ພິທີສະເຫຼີມສະຫຼອງຜົນສຳເລັດການຮຽບຮຽງຫຼັກສູດປຶ້ມແບບຮຽນ ຄູ່ມືຄູ ແລະ ສື່ການຮຽນ-ການສອນພາສາຍີ່ປຸ່ນ ສຳລັບຊັ້ນມັດທະຍົມສຶກສາລາວ ຈັດຂຶ້ນວັນທີ 20 ທັນວາ 2024 ທີ່ໂຮງແຮມ ຮໍລີເດ ອິນ ໂດຍຮ່ວມເປັນປະທານຂອງທ່ານ ປອ ນາງ ດາລາວອນ ກິດຕິພັນ ຮອງລັດຖະມົນຕີກະຊວງສຶກສາທິການ ແລະ ກີລາ ທ່ານ ຊຶໂຕະມູ ໂຄອິຊຶມິ (Tsutomo KOIZUMI) ເອກອັກຄະລັດຖະທູດຍີ່ປຸ່ນ ປະຈຳ ສປປ ລາວ ມີທ່ານ ມາຊາໂຕະ ຟູຣູຢະ (Masato FURUYA) ຮອງປະທານບໍລິຫານມູນນິທິຍີ່ປຸ່ນ ປະຈຳນະຄອນຫຼວງໂຕກຽວ ທ່ານ ໂຢຊູເກະ ກຸຊາກະເບະ (Yosuke KUSAKABE) ຜູ້ອຳນວຍການມູນນິທິຍີ່ປຸ່ນ ປະຈຳນະຄອນຫຼວງວຽງຈັນ ພ້ອມຫົວໜ້າກົມ ຊ່ຽວຊານລາວ ຍີ່ປຸ່ນ ແລະ ແຂກຖືກເຊີນເຂົ້າຮ່ວມ.
ໃນພິທີ ທ່ານ ປອ ນາງ ດາລາວອນ ກິດຕິພັນ ໄດ້ສະແດງຄວາມຂອບໃຈຢ່າງຊຸດຊຶ່ງມາຍັງລັດຖະ ບານຍີ່ປຸ່ນ ມູນນິທິຢີ່ປຸ່ນ ແລະ ສະຖານທູດຍີ່ປຸ່ນປະຈໍາລາວ ທີ່ໄດ້ໃຫ້ການສະໜັບສະໜູນອັນລ້ຳຄ່າໃນການເຮັດໃຫ້ໂຄງການນີ້ກາຍເປັນຈິງ ການປະກອບສ່ວນຂອງພວກທ່ານ ທາງດ້ານວິຊາການ ງົບປະມານ ເຫຼົ່ານີ້ ລ້ວນແຕ່ເປັນວັດຖຸປັດໃຈໃນການປະກອບສ່ວນຕໍ່ການພັດທະນາການສຶກສາ ແລະ ຄຸນນະພາບການຮຽນຂອງນັກຮຽນໃນລາວໃຫ້ດີຂຶ້ນ ການພັດທະນາຂອງປຶ້ມແບບຮຽນເຫຼົ່ານີ້ ແມ່ນບໍ່ພຽງແຕ່ໄດ້ຮຽນແຕ່ພາສາເທົ່ານັ້ນ ແຕ່ມັນຍັງເປັນການເປີດປະຕູຮັບເອົາໂອກາດໃໝ່ສູ່ໂລກພາຍນອກອີກດ້ວຍ ໂດຍສະ ເພາະແມ່ນການຮຽນຮູ້ພາສາຍີ່ປຸ່ນ ນັກຮຽນຂອງພວກເຮົາຍັງໄດ້ຮຽນຮູ້ເຖິງວັດທະນະທໍາອັນອຸດົມສົມບູນ ຄວາມກ້າວໜ້າທາງດ້ານເຕັກໂນໂລຊີ ແລະ ໂອກາດທາງວິຊາການຂອງຍີ່ປຸ່ນ ເປັນການສ້າງກຳລັງແຮງໃຫ້ເຂົາເຈົ້າໃນການສ້າງອາຊີບ ຊຸກຍູ້ການຮ່ວມມືກັບສາກົນ ປະກອບສ່ວນເຂົ້າໃນການພັດທະນາເສດຖະ ກິດ-ສັງຄົມຂອງລາວ.
ຕໍ່ກັບຄວາມຕັ້ງໃຈ ແລະ ຄວາມທຸ່ມເທຂອງຊ່ຽວຊານ ແລະ ນັກພັດທະນາຫຼັກສູດຂອງພວກເຮົາ ທີ່ໄດ້ເຮັດວຽກຢ່າງບໍ່ອິດເມື່ອຍເພື່ອຮັບປະກັນວ່າປຶ້ມແບບຮຽນ ແລະ ຄູ່ມືຄູເຫຼົ່ານີ້ ຈະຕ້ອງໄດ້ມາດຕະຖານສູງ ປຶ້ມແບບຮຽນເຫຼົ່ານີ້ ຖືກອອກແບບເພື່ອຕອບສະໜອງຄວາມຕ້ອງການຂອງຄູ ແລະ ນັກຮຽນ ຮັບ ປະກັນຄຸນນະພາບສູງ ພວກເຮົາໄດ້ເອົາໃຈໃສ່ເປັນຢ່າງຍິ່ງໃນການລວມເອົາເຕັກນິກວິທີການສອນແບບໃໝ່ ແລະ ວັດທະນະທໍາຂອງຢີ່ປຸ່ນເຂົ້າໃນຫຼັກສູດ ເຊິ່ງວ່າປຶ້ມແບບຮຽນບໍ່ພຽງແຕ່ເປັນເຄື່ອງມືໃນການຮຽນພາ ສາເທົ່ານັ້ນ ແຕ່ຍັງເປັນຂົວເຊື່ອມຕໍ່ວັດທະນະທໍາຂອງພວກເຮົາ ແລະ ຮັດແໜ້ນສາຍພົວພັນມິດຕະພາບລະຫວ່າງ ລາວ-ຍີ່ປຸ່ນ.
