ໃນຕອນເຊົ້າຂອງ ວັນທີ 13 ມັງກອນນີ້ ທີ່ກະຊວງການຕ່າງປະເທດ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຕ້ອນຮັບການເຂົ້າຢ້ຽມອຳລາ ຂອງ ທ່ານ ໂອຼຮັນ ເອີຊຶກ (Orhan ISIK) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ຕວັກກີ ປະຈຳ ສປປ ລາວ ໃນໂອກາດສຳເລັດການປະຕິບັດໜ້າທີ່ການທູດ ຢູ່ ສປປ ລາວ, ພ້ອມທັງ ຕາງໜ້າໃຫ້ ລັດຖະບານ ແຫ່ງ ສປປ ລາວ ປະດັບຫຼຽນກາມິດຕະພາບ ໃຫ້ແກ່ ທ່ານເອກອັກຄະລັດຖະທູດ ເພື່ອເປັນການຍ້ອງຍໍຊົມເຊີຍ ຕໍ່ຜົນງານການປະກອບສ່ວນເຂົ້າໃນການເສີມຂະຫຍາຍການພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ລາວ – ຕວັກກີ.
ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍ້ອງຍໍຊົມເຊີຍ ທ່ານ ໂອຼຮັນ ເອີຊຶກ ຕໍ່ຜົນສໍາເລັດໃນການປະຕິບັດໜ້າທີ່ການທູດຢ່າງສົມກຽດຂອງ ທ່ານ ຢູ່ ສປປ ລາວ ຕະຫຼອດໄລຍະ 4 ປີກວ່າ ແລະ ຕີລາຄາສູງຕໍ່ການເຄື່ອນໄຫວຢ່າງຫ້າວຫັນ ຂອງ ທ່ານທູດ ທີ່ໄດ້ປະກອບສ່ວນສຳຄັນໃນການຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ລາວ-ຕວັກກີ ທັງໃນຂອບສອງຝ່າຍ ແລະ ຫຼາຍຝ່າຍ ໃຫ້ນັບມື້ນັບຂະຫຍາຍຕົວ ແລະ ດີຂຶ້ນເປັນກ້າວໆ, ໂດຍສະເພາະ ທ່ານທູດ ໄດ້ຊຸກຍູ້ໃຫ້ມີການແລກປ່ຽນການຢ້ຽມຢາມຂອງ ການນຳຂັ້ນສູງ ລະຫວ່າງ ສອງປະເທດຢ່າງຕັ້ງໜ້າ ຊຶ່ງໃນໄລຍະທີ່ ທ່ານທູດປະຕິບັດໜ້າທີ່ ຢູ່ ລາວ ກໍໄດ້ມີການເດີນທາງຢ້ຽມຢາມ ຕວັກກີ ຢ່າງເປັນທາງການ ຂອງ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໃນຕົ້ນປີ 2024 ພ້ອມທັງ ໄດ້ລົງນາມໃນ MOU ວ່າດ້ວຍການຮ່ວມມື ລະຫວ່າງ ສອງກະຊວງການຕ່າງປະເທດ ລາວ-ຕວັກກີ ໃຫ້ມີການແລກປ່ຽນຖອດຖອນບົດຮຽນ ໃນວຽກງານການປະຕິຮູບລັດວິສາຫະກິດ ຂະແໜງໄຟຟ້າ; ຊຸກຍູ້ການຢ້ຽມຢາມ ແລະ ເຂົ້າຮ່ວມກອງປະຊຸມສາມ ຝ່າຍ ລາວ-ກອງເລຂາອາຊຽນ-ຕວັກກີ ຂອງ ລັດຖະມົນຕີຕວັກກີ ໃນໄລຍະກອງປະຊຸມລະດັບລັດຖະມົນຕີອາຊຽນ ໃນເດືອນກໍລະກົດ 2024 ທີ່ ສປປ ລາວ ເປັນເຈົ້າພາບ ແລະ ເຊັນ MOU ສ້າງຕັ້ງສະພາອຸດສະຫະກໍາ ແລະ ການຄ້າ ລາວ-ຕວັກກີ. ພ້ອມນີ້, ທ່ານ ທອງສະຫວັນ ພົມວິຫານ ຍັງໄດ້ສະແດງຄວາມຊົມເຊີຍ ທ່ານທູດ ໂອຼຮັນ ເອີຊຶກ ທີ່ໄດ້ຮັບໜ້າທີ່ເປັນທູດອາວຸໂສຂອງທູຕານູທູດ ປະຈຳ ສປປ ລາວ ໃນປີ 2023 ແລະ 2024 ຊຶ່ງໄດ້ນໍາພາບັນດາທູຕານູທູດເຄື່ອນໄຫວຢ່າງຕັ້ງໜ້າ ແລະ ຮັກສາໄວ້ຄວາມສາມັກຄີອັນແໜ້ນແຟ້ນ ກໍຄື ການພົວພັນຮ່ວມມືອັນດີງາມ ລະຫວ່າງ ບັນດາສະຖານທູດຕ່າງໆ ທີ່ນະຄອນຫຼວງວຽງຈັນ.
ໃນໂອກາດດຽວກັນນີ້, ທ່ານທູດ ໂອຼຮັນ ເອີຊຶກ ໄດ້ສະແດງຄວາມຂອບໃຈຢ່າງຈິງໃຈ ມາຍັງລັດຖະ ບານ ກໍຄື ປະຊາຊົນລາວ ລວມທັງ ກະຊວງການຕ່າງປະເທດ ແຫ່ງ ສປປ ລາວ ທີ່ໄດ້ໃຫ້ການຮ່ວມມື, ສະໜັບສະໜູນຊ່ວຍເຫຼືອ ແລະ ອຳນວຍຄວາມສະດວກເປັນຢ່າງດີ ຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ ໃນຄັ້ງນີ້, ກໍຄືການເຮັດໜ້າທີ່ເປັນທູດອາວຸໂສຂອງທູຕານູທູດ ປະຈຳ ສປປ ລາວ ໃນປີ 2023 ແລະ 2024 ຈົນໄດ້ຮັບຜົນສຳເລັດອັນຈົບງາມ, ສະແດງຄວາມປິຕິຍິນດີ ແລະ ຂອບໃຈຢ່າງຈິງໃຈຕໍ່ລັດຖະບານລາວທີ່ໄດ້ຍ້ອງຍໍຊົມເຊີຍຕໍ່ຜົນງານຂອງຕົນ ຈົນໄດ້ຮັບການປະດັບຫຼຽນກາມິດຕະພາບ, ຊຶ່ງເປັນສັນຍາລັກທີ່ມີຄວາມໝາຍສຳຄັນໃນການຊຸກຍູ້ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ຕວັກກີ-ລາວ ໃຫ້ແຕກດອກອອກຜົນຍິ່ງໆຂຶ້ນ ແລະ ຫວັງຢ່າງຍິ່ງວ່າຈະໄດ້ກັບມາຢ້ຽມຢາມ ສປປ ລາວ ອີກຄັ້ງ.
ພ້ອມດຽວກັນນີ້, ທ່ານ ລັດຖະມົນຕີ ແລະ ທ່ານທູດ ຍັງໄດ້ຕີລາຄາການພົວພັນຮ່ວມມື ລະຫວ່າງ ສປປ ລາວ ແລະ ສ ຕວັກກີ ໃນໄລຍະຜ່ານມາ ນັບຕັ້ງແຕ່ສອງຝ່າຍໄດ້ມີການສ້າງຕັ້ງສາຍພົວພັນການທູດນັບແຕ່ປີ 1958 ເປັນຕົ້ນມາ ຊຶ່ງປີນີ້ ຄົບຮອບ 67 ປີ, ສອງຝ່າຍ ໄດ້ມີການພົວພັນທາງດ້ານການເມືອງ ແລະ ການທູດນຳກັນຢ່າງເປັນປົກກະຕິ, ມີການແລກປ່ຽນການຢ້ຽມຢາມຊຶ່ງກັນ ແລະ ກັນ ຢ່າງເປັນປະຈຳ, ພ້ອມທັງໄດ້ໃຫ້ການສະໜັບສະໜູນຊຶ່ງກັນ ແລະ ກັນ ໃນເວທີພາກພື້ນ ແລະ ສາກົນ ຢ່າງເປັນປົກກະຕິ. ຝ່າຍລາວ ຍັງໄດ້ຕີລາຄາສູງ ແລະ ສະແດງຄວາມຂອບໃຈ ມາຍັງ ທ່ານທູດ ແລະ ຜ່ານ ທ່ານທູດ ໄປຍັງລັດຖະບານ ແລະ ປະຊາຊົນ ຕວັກກີ ທີ່ໄດ້ໃຫ້ການສະໜັບສະໜູນ ສປປ ລາວ ຕະຫຼອດໄລຍະຜ່ານມາ ໂດຍສະເພາະຜ່ານອົງການຮ່ວມມື ແລະ ປະສານງານ ຂອງ ຕວັກກີ (Turkish Cooperation and Coordination Agency – TIKA) ຕໍ່ຂະແໜງສາທາລະນະສຸກ, ສຶກສາ, ກະສິກໍາ, ແຮງງານ ແລະ ສະຫວັດດີການສັງຄົມ ກໍຄື ການສົ່ງເສີມທັກສະ ແລະ ຄວາມກ້າວໜ້າຂອງຊາວໜຸ່ມ ແລະ ແມ່ຍິງ ລວມທັງການຊ່ວຍເຫຼືອດ້ານມະນຸດສະທຳ ໃນວຽກງານການບັນເທົາທຸກຈາກໄພພິບັດທຳມະຊາດ ໃນ ສປປ ລາວ ແລະ ການຫຼຸດຜ່ອນຄວາມສ່ຽງຕໍ່ລະເບີດບໍ່ທັນແຕກ ແລະ ອື່ນໆ.
ໃນຕອນທ່ຽງຂອງວັນດຽວກັນ, ທ່ານລັດຖະມົນຕີ ກໍໄດ້ໃຫ້ກຽດເປັນເຈົ້າພາບຈັດງານລ້ຽງອຳລາ ຕາມປະເພນີທີ່ເຄີຍປະຕິບັດ ເພື່ອເປັນກຽດ ແລະ ອວຍໄຊໃຫ້ພອນໃຫ້ແກ່ ທ່ານທູດ ເດີນທາງກັບຄືນປະເທດດ້ວຍຄວາມສະຫວັດດີພາບ.
(ຂ່າວ-ພາບ: ກຕທ)
