……………
ແຂວງຈໍາປາສັກ ໄດ້ຈັດພິທີໂຮມຊຸມນຸມສະເຫຼີມສະຫຼອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 49 ປີ (2 ທັນວາ 1975-2 ທັນວາ 2024) ຕິດພັນກັບການເປີດຂະບວນການສະເຫຼີມສະຫຼອງ 3 ວັນປະຫວັດສາດ ປີ 2025 ແລະ ຂະບວນການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ທົ່ວແຂວງ ຂຶ້ນໃນຕອນເຊົ້າວັນທີ 29 ພະຈິກ ນີ້, ທີ່ສະໜາມແດງນະຄອນປາກເຊ ໃຫ້ກຽດເຂົ້າຮ່ວມ ແລະ ກ່າວປາໃສຕໍ່ທີ່ໂຮມຊຸມນຸມຂອງສະຫາຍ ອາລຸນໄຊ ສູນນະລາດ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ, ມີແຂກຖືກເຊີນ, ມີອະດີດພະນັກງານການນໍາອາວຸໂສບໍານານ, ກົງສູນໃຫຍ່ ສສ ຫວຽດນາມ, ກົງສູນໃຫຍ່ ຣາຊະອານາຈັກກໍາປູເຈຍ ປະຈໍາພາກໃຕ້ ແລະ ມວນຊົນເຂົ້າຮ່ວມຢ່າງເປັນຂະບວນຟົດຟື້ນ.
ໃນພິທີ, ສະຫາຍ ອາລຸນໄຊ ສູນນະລາດ ໄດ້ປາຖະກະຖາ ໂດຍຍົກໃຫ້ເຫັນການໄດ້ຮັບໄຊຊະນະ, ການເຕີບໃຫຍ່ຂະຫາຍຕົວໃນແຕ່ລະໄລຍະຢ່າງຮອບດ້ານໃນການນໍາພາ-ຊີ້ນໍາຂອງພັກ-ລັດ. ວັນທີ 2 ທັນວາ 1975 ແມ່ນວັນທີ່ມີຄວາມໝາຍສໍາຄັນ ສໍາລັບທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດແຫ່ງການຕໍ່ສູ້ ຂອງຊາດລາວເຮົາ; ແມ່ນວັນທີປະຊາຊົນລາວບັນດາເຜົ່າໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ; ທັງເປັນວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນະຖາວອນ. ປະທານ ໄກສອນ ພົມວິຫານ ໄດ້ຕີລາຄາວັນທີ 2 ທັນວາ ປີ 1975ວ່າ: “ບໍ່ທັນມີເວລາໃດທີ່ປະຊາຊົນເຮົາ ຊຶ່ງເປັນຜູ້ສ້າງປະຫວັດສາດຂອງຊາດນັ້ນ ໄດ້ຍາດເອົາໄຊຊະນະອັນສົມບູນຢ່າງສະຫງ່າລາສີຄືແນວນີ້ຈັກເທື່ອ, ໄຊຊະນະນັ້ນບໍ່ສະເພາະແຕ່ໄດ້ຟື້ນຟູຄວາມເປັນເອກະລາດ ຂອງປະເທດເຮົາ, ຫາກຍັງເປັນຄັ້ງທຳອິດ ທີ່ປະຊາຊົນບັນດາເຜົ່າ ຜູ້ເຄີຍດຳລົງຊີວິດເປັນທາດໄດ້ກາຍມາເປັນເຈົ້າຂອງແທ້ຈິງຂອງຊາດໜຶ່ງ ທີ່ມີເອກະລາດ, ມີອິດສະຫຼະພາບຢ່າງສົມບູນ ແລະ ພວມກ້າວຂຶ້ນສູ່ສັງຄົມນິຍົມ, ເຮັດໃຫ້ຄວາມມຸ່ງຫວັງອັນແຮງກ້າ ຂອງປວງຊົນລາວ ກໍຄື ຂອງມວນມະນຸດປະກົດເປັນຈິງຢູ່ບົນຜືນແຜ່ນດິນອັນແສນຮັກຂອງພວກເຮົາ” ແລະ ຍົກໃຫ້ເຫັນບັນຫາອື່ນໆໃນແຕ່ລະໄລຍະ.
ສໍາລັບປີ 2025 ເປັນປີ ທີ່ມີຄວາມໝາຍສໍາຄັນ ສໍາລັບທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດ ເວົ້າລວມ, ເວົ້າສະເພາະແມ່ນທົ່ວແຂວງຈໍາປາສັກ; ໃນການກະກຽມສະເຫຼີມສະຫຼອງ 3 ວັນປະຫວັດສາດ, ເນື້ອແທ້ເປັນການຫວນຄືນມູນເຊື້ອແຫ່ງການຕໍ່ສູ້ປົດປ່ອຍຊາດຢ່າງມີໄຊ ແລະ ຢັ້ງຢືນຄືນໝາກຜົນຕົວຈິງ ທີ່ພັກປະຊາຊົນປະຕິວັດລາວ ຍາດມາໄດ້ ຕະຫຼອດໄລຍະ 70 ປີ ຊຶ່ງເປັນວັນໄຊຊະນະຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານ, ເປັນວັນແຫ່ງການເອກອ້າງທະນົງໃຈຂອງທົ່ວພັກ, ທົ່ວກອງທັບ ແລະ ທົ່ວປວງຊົນບັນດາເຜົ່າ ພາຍໃຕ້ການນໍາພາຂອງພັກ; ການປົກປັກຮັກສາ ແລະ ການສ້າງສາພັດທະນາປະເທດຊາດ ຕະຫຼອດ 50 ປີ ຊຶ່ງເປັນວັນໄຊຊະນະອັນຫຍິ່ງໃຫຍ່ ທີ່ບໍ່ເຄີຍມີມາໃນປະຫວັດສາດຂອງຊາດລາວເຮົາ ແລະ ການຈາລຶກຜົນງານ, ຄຸນງາມຄວາມດີ ແລະ ສະແດງຄວາມຮູ້ບຸນຄຸນຂອງ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປະຊາຊົນບັນດາເຜົ່າ ຄົບຮອບ 105 ປີ.
ຂ້າພະເຈົ້າ ຂໍຖືໂອກາດທີ່ມີຄວາມໝາຍສໍາຄັນດັ່ງກ່າວນີ້ ພ້ອມກັນເປີດຂະບວນການສ້າງຜົນງານ ແກ່ການສະ ເຫຼີມສະຫຼອງ 3 ວັນປະຫວັດສາດດັ່ງກ່າວ ຕິດພັນກັບການສ້າງເສດຖະກິດເອກະລາດ ເປັນເຈົ້າຕົນເອງນັບແຕ່ເວລານີ້ເປັນຕົ້ນໄປ.
(ຂ່າວ-ພາບ: ຈັນທະວີສັກ)
