ໃນວັນທີ 4 ທັນວາ ນີ້ ທີ່ກະຊວງສາທາລະນະສຸກ ສປ ຈີນ ໄດ້ມອບຢາ ແລະ ອຸປະກອນການແພດໃຫ້ແກ່ກະຊວງສາທາລະນະສຸກ ໂດຍຜ່ານອົງການອຸຍນີເຊັບປະຈຳລາວ ເພື່ອຕ້ານພາວະການຂາດສານອາຫານຢ່າງຮ້າຍແຮງ, ການປັບປຸງຜົນໄດ້ຮັບດ້ານສຸຂະພາບຂອງເດັກ ແລະ ການເພີ່ມທະວີການບໍລິການໃນການປົກປ້ອງເດັກຢູ່ ສປປ ລາວ ພາຍໃຕ້ການລົງທຶນ 1,5 ລ້ານໂດລາ ຊຶ່ງຈະເກີດຜົນປະໂຫຍດໂດຍກົງໃຫ້ແກ່ເດັກນ້ອຍ ແລະ ຄອບຄົວເປັນຈໍານວນຫຼາຍກວ່າ 221,000 ຄົນ ໃນທົ່ວປະເທດ ໂດຍສະເພາະຜູ້ດ້ອຍໂອກາດທີ່ອາໄສຢູ່ເຂດຫ່າງໄກສອກຫຼີກ. ອຸປະກອນທີ່ນຳມາມອບໃນຄັ້ງນີ້ປະກອບມີເຄື່ອງຊ່ວຍຊີວິດ ລວມທັງອາຫານເສີມທາງການແພດພ້ອມໃຊ້ (RUTF) 6,200 ກ່ອງ ໃຫ້ກຽດກ່າວມອບໂດຍທ່ານ ນາງ ຟາງຫົງ ເອກອັກຄະລັດຖະທູດຈີນປະຈໍາ ສປປ ລາວ ໂດຍການກ່າວຮັບຂອງທ່ານ ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ, ມີທ່ານ ບີລານ ເດີລານີ ຕາງໜ້າອົງການອຸຍນີເຊັບ ປະຈໍາ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ສະໜອງ ທອງຊະນະ ກ່າວວ່າ: ການຮ່ວມມືກັບອົງການອຸຍນີເຊັບ ແລະ ລັດຖະບານແຫ່ງ ສປ ຈີນ ແມ່ນມີຄວາມສໍາຄັນຕໍ່ການບັນລຸເປົ້າໝາຍດ້ານສຸຂະພາບ ແລະ ໂພຊະນາການຂອງ ສປປ ລາວ. ການເລີ່ມຕົ້ນຂອງການຮ່ວມມືໃໝ່ນີ້ຈະສົ່ງຜົນກະທົບທາງບວກຕໍ່ການຊ່ວຍຊີວິດເດັກນ້ອຍ ແລະ ຄອບຄົວໃນທົ່ວປະເທດ.
ອຸປະກອນທີ່ນຳມາມອບຈະຖືກແຈກຢາຍໄປໃຫ້ຂັ້ນແຂວງ ແລະ ຂັ້ນເມືອງເພື່ອສ້າງຄວາມເຂັ້ມແຂງໃນການຕິດຕາມຂໍ້ມູນທາງດ້ານໂພຊະນາການ (Nutrition Information System), ການເກັບກໍາຂໍ້ມູນດ້ານການເຝົ້າລະວັງໂພຊະນາການ ແລະ ການຕິດຕາມການຈັດຕັ້ງປະຕິບັດຜະລິດຕະພັນອາຫານ ແລະ ອຸປະກອນກ່ຽວກັບອາຫານສຳລັບເດັກອ່ອນ ແລະ ເດັກນ້ອຍ ໂດຍສະເພາະໃນເຂດ ຫ່າງໄກສອກຫຼີກ ເພື່ອສຸມໃສ່ເດັກນ້ອຍຫຼາຍກວ່າ 221,000 ຄົນ ໃນການແກ້ໄຂເດັກນ້ອຍຂາດສານອາຫານກະທັນຫັນຮ້າຍແຮງທີ່ ສປປ ລາວ. ນອກຈາກນີ້ ຍັງມີວິຕາມິນອາ ແລະ ຢາອື່ນໆ ຊຶ່ງຈໍາເປັນສໍາລັບການປິ່ນປົວພະຍາດຂາດສານອາຫານຮ້າຍແຮງໃນເດັກ ລວມເຖິງນົມທາງການແພດ, ຊຸດອຸປະກອນປິ່ນປົວຄົນເຈັບ. ພ້ອມນີ້, ໂຄງການຍັງສົ່ງເສີມການສ້າງຂີດຄວາມສາມາດໃນການຝຶກອົບຮົມພະນັກງານສາທາລະນະສຸກຈໍານວນ 600 ກວ່າຄົນ ແລະ ໃຫ້ແກ່ໂຮງໝໍແຂວງ 17 ແຫ່ງ ເພື່ອປິ່ນປົວພະຍາດໃນເດັກ ນ້ອຍເຊັ່ນ: ພະຍາດປອດບວມ, ຖອກທ້ອງ.
ໃນໂອກາດດັ່ງກ່າວ ທ່ານນາງ ຟາງຫົງ ກ່າວວ່າ: ຂໍ້ລິເລີ່ມດັ່ງກ່າວຍັງໃຫ້ບຸລິມະສິດແກ່ການບໍລິການໃນການປົກປ້ອງເດັກ, ການສະໜັບສະໜູນເດັກທີ່ມີຄວາມສ່ຽງຈຳນວນ 15,000 ຄົນ ໃນໂຮງຮຽນກິນນອນ ແລະ ການຈັດຫາພະນັກງານສັງຄົມສົງເຄາະໃນ 18 ແຂວງ ດ້ວຍການສະໜອງອຸປະກອນທີ່ຈຳເປັນສຳລັບການຕ້ານຄວາມຮຸນແຮງທາງເພດ ແລະ ການບໍລິການດ້ານສຸຂະພາບຈິດ. ການລິເລີ່ມໂຄງການໃໝ່ດັ່ງກ່າວສະແດງໃຫ້ເຫັນເຖິງຫຼັກການພາຍໃຕ້ຂໍ້ລິເລີ່ມການພັດທະນາໂລກ ຂອງ ສ ປຈີນ ພ້ອມທັງສະແດງໃຫ້ເຫັນເຖິງຄວາມເອົາໃຈໃສ່ຂອງ ສປ ຈີນ ໃນຖານະໜຶ່ງໃນປະເທດຜູ້ນຳໂລກ. ພວກເຮົາຫວັງວ່າໂຄງການນີ້ບໍ່ພຽງແຕ່ຈະຊ່ວຍເດັກນ້ອຍທີ່ປະສົບກັບບັນຫາການຂາດສານອາຫານ ແລະ ພະ ຍາດຕ່າງໆເທົ່ານັ້ນ, ແຕ່ຍັງຈະຊ່ວຍສະແດງເຖິງຄວາມສາມັກຄີລະຫວ່າງຜູ້ຄົນ ແລະ ສັງຄົມ ພ້ອມເສີມສ້າງອະນາຄົດຮ່ວມກັນຂອງຊຸມຊົນພວກເຮົາ.
ຂ່າວ-ພາບ: ຍຸພິນທອງ
