ພິທີມອບ-ຮັບ ແລະ ເປີດນຳໃຊ້ ໂຄງການປັບປຸງເສັ້ນທາງ ແລະ ສິ່ງອຳນວຍຄວາມສະດວກພາຍໃນສະຖານທີ່ທ່ອງທ່ຽວເຂດອ່າງນ້ຳງື່ມ 1 ຢູ່ເມືອງແກ້ວອຸດົມ ແຂວງວຽງຈັນ ຈັດຂຶ້ນໃນວັນທີ 3 ທັນວາ 2024 ໂດຍມີ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ(ຖວທ), ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ມີຮອງເຈົ້າ ແຂວງ, ຮອງລັດຖະມົນຕີ, ຫົວໜ້າກົມ, ຮອງກົມ ພ້ອມດ້ວຍພາກສ່ວນທີ່ກຽວຂ້ອງ ແລະ ແຂກຖືກເຊີນ ເຂົ້າຮ່ວມ.
ໂອກາດດັ່ງກ່າວ, ທ່ານນາງ ສວນສະຫວັນ ວິຍະເກດ ໄດ້ໃຫ້ຮູ້ວ່າ: ການປັບປຸງໂຄງລ່າງພື້ນຖານສິ່ງອໍານວຍຄວາມສະດວກດ້ານການທ່ອງທ່ຽວ ຢູ່ໜ້າເຂື່ອນນໍ້າງື່ມ ໃນຄັ້ງນີ້, ແນໃສ່ ເຮັດໃຫ້ສະຖານທີ່ແຫ່ງນີ້ໄດ້ມີໂສມໜ້າອັນໃໝ່, ກາຍເປັນສະຖານທີ່ ພັກຜ່ອນທາງທໍາມະຊາດ ທີ່ໂດດເດັ່ນອີກແຫ່ງໜຶ່ງຢູ່ທາງພາກກາງຂອງ ສປປ ລາວ, ໃຫ້ນັກທ່ອງທ່ຽວໄດ້ມາສໍາຜັດ ກັບຄວາມສວຍງາມຂອງທໍາມະຊາດ ຄຽງຄູ່ກັບການອະນຸລັກຊີວະນາໆພັນ ແລະ ການຄຸ້ມຄອງແຫລ່ງນໍໍ້າໃຫ້ມີຄວາມຍືນຍົງ, ເປັນຈຸດໝາຍປາຍທາງການທ່ອງທ່ຽວທີ່ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ດ້ວຍຮູບແບບການບໍລິ ຫານ-ຄຸ້ມຄອງ, ການຈັດສັນພື້ນທີ່ ແລະ ການຈັດຕັ້ງປະຕິບັດລະບຽບການຮ່ວມກັນ ລະຫວ່າງ ພາກລັດ-ພາກທຸລະກິດ ແລະ ປະຊາຊົນທ້ອງຖິ່ນ. ພ້ອມນີ້, ຊຸມຊົນທ້ອງຖິ່ນ ຈະສືບຕໍ່ໄດ້ຮັບຜົນປະໂຫຍດຈາກການທ່ອງທ່ຽວຢູ່ໃນຂອບເຂດ ແລະ ບໍລິເວນອ້ອມຮອບອ່າງນໍໍ້າງື່ມ 1, ທັງຊຸກຍູ້ການເຕີບໂຕດ້ານເສດຖະກິດ, ສ້າງວຽກເຮັດງານທຳ ແລະ ດຶງດູດການລົງທຶນຕື່ມອີກ.
ຢ່າງໃດກໍຕາມ, ກະຊວງ ຖວທ ຍັງຈະສືບຕໍ່ຮ່ວມກັບອົງການປົກຄອງແຂວງວຽງຈັນ ໃນການບໍລິຫານຄຸ້ມຄອງສະຖານທີ່ທ່ອງທຽວແຫ່ງນີ້ ໂດຍການເປີດໂອກາດໃຫ້ພາກທຸລະກິດ ທີ່ມີຄວາມຊຳນິຊຳນານ ແລະ ມີປະສົບການໃນການພັດທະນາ, ບໍລິຫານ ແລະ ຄຸ້ມຄອງສະຖານທີ່ທ່ອງທ່ຽວ ເຂົ້າມາມີສ່ວນຮ່ວມກັບພາກລັດ ແລະ ປະຊາຊົນທ້ອງຖິ່ນ ໃນການບໍລິຫານ-ຄຸ້ມຄອງຢ່າງເປັນລະບົບ ແລະ ໃຫ້ເປັນຕົວແບບຂອງ ສປປ ລາວ. ພ້ອມນີ້, ຍັງຈະສືບຕໍ່ໃຫ້ການໜັບສະໜູນ ການຍົກລະດັບຂີດຄວາມສາມາດ ໃນການບໍລິການ ໃຫ້ແກ່ພາກລັດ-ທຸລະກິດ ແລະ ປະຊາຊົນທ້ອງຖິ່ນ ໃນເຂດເປົ້າໝາຍຂອງໂຄງການ ເພື່ອຮັບປະກັນຄຸນນະພາບ ແລະ ຄວາມຍືນຍົງ.
ໂອກາດນີ້, ທ່ານ ຄຳພັນ ສິດທິດຳພາ ໄດ້ຂຶ້ນກ່າວຮັບ ແລະ ເປີດນຳໃຊ້ໂຄງການດັ່ງກ່າວ, ຢ່າງເປັນທາງການ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນ. ພ້ອມທັງ ສະແດງຄວາມຮູ້ບຸນຄຸນ ແລະ ຕີລາຄາສູງຕໍ່ຄວາມເປັນຫວ່ງເປັນໃຍ, ຄວາມເອົາໃຈໃສ່ຊຸກຍູ້ສົ່ງເສີມວຽກງານ ພັດທະນາການທ່ອງທ່ຽວ ຂອງ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ທະນາຄານພັດທະນາອາຊີ ທີ່ໄດ້ໃຫ້ທຶນຊ່ວຍເຫລືອໃນການປັບປຸງກໍ່ສ້າງສະຖານທີ່ທ່ອງທ່ຽວຢູ່ແຂວງວຽງຈັນ ກໍຄື ຢູ່ໜ້າເຂື່ອນນໍ້າງື່ມແຫ່ງນີ້ ໃຫ້ມີຄວາມສວຍສົດງົດງາມ, ເປັນສິ່ງເອກອ້າງທະນົງໃຈ ເພີ່ມມົນສະເໜ່ໃຫ້ ແກ່ຊາວແຂວງວຽງຈັນ.
ໃນພິທີ, ທ່ານ ນາງ ພອນມະລີ ອິນທະພົມ ຫົວໜ້າກົມພັດທະນາການທ່ອງທ່ຽວ ກະຊວງ ຖວທ ໃຫ້ຮູ້ວ່າ: ການກໍ່ສ້າງເສັ້ນທາງ ແລະ ສິ່ງອໍານວຍຄວາມສະດວກດ້ານການທ່ອງທ່ຽວເຂດໜ້າເຂື່ອນນໍ້າງື່ມ 1 ເມືອງແກ້ວອຸດົມ, ແຂວງວຽງຈັນ ພາຍໃຕ້ໂຄງການພັດທະນາໂຄງລ່າງພື້ນຖານເພື່ອສົ່ງ ເສີມການທ່ອງທ່ຽວອະນຸພາກພື້ນແມ່ນໍ້າຂອງ ໄລຍະ 2 ໂດຍໄດ້ຮັບການຊ່ວຍເຫລືອລ້າຈາກທະນາ ຄານພັດທະນາອາຊີ (ADB) ເຊິ່ງໄດ້ເຊັນສັນຍາໃນວັນທີ 26 ມິຖຸນາ 2021 ລະຫວ່າງກະຊວງຖະ ແຫລງຂ່າວ, ວັດທະນະທໍາ ແລະ ທ່ອງທ່ຽວ (ເຈົ້າຂອງໂຄງການ) ແລະ ບໍລິ ສັດຄຳຟອງກຣຸບ ຈຳກັດຜູ້ດຽວ (Khamfong Group Sole Co., Ltd). (ຜູ້ຮັບເໝົາກໍ່ສ້າງ) ໃນມູນຄ່າ 5,3 ລ້ານກວ່າໂດລາສະຫະລັດ ໂດຍໄດ້ເລີ່ມລົງມືກໍ່ສ້າງໃນວັນທີ 1 ກໍລະກົດ 2021 ເປັນຕົ້ນມາ ແລະ ໄດ້ສໍາເລັດການກໍ່ສ້າງໃນວັນທີ 30 ຕຸລາ 2024.
ສຳລັບ ບັນດາໜ້າວຽກທີ່ໄດ້ຈັດຕັ້ງປະຕິບັດ ໄດ້ປັບປຸງເສັ້ນທາງເຂົ້າເຖິງເຂດອ່າງນໍ້າງື່ມຄືນໃໝ່, ມີ ຄວາມຍາວ 6,3 ກິໂລແມັດ, ເປັນເສັ້ນທາງຄອນກີດ ເຊື່ອມຕໍ່ກັບເສັ້ນທາງຫລວງໝາຍເລກ 10, ປັບປຸງເສັ້ນທາງຊອຍພາຍໃນເຂດທ່າເຮືອ, ປັບປຸງພື້ນທີ່ຈອດລົດ, ກໍ່ສ້າງບ່ອນຊົມວິວ ເປັນພັກແບບຂັ້ນ ໄດຢູ່ເຂດທ່າເຮືອ, ປັບປຸງຈຸດຊົມວິວ 3 ຈຸດ ຄື: ຢູ່ດ້ານເທິງ 1 ຈຸດ ແລະ ຢູ່ທ່າເຮືອ 2 ຈຸດ, ກໍ່ສ້າງຝາກັນເຈື່ອນແຄມນໍ້າທ່າເຮືອ ແລະ ຢູ່ຫລັງອາຄານຮ້ານຄ້າ ດ້ວຍການວາງກະຕ່າຫີນ, ກໍ່ສ້າງອາຄານຮ້ານຂາຍເຄື່ອງ 7 ຫລັງ, ມີ 32 ຫ້ອງ, ກໍ່ສ້າງຮ້ານອາຫານສາທາລະນະ ເພື່ອຮອງຮັບນັກທ່ອງທ່ຽວ, ກໍ່ສ້າງສາລາວົງມົນຊົມວິວ ສຳລັບນັກທ່ອງທ່ຽວ, ກໍ່ສ້າງປະຕູໂຂງ ເພື່ອຍິນດີຕ້ອນຮັບເຂົ້າສູ່ສະຖານທີ່ທ່ອງທ່ຽວອ່າງນໍ້າງື່ມ, ກໍ່ສ້າງຫ້ອງນໍ້າສາທາລະນະ ສໍາລັບນັກທ່ອງທ່ຽວ ແລະ ຄົນພິການ, ກໍ່ສ້າງອາຄານເກັບມ້ຽນຂີ້ເຫຍື້ອ ພ້ອມຈັດສັນຖັງເກັບຂີ້ເຫຍື້ອ ກໍ່ສ້າງບ່ອນຈອດລົດສຳຮອງ, ກໍ່ສ້າງຂັ້ນໄດສຳລັບນັກທ່ອງທ່ຽວຍ່າງລົງໄປຫາຮ້ານອາຫານເຮືອແພ, ກໍ່ສ້າງແພສຳລັບນັກທ່ອງທ່ຽວຍ່າງໄປຫາຮ້ານອາຫານເຮືອແພ, ປັບປຸງເສັ້ນທາງ ແລະ ຂົວພາຍໃນ ສໍາລັບຄົນພິການພ້ອມທັງຕິດຕັ້ງຮາວກັນຕົກ ໃຫ້ມີຄວາມສວຍງາມ ແຂງແກ່ນທົນທານຕໍ່ສະພາບດິນຟ້າອາກາດ ແລະ ມີຄວາມປອດໄພ, ຕິດຕັ້ງລະບົບນໍ້າປະປາ ແລະ ໄຟ ຟ້າ, ຕິດຕັ້ງໄຟເຍືອງທາງສໍາລັບທາງຍ່າງພາຍໃນເຂດທ່າເຮືອ, ປູກຕົ້ນໄມ້ໃຫ້ຮົ່ມ ແລະ ປູກຫຍ້າ ເພື່ອປັບ ປຸງສະຖານທີ່ທ່ອງທ່ຽວເປັນມິດຕໍ່ສິ່ງແວດລ້ອມ ແລະ ຕິດຕັ້ງອ່າງບໍາບັດນໍ້າເປື້ອນ ເພື່ອຮອງຮັບການບໍ ລິການຂອງຮ້ານອາຫານ ແລະ ເຮືອທ່ອງທ່ຽວ.
ຂ່າວ-ພາບ: ທະນູທອງ
