງຍຸຕິທຳ ໃນການລິເລີ່ມສ້າງຕັ້ງລະບົບການຊ່ວຍເຫຼືອ ທາງດ້ານກົດໝາຍແຫ່ງຊາດ ແລະ ຊ່ວຍຫຼຸດຜ່ອນສິ່ງກີດຂວາງຕໍ່ຄວາມຍຸຕິທໍາ; ການເຂົ້າເຖິງຄວາມຍຸຕິທຳ ແມ່ນມີຄວາມສຳຄັນເພື່ອຊ່ວຍການຂະຫຍາຍຕົວທາງດ້ານເສດຖະກິດ ແລະ ການພັດທະນາທາງດ້ານມະນຸດ ແບບມີສ່ວນຮ່ວມ ແລະ ເທົ່າທຽມ ໃນ ສປປ ລາວ, ການລົງນາມຄັ້ງນີ້ເປັນການຢັ້ງຢືນໃຫ້ແກ່ການຮ່ວມມືທີ່ເຂັ້ມ ແຂງ, ຍາວນານ ແລະ ນັບມື້ນັບຂະຫຍາຍໂຕລະຫວ່າງສອງປະເທດພວກເຮົາ ດ້ວຍການສະໜັບສະໜູນຈາກອົງການ USAID, ປະຊາຊົນຈຳນວນ ຫຼາຍກວ່າ 6,800 ຄົນ ໄດ້ຮັບການໃຫ້ບໍລິການຊ່ວຍເຫຼືອທາງດ້ານກົດໝາຍ ແລະ ສື່ສິ່ງພິມຂໍ້ມູນຂ່າວສານພື້ນຖານທາງດ້ານກົດໝາຍໄດ້ຖືກແຈກຢາຍໃນທົ່ວປະເທດໃນນັ້ນລວມມີ ແຜ່ນພັບຈຳນວນຫຼາຍກວ່າ 74,000 ສະບັບ ທີ່ເປັນພາສາລາວ, ພາສາມົ້ງ ແລະ ພາສາກຶມມຸ ແລະ ຍັງມີ 3 ວິດີໂອທີ່ມີພາສາມືຢູ່ນຳດ້ວຍ.
