ກອງປະຊຸມປະເມີນຜົນ ການແກ້ໄຂການສໍ້ໂກງທາງໂທລະຄົມ (CallCenter) ຈັດຂື້ນໃນວັນທີ 7 ມັງກອນ 2025 ຜ່ານມາ ຢູ່ເຂດເສດຖະກິດພິເສດ ສາມຫລ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ໂດຍການເປັນປະທານຂອງ ທ່ານ ພົທ ຄໍາກິ່ງ ຜຸຍຫລ້າມະນີວົງ ຮອງລັດຖະມົນຕີ, ຫົວໜ້າກົມໃຫຍ່ຕໍາຫລວດ ກະຊວງ ປກສ, ມີ ທ່ານ ສະຖາບັນດິດ ອິນສີຊຽງໃໝ່ ຮອງລັດຖະ ມົນຕີກະຊວງແຜນການ ແລະ ການລົງທຶນ, ຫົວໜ້າຄະນະຊີ້ນໍາອົງການຄຸ້ມຄອງ-ບໍລິຫານ ເຂດເສດຖະກິດພິເສດສາມຫລ່ຽມຄໍາ, ທ່ານ ພົຕ ສາຍໃຈ ກົມມະສິດ ຮອງເຈົ້າແຂວງບໍ່ແກ້ວ, ຜູ້ຊີ້ນໍາວຽກງານປ້ອງກັນຊາດ-ປ້ອງກັນຄວາມສະຫງົບແຂວງ, ທ່ານ ກ່າວຫລົງ ຮອງປະທານສະພາບໍລິ ຫານ ເຂດເສດຖະກິດພິເສດສາມຫລ່ຽມຄໍາ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໃນກອງຊຸມ, ທ່ານ ພົຈວ ວັນທອນ ສຸລິສັກ ຮອງຫົວໜ້າກົມໃຫຍ່ຕໍາຫລວດ ກະຊວງ ປກສ ໄດ້ລາຍງານການປະເມີນຜົນ ການແກ້ໄຂການເຄື່ອນໄຫວສໍ້ໂກງທາງໂທລະຄົມ ຢູ່ເຂດເສດ ຖະກິດພິເສດ ສາມຫລ່ຽມຄໍາ ໄລຍະ 2022-2024 ວ່າ: ການແກ້ໄຂບັນຫາການເຄື່ອນໄຫວສໍ້ໂກງທາງໂທລະຄົມ (Call center) ຢູ່ເຂດເສດຖະກິດພິເສດ ສາມຫລ່ຽມຄໍາ ໃນໄລຍະຜ່ານມາ ໄດ້ພົບເຫັນການເຄື່ອນໄຫວຕອບແຊັດ ຫລື ການສໍ້ໂກງທາງໂທລະຄົມຈໍານວນ 306 ຫົວໜ່ວຍ, ມີ ແຮງງານທັງໝົດ 15.970 ຄົນ. ໃນນີ້ ຄົນລາວ 6.120 ຄົນ ແລະ ຕ່າງປະເທດ 9.868 ຄົນ.
ຜ່ານການຈັດຕັ້ງປະຕິບັດແກ້ໄຂຕົວຈິງ 2 ປີກວ່າ ສາມາດລົບລ້າງໄດ້ 63 ຫົວໜ່ວຍ ກວມ 20,5%; ໄດ້ຍຸບ ຫລື ສະຫລາຍຕົວເອງ 46 ຫົວໜ່ວຍ ກວມ 15% ແລະ ຫັນປ່ຽນສູ່ການເຄື່ອນ ໄຫວເກມອອນລາຍທີ່ມີການອະນຸມັດທັງຫົວໜ່ວຍໃຫຍ່ ແລະ ສາຂາຈໍານວນ 160 ຫົວໜ່ວຍ ກວມ 52,2%, ຍັງສືບຕໍ່ກວດກາແກ້ໄຂຈໍານວນ 37 ຫົວໜ່ວຍ, ກວມເອົາ 12%, ໄດ້ກວດກາແກ້ໄຂສໍາເລັດຕົວຈິງມີ 88%. ສໍາລັບທາງດ້ານແຮງງານ ໄດ້ກັກຕົວສົ່ງໃຫ້ເຈົ້າໜ້າທີ່ຕໍາຫລວດ ສປ ຈີນ ທັງໝົດ 9 ຄັ້ງ ລວມ 1.394 ຄົນ, ຍິງ 73 ຄົນ, ພ້ອມຂອງກາງເປັນໂທລະຊັບມືຖື 5.430 ໜ່ວຍ, ຄອມຕັ້ງໂຕະ 1.368 ຊຸດ, ໂນດບຸກ 92 ໜ່ວຍ, ໄອແພັດ 2 ໜ່ວຍ, ຫົວແຈກວາຍຟາຍ 14 ອັນ ແລະ USB 16 ອັນ; ໄດ້ສົ່ງຕົວເປົ້າໝາຍໃຫ້ເຈົ້າໜ້າທີ່ຕໍາຫລວດ ສສ ຫວຽດນາມ ຈໍານວນ 2 ຄັ້ງ ລວມມີ 159 ຄົນ, ຍິງ 26 ຄົນ, ພ້ອມຂອງກາງເປັນໂທລະຊັບມືຖື 298 ໜ່ວຍ, ຄອມຕັ້ງໂຕະ 20 ໜ່ວຍ ແລະ ໄດ້ສົ່ງຕົວແຮງງານສັນຊາດອື່ນໆ ກັບຄືນປະເທດ ທັງໝົດ 9 ຄັ້ງ, ລວມ 138 ຄົນ, ຍິງ 131 ຄົນ, ຢຶດຂອງກາງເປັນຄອມພິວເຕີຕັ້ງໂຕະ 83 ຊຸດ, ໂນດບຸກ 2 ເຄື່ອງ, ມືຖື 6 ໜ່ວຍ, ເຄື່ອງຮັບສັນຍານດາວທຽມ 2 ຊຸດ ແລະ ສາຍສາກມືຖືຈໍານວນໜຶ່ງ.
ສ່ວນທິດທາງແຜນການໃນຕໍ່ໜ້າ, ກະຊວງ ປກສ ຈະໄດ້ສືບຕໍ່ເອົາໃຈໃສ່ຂອດການປະສານງານສົມທົບກັບພາກສ່ວນທີ່ກ່ຽວຂ້ອງ ອ້ອມຂ້າງຂັ້ນສູນກາງ, ແຂວງ, ເມືອງ, ປກຊ-ປກສ ເຂດ ກໍຄືບັນດາໜ່ວຍງານທີ່ຂຶ້ນກັບເຂດເສດຖະກິດພິເສດ ສາມຫລ່ຽມຄໍາ, ພ້ອມກັນປຶກສາຫາ ແລະ ກໍານົດທິດທາງແຜນການລະອຽດ ເພື່ອແກ້ໄຂບັນຫາການເຄື່ອນໄຫວສໍ້ໂກງທາງໂທລະຄົມ ຢູ່ເຂດເສດ ຖະກິດພິເສດ ສາມຫລ່ຽມຄໍາ ໃນໄລຍະປີ 2025 ໃຫ້ມີຄວາມຄ່ອງຕົວກວ່າເກົ່າ, ພ້ອມທັງຮັບປະ ກັນໄດ້ການຄຸ້ມຄອງຕາມກົດໝາຍ ແລະ ລະບຽບການ.
ໂອກາດນີ້, ທ່ານ ພົທ ຄໍາກິ່ງ ຜຸຍຫລ້າມະນີວົງ ໄດ້ເນັ້ນຕໍ່ຄະນະພັກ, ຄະນະນໍາ, ພະນັກງານຫລັກແຫລ່ງທີ່ກ່ຽວຂ້ອງດ້ານວຽກງານດັ່ງກ່າວ, ເອົາໃຈໃສ່ບາງບັນຫາ ໂດຍສະເພາະ ສືບຕໍ່ສຶກສາອົບຮົມການເມືອງ-ແນວຄິດ ຂອງສະມາຊິກພັກ, ນາຍ ແລະ ພົນຕຳຫລວດໃຫ້ແໜ້ນ ເພື່ອໃຫ້ກົມກອງມີຄວາມສະຫງົບ; ຄະນະພັກ-ຄະນະບັນຊາ ຕ້ອງປັບປຸງແບບແຜນນໍາພາ ແລະ ວິທີເຮັດວຽກໃຫ້ມີຄຸນນະພາບແທດຕົວຈິງ, ບົນພື້ນຖານເຄົາລົບ ແລະ ປະຕິບັດຫລັກການລວມສູນປະຊາທິປະ ໄຕຢ່າງເຂັ້ມງວດ; ສືບຕໍ່ສະເໜີຄົ້ນຄ້ວາ ແລະ ປັບປຸງນິຕິກໍາກ່ຽວກັບການອະນຸມັດ ແລະ ຄຸ້ມຄອງກິດຈະການເກມອອນລາຍ ໃຫ້ມີເນື້ອໃນລະອຽດເລິກເຊິ່ງ ແລະ ຮັດກຸມ. ພ້ອມນັ້ນ, ກໍສົມທົບກັບບໍລິສັດບໍລິຫານຈັດການໄຊເບີລາວ ຫລື LCM ແຕ່ງຕັ້ງພະນັກງານມາປະຈໍາຢູ່ເຂດ ເພື່ອເຮັດວຽກງານການສະໜອງຂໍ້ມູນ, ການປະສານງານ ແລະ ການຄຸ້ມຄອງຕິດຕາມກວດກາຮ່ວມກັນເປັນປົກ ກະຕິ; ອອກນິຕິກໍາທີ່ເປັນອັນສະເພາະ ກ່ຽວກັບການຄຸ້ມຄອງທາງດ້ານວິຊາສະເພາະ, ເຕັກນິກ, ລະ ບົບການຕິດຕາມ, ກວດກາ, ການເກັບລາຍຮັບ ແລະ ອື່ນໆ, ພ້ອມທັງຄົ້ນຄ້ວາແຕ່ງຕັ້ງຄະນະຮັບ ຜິດຊອບ ເພື່ອເຄື່ອນໄຫວປະຕິບັດວຽກງານດັ່ງກ່າວ ທີ່ເປັນລັກສະນະຍາວນານ ເພື່ອຕິດຕາມກວດ ກາ ແລະ ຄຸ້ມຄອງພາຍໃນເຂດ ເຊິ່ງປະກອບມີຜູ້ຕາງໜ້າຈາກຄະນະຄຸ້ມຄອງເຂດ, ສະພາບໍລິຫານເຂດ, ກອງບັນຊາການປ້ອງກັນຄວາມສະຫງົບເຂດ, ບໍລິສັດ LCM, ຂະແໜງແຮງງານ, ຂະແໜງ ອຸດສາຫະກໍາ ແລະ ການຄ້າ, ຂະແໜງເຕັກໂນໂລຊີ ແລະ ການສື່ສານ, ຂະແໜງການເງິນ ແລະ ລປພ ເຂດ; ສຸມໃສ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄລຍະແຕ່ປີ 2024-2025; ຈັດຕັ້ງປະຕິບັດແຜນດໍາເນີນງານກ່ຽວກັບການຄຸ້ມຄອງ, ເລີກຮື້ອາວຸດເສິກ, ຖານຂໍ້ມູນປະຊາກອນ, ໂຄງການກໍ່ສ້າງສູນບຳບັດ; ມອບໃຫ້ຄະນະຊີ້ນໍາ, ກົມໃຫຍ່ 503 ແລະ ກົມ 509 ສືບຕໍ່ດໍາເນີນງານແຕ່ລະວຽກໃຫ້ໄປຕາມຈຸດປະສົງ ແລະ ຄາດໝາຍທີ່ໄດ້ກໍານົດ.
ຂ່າວ-ພາບ: ໄຊສົງຄາມ
