ໃນໂອກາດເຂົ້າຮ່ວມ ກອງປະຊຸມ ສະຫລຸບການຈັດຕັ້ງປະຕິບັດວຽກງານ ແຜນການ-ການລົງທຶນ ແລະ ວຽກງານການເງິນ ປະຈໍາປີ 2024 ແລະ ທິດທາງປີ 2025 ໃນວັນທີ 27 ທັນວາ 2024 ຜ່ານມາ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ມີຄຳເຫັນໂອລົມ ໂດຍທ່ານ ໄດ້ຕີລາຄາສູງ ແລະ ສະແດງຄວາມຊົມເຊີຍ ຕໍ່ຄະນະພັກ, ຄະນະນຳ ຕະຫລອດຮອດ ສະມາຊິກພັກ-ພະນັກງານ ຂອງຂະແໜງແຜນການ-ການລົງທຶນ ແລະ ຂະແໜງການເງິນ ທັງສູນກາງ ແລະ ທ້ອງຖິ່ນ ທີ່ໄດ້ເອົາໃຈໃສ່ ປະກອບສ່ວນເຫື່ອແຮງ, ສະຕິປັນຍາ ຂອງຕົນ ເຂົ້າໃນການປະຕິບັດໜ້າທີ່ການເມືອງທີ່ໄດ້ຮັບມອບໝາຍ ຕາມພາລະບົດບາດ-ຄວາມຮັບຜິດຊອບ ດ້ວຍຄວາມເປັນເຈົ້າການ ໂດຍສະເພາະ ການປັບປຸງຂະແໜງແຜນການ-ການລົງທຶນ ແລະ ການເງິນ ໃຫ້ມີຄວາມເຂັ້ມແຂງ, ສອດ ຄ່ອງກັບສະພາບຕົວຈິງໃນແຕ່ລະໄລຍະ, ທັງປະກອບສ່ວນ ເຂົ້າໃນການສູ້ຊົນ ປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ກໍຄື ແຜນງົບປະມານແຫ່ງລັດ ປະຈໍາປີ 2024 ທີ່ມີຫລາຍອັນເປັນສິ່ງທ້າທາຍສູງນີ້ ຢ່າງຫ້າວຫັນ ແລະ ມີຜົນສຳເລັດໂດຍພື້ນຖານ.
ທ່ານ ສອນໄຊ ສີພັນດອນ ໄດ້ມີຄຳເຫັນວ່າ: ຂະແໜງແຜນການ-ການລົງທຶນ ແລະ ການເງິນ ໄດ້ເປັນເຈົ້າການຍົກສູງປະສິດທິພາບ ຂອງການຄຸ້ມຄອງແຜນພັດທະນາ, ແຜນການລົງທຶນ ແລະ ແຜນງົບປະມານແຫ່ງລັດ ປະກອບສ່ວນ ຊຸກຍູ້ການພັດທະນາເສດຖະກິດ-ສັງຄົມ, ຍົກສູງວິໄນແຜນການ-ການເງິນ ແລະ ມີຄວາມພະຍາຍາມສູງໃນການປັບປຸງກົນໄກ ແລະ ລະບຽບການຕ່າງໆ ຕິດພັນກັບການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ. ພ້ອມນັ້ນ, ກໍໄດ້ຄົ້ນຄ້ວາ ສ້າງ, ປັບປຸງ ແລະ ຜັນຂະຫຍາຍບັນດາກົດໝາຍ ນິຕິກໍາໃຕ້ກົດໝາຍ ຢ່າງເປັນລະບົບຄົບຊຸດ ແລະ ຄົບຖ້ວນຂຶ້ນກວ່າເກົ່າ, ຊຸກຍູ້ ແລະ ປັບປຸງກົນໄກການຄຸ້ມຄອງການລົງທຶນຂອງລັດ, ຄຸ້ມຄອງການເງິນແຫ່ງລັດເປັນທັນສະໄໝ ກ້າວສູ່ລະບົບດີຈິຕອນ, ສົ່ງເສີມການດໍາເນີນທຸລະກິດ-ການລົງທຶນ ຂອງເອກະຊົນພາຍໃນ ແລະ ຕ່າງປະເທດ ໃຫ້ມີຄວາມສະດວກຂຶ້ນ. ທັງປະກອບສ່ວນຢ່າງຕັ້ງໜ້າ ເຂົ້າໃນການປະຕິບັດເປົ້າໝາຍ ການພັດທະນາແບບຍືນຍົງ (SDG) ແລະ ຍຸດທະສາດ ເພື່ອການເຕີບໂຕສີຂຽວ. ພິເສດ ແມ່ນການປະຕິບັດຄາດໝາຍໃນການນໍາປະເທດລາວ ອອກຈາກສະຖານະພາບ ປະເທດດ້ອຍພັດທະນາ (LDC) ໃນປີ 2026. ທັງໝົດເຫລົ່ານີ້ ແມ່ນຜົນສໍາເລັດ ແລະ ການປະກອບສ່ວນ ຢ່າງຕັ້ງໜ້າຂອງຂະແໜງແຜນການ-ການລົງທຶນ ແລະ ຂະແໜງການເງິນ.
ຄຽງຄູ່ກັບຜົນງານດ້ານດີ ແລະ ຜົນສຳເລັດ ທີ່ຍາດມາໄດ້ນັ້ນ, ຖ້າສົມທຽບໃສ່ຄວາມຮຽກຮ້ອງຕ້ອງການອັນຈໍາເປັນຂອງການພັດທະນາ ແລະ ຍົກລະດັບຊິວິດການເປັນຢູ່ຂອງປະຊາຊົນໃຫ້ດີຂຶ້ນນັ້ນ, ທ່ານ ສອນໄຊ ສີພັນດອນ ເນັ້ນໃຫ້ ສອງຂະແໜງການດັ່ງກ່າວ ຫັນວຽກງານຕ່າງໆເປັນອັນຮີບດ່ວນ ເປັນຕົ້ນ ຖືເອົາວຽກງານ ການສ້າງເສດຖະກິດ ເອກະລາດ ເປັນເຈົ້າຕົນເອງໃນໄລຍະໃໝ່ ເປັນວຽກບູລິມະສິດຕົ້ນຕໍ ໃນການຜັນຂະຫຍາຍເຂົ້້າສູ່ວຽກງານຕົວຈິງ ຂອງແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດໃນປີ 2025 ເປັນຕົ້ນໄປ ໂດຍໃຫ້ຄົ້ນຄວ້າລະອຽດເຖິງຄວາມໝາຍ-ຄວາມສໍາຄັນໃຫ້ເຂົ້າໃຈຢ່າງເລິກເຊິ່ງ ເພື່ອຕີຈັງຫວະໃຫ້ວຽກງານອື່ນໆ ສາ ມາດປິ່ນອ້ອມ; ການຈັດຕັ້ງປະຕິບັດແຜນພັດທະນາຂອງປະເທດ ໃຫ້ຜ່ານການກໍານົດເປັນແຜນງານ, ໂຄງການລະ ອຽດ ໂດຍສະເພາະ ການຂະຫຍາຍຖານການຜະລິດ ຕິດພັນກັບນະໂຍບາຍການຜະລິດ ເພື່ອທົດແທນການນໍາເຂົ້້າ ແລະ ເປັນສິນຄ້າສົ່ງອອກ ແນໃສ່ ສ້າງແຫລ່ງລາຍຮັບທີ່ເປັນເງິນຕາຕ່າງປະເທດ, ທັງເປັນການ ສ້າງຄັງສະສົມແຫ່ງຊາດ ໃຫ້ຫລາຍຂຶ້ນ ເພື່ອພະຍາຍາມຫລຸດຜ່ອນການອາໄສ ການຊ່ວຍເຫລືອຈາກຕ່າງປະເທດເທື່ອລະກ້າວ ສາມາດເພິ່ງພາຕົນເອງໄດ້ຫລາຍຂຶ້ນ; ພ້ອມທັງປັບປຸງການສ້າງແຜນໃນໄລຍະໃໝ່ ໃຫ້ແທດຕົວຈິງຫລາຍຂຶ້ນ ແລະ ມີວິທະ ຍາສາດ, ປະຕິຮູບການລົງທຶນຂອງລັດ ໃຫ້ມີການຫັນປ່ຽນໃໝ່ ໂດຍສະເພາະການຈັດລຽງບຸລິມະສິດ ແລະ ໂຄງ ການທີ່ຮີບດ່ວນ, ຈໍາເປັນ ແລະ ໃຫ້ປະໂຫຍດແກ່ສັງຄົມ, ມີປະສິດທິຜົນ ແລະ ເຫັນຜົນໄວທາງດ້ານເສດຖະກິດທີ່ແທ້ຈິງ ຄຽງຄູ່ກັບການຈໍາກັດໂຄງການທີ່ບໍ່ມີປະສິດທິຜົນ ເພື່ອບໍ່ສ້າງໜີ້ສະສົມເພີ່ມຂຶ້ນ; ຕ້ອງໄດ້ກວດກາຄືນໂຄງ ການລົງທຶນຂອງລັດ ທີ່ຍັງບໍ່ທັນໄດ້ປະຕິບັດ, ບໍ່ມີຄວາມຄືບໜ້າ, ບໍ່ມີປະສິດທິຜົນ, ແກ່ຍາວເວລາຈັບຈອງໂຄງການ ແລະ ເນື້ອທີ່ ຖ້າບໍ່ມີຄວມຄືບໜ້າໃຫ້ສະ ເໜີໂຈະຊົ່ວຄາວ ຫລື ຖາວອນ. ໃຫ້ສືບຕໍ່ຄຸ້ມຄອງ ແລະ ສົ່ງເສີມເຂດເສດຖະກິດພິເສດ ໃຫ້ກາຍເປັນກໍາລັງແຮງແທ້ຈິງໃຫ້ການພັດທະນາ, ຕ້ອງຍົກລະດັບຄວາມຮັບຜິດຊອບຫລາຍຂຶ້ນ ໃນການກໍານົດໜ້າວຽກຢ່າງມີຈຸດສຸມ, ມີການບໍລິຫານ ແລະ ຄຸ້ມຄອງເຂດໃຫ້ຮັດກຸມຕາມສັນຍາ, ລະບຽບ ແລະ ກົດໝາຍຢ່າງເຄັ່ງຄັດ; ການບໍລິການຂອງພາກລັດ ຢູ່ພາຍໃນເຂດ ກໍຕ້ອງເຮັດແບບປະຕູດຽວ ແລະ ຄົບຊຸດ, ຮຽກຮ້ອງໃຫ້ບັນດາທ້ອງຖິ່ນທີ່ມີເຂດເສດຖະກິດພິເສດ ຕ້ອງລົງຕິດຕາມ, ກວດກາ ຢ່າງໃກ້ຊິດ ໃນການຄຸ້ມຄອງບໍລິຫານໃຫ່ເຂົ້າສູ່ລະບຽບ, ມີຄວາມສະຫງົບ ແລະ ເອົາການບໍລິການທີ່ວ່ອງໄວ, ສະດວກ ເພື່ອດຶງດູດການລົງທຶນ.
ພ້ອມນັ້ນ, ໃຫ້ເລັ່ງປະຕິຮູບ ລັດວິສາຫະກິດ ໃຫ້ສໍາເລັດໂດຍໄວ ແລະ ເປັນຮູບປະທໍາ ໂດຍການຄົ້ນຄວ້າຫັນກົນໄກປະຕິຮູບ, ຫລັກການ, ວິທີການ ແລະ ມາດຕະການໄລຍະກາງ, ໄລຍະຍາວ ໃນການປັບປຸງລັດວິສາຫະກິດໃຫ້ມີຄວາມເຂັ້ມແຂງ ໄປຄຽງຄູ່ກັບການປະຕິຮູບລັດວິສາຫະກິດ ຍຸດທະສາດຈໍານວນໜຶ່ງທີ່ຂາດທຶນ ແລະ ດຳເນີນທຸລະກິດ ບໍ່ມີປະສິດທິຜົນດ້ວຍຫລາຍຮູບແບບ ເປັນຕົ້ນ ການຊອກຄູ່ຮ່ວມທຸລະກິດ ຍຸດທະສາດ ເຂົ້າມາດຳເນີນທຸລະກິດ ແລະ ປັບປຸງຮູບແບບການບໍລິຫານ ໃຫ້ໄດ້ມາດຕະຖານສາກົນ.
