ຂ່າວສານຫວຽດນາມລາຍງານ ເມື່ອບໍ່ດົນມານີ້, ອົງການພະລັງງານສາກົນ (IEA) ຄາດຄະເນວ່າ: ການນຳໃຊ້ຖ່ານຫີນຂອງໂລກໃນປີນີ້ຈະເພີ່ມຂຶ້ນເປັນ 8,7 ຕື້ໂຕນ ແລະ ຈະຮັກສາລະດັບສູງເປັນສະຖິຕິຈົນຮອດປີ 2027.
IEA ລະບຸວ່າ: ການຜະລິດ ແລະ ການຄ້າຖ່ານຫີນ ກໍຄືການຜະລິດກະແສໄຟຟ້າຈາກຖ່ານຫີນ ໄດ້ເພີ່ມຂຶ້ນເປັນສະຖິຕິສູງໃນສະພາບວິກິດການອາຍແກັສທົ່ວໂລກທີ່ເກີດຂຶ້ນ.
IEA ຍັງເຊື່ອວ່າໂຮງງານໄຟຟ້າຄວາມຮ້ອນໄດ້ນໍາໃຊ້ຖ່ານຫີນຫຼາຍຂຶ້ນໃນປີທີ່ຜ່ານມາ, ໂດຍສະເພາະຈີນໄດ້ນຳໃຊ້ເຊື້ອໄຟນີ້ຫຼາຍກວ່າປະເທດອື່ນໆໃນໂລກ 30%.
IEA ຄາດຄະເນວ່າ ຄວາມຕ້ອງການຖ່ານຫີນຂອງຈີນໃນປີ 2024 ຈະເພີ່ມຂຶ້ນ 1% ເປັນ 4,9 ຕື້ໂຕນ ຊຶ່ງເປັນສະຖິຕິສູງສຸດ. ຄວາມຕ້ອງການຖ່ານຫີນຂອງ ອິນເດຍ ມີທ່າອ່ຽງທີ່ຈະເພີ່ມຂຶ້ນຫຼາຍກວ່າ 5% ເປັນ 1,3 ຕື້ໂຕນ. ໃນຂະນະດຽວກັນ, ໃນບັນດາປະເທດເຊັ່ນ: ອາເມຣິກາ ແລະ ສະຫະພາບເອີລົບ (EU), ປະລິມານການຜະລິດໄຟຟ້າຈາກຖ່ານຫີນໄດ້ບັນລຸລະດັບສູງສຸດ ແລະ ຄາດຄະເນວ່າຈະຫຼຸດລົງ 5% ແລະ 12% ໃນປີນີ້.
