ແຂວງຊຽງຂວາງໄດ້ຈັດພິທີສະເຫຼີມສະເຫລອງບຸນກິນຈຽງ ຫລື ນໍ່ເປ້ເຈົາ ຢ່າງເປັນທາງການ ໃນວັນທີ 1 ມັງກອນ 2025 ໂດຍການເຂົ້າຮ່ວມຂອງທ່ານນາງ ປານີ ຢ່າທໍ່ຕູ້ ຮອງປະທານປະເທດ, ມີທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ແລະ ທ່ານໄຊບຼົ່ງເລົ່າ ໄຊຈູ ປະທານສະມາຄົມວັນນະຄະດີພື້ນເມືອງ ທັງເປັນປະທານຈັດງານບຸນກິນຈຽງທີ່ແຂວງຊຽງຂວາງ ພອ້ມດ້ວຍພາກສ່ວນກ່ຽວຂ້ອງ ແລະ ພໍ່ແມ່ປະຊາຊົນບັນດາເຜົ່າເຂົ້າຮ່ວມ.
ໃນພິທີ ທ່ານໄຊບຼົ່ງເລົ່າ ໄຊຈູ ໄດ້ໃຫ້ຮູ້ວ່າ: ງານສະເຫຼີມສະຫລອງນໍ່ເປ້ເຈົາ ຫລື ບຸນກິນຈຽງ ແມ່ນບຸນຫນືຶ່ງທີມີຄວາມຫມາຍຄວາມສໍາຄັນ, ເປັນບຸນສົ່ງທ້າຍປີເກົ່າ – ຕອ້ນຮັບປີໃຫມ່ ແລະ ເປັນການສະຫຼຸບສະຜົນຜະລິດໃນໄລຍະໜຶ່ງປີຜ່ານມາ ພ້ອມທັງມີການອວຍພອນເຊິ່ງກັນ ແລະ ກັນໃນວັນປີໃຫມ່. ນອກນີ້ຍັງເປັນການໄຫວ້ບູຊາພໍ່ແມ່, ປູ່ຍ່າຕາຍາຍຜູ້ທີ່ໄດ້ລ່ວງລັບໄປ.
ໃນງານສະເຫຼີມສະຫລອງນໍ່ເປ້ເຈົາ ຫລື ບຸນກິນຈຽງ ຈະມີກິດຈະກໍາຫຼາຍຢ່າງເຊັ່ນ: ການໂຍນຫມາກຄອນ,ບ່າວ-ສາວຂັບລໍາຕໍ່ແຍກັນ, ມີກິລາງົວຊົນງົວ, ຄວາຍຊົນຄວາຍ, ກິລາຕີຫມາກຄັ່ງ, ຕີປີກໄກ່, ຍິງຫນ້າເກັກ, ແຂ່ງຂີ່ມ້າ ແລະ ກິດຈະກໍາອື່ນໆ ຢ່າງມີຄວາມເບີກບານມວ່ນຊື່ນ ແລະ ມີຄວາມຫມາຍ.
ບັນດາກິດຈະກໍາດັ່ງກ່າວ ສາມາດດຶງດູດນັກທ່ອງທຽ່ວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມຢ່າງຄຶກຄື້ນພໍສົມຄວນ. ໃນໂອກາດທີ່ສໍາຄັນ ແລະມີຄວາມໝາຍນີ້ ທ່ານນາງ ປານີ ຢາທໍ່ຕູ້ ຮອງປະທານປະເທດກໍ່ໄດ້ຂື້ນກ່າວສົ່ງທ້າຍປີເກົ່າ ແລະ ຕ້ອນຮັບປີໃຫມ່ສາກົນ ແລະ ປີໃຫມ່ນໍ່ເປ້ເຈົາຂອງເຜົ່າມົ້ງ ກອ່ນອື່ນທ່ານໄດ້ຊົມເຊີຍຜົນສໍາເລັດໃນການເກັບກູ້ຜົນລະປຸກຂອງປະຊາຊົນໃນໄລຍະປີຜ່ານມາ, ຊົມເຊີຍຄວາມສາມັກຄີປອງດອງຂອງພໍ່ແມ່ປະຊາຊົນ, ການຮັກສາຮີດຄອງປະເພນີຂອງບັນດາເຜົ່າ ແລະ ອື່ນໆ.
ຂ່າວ-ພາບ : ຈູເລົ່າ ເຊຍລີ. ວສລ
