ໃນປີ 2024 ນີ້, ອົງການກວດສອບແຫ່ງລັດ ດໍາເນີນການເຄື່ອນໄຫວວຽກງານກວດສອບ ໃຫ້ໄດ້ 120 ເປົ້າໝາຍ, ໃນນັ້ນ ໄດ້ດໍາເນີນການກວດສອບໂຄງການເງິນກູ້ຢືມ, ຊ່ວຍເຫລືອລ້າ ແລະ ດຳເນີນວິສາຫະກິດລັດລົງທຶນ ຍັງພົບເຫັນການລະເມີດວິໄນ ແຜນການ-ການເງິນ ເປັນຕົ້ນ ການໃຊ້ຈ່າຍເງິນບໍ່ນອນໃນກິດຈະກຳຂອງໂຄງການ, ການຈັດຊື້-ຈັດຈ້າງ ບໍ່ຖືກຕ້ອງຕາມກົດໝາຍ ແລະ ລະ ບຽບການ, ບໍ່ບັນທຶກຊັບສົມບັດຄົງທີ່ໃນບັນຊີຂອງໂຄງການ, ການຈັດຊື້ພາຫະນະ ແລະ ການບຳລຸງຮັກ ສາບໍ່ຢູ່ໃນເປົ້າໝາຍຂອງໂຄງການ.
ທ່ານ ວຽງທະວີສອນ ເທບພະຈັນ ກຳມະການສຳຮອງສູນກາງພັກ, ປະທານອົງການກວດສອບແຫ່ງລັດ ໄດ້ໃຫ້ຮູ້ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 26 ພະຈິກ 2024 ນີ້ວ່າ: ໃນປີ 2024 ນີ້, ອົງການກວດສອບແຫ່ງລັດ ດໍາເນີນການເຄື່ອນໄຫວວຽກງານກວດສອບ ໄດ້ 120 ເປົ້າໝາຍ, ພ້ອມທັງໄດ້ລົງຕິດຕາມຊຸກຍູ້ການແກ້ໄຂຜົນການກວດສອບ 23 ເປົ້າໝາຍ. ໃນນັ້ນ, ກວດສອບວິສາຫະກິດ 15 ເປົ້າໝາຍ ແລະ ກວດສອບອົງການຈັດຕັ້ງລັດ 8 ເປົ້າໝາຍ. ສ່ວນເປົ້າໝາຍອື່ນໆ ທີ່ບໍ່ໄດ້ອອກໜັງສືແຈ້ງຕອບເປັນລາຍລັກອັກສອນ ແມ່ນໄດ້ດໍາເນີນການກວດສອບຄືນຕາມແຜນກວດສອບປະຈໍາປີ ຈໍານວນ 86 ເປົ້າໝາຍ, ໃນນັ້ນ ມີກົມກວດສອບອົງການຈັດ ຕັ້ງລັດ 19 ເປົ້າໝາຍ, ກົມກວດສອບທະນາຄານ 10 ເປົ້າໝາຍ, ກົມກວດສອບວິສາຫະກິດ 10 ເປົ້າໝາຍ, ກົມກວດສອບໂຄງການ 11 ເປົ້າໝາຍ, ອົງການກວດສອບປະຈໍາພາກເໜືອ 1 ຈໍານວນ 8 ເປົ້າໝາຍ, ອົງການກວດສອບປະຈໍາພາກເໜືອ 2 ຈໍານວນ 9 ເປົ້າໝາຍ, ອົງການກວດສອບປະຈໍາພາກກາງ 1 ຈໍານວນ 9 ເປົ້າໝາຍ, ອົງການກວດສອບປະຈໍາພາກກາງ 2 ຈໍານວນ 5 ເປົ້າໝາຍ ແລະ ອົງການກວດສອບປະຈໍາພາກໃຕ້ 5 ເປົ້າໝາຍ.
ສຳລັບ ແຜນການປີ 2025 ນີ້, ອົງການກວດສອບແຫ່ງລັດ ຈະດໍາເນີນການເຄື່ອນໄຫວວຽກງານກວດສອບ ໃຫ້ໄດ້ 154 ເປົ້າໝາຍ. ໃນນັ້ນ, ຈະກວດສອບອົງການຈັດຕັ້ງລັດ 28 ເປົ້າໝາຍ, ກວດສອບທະນາຄານ 15 ເປົ້າໝາຍ, ກວດສອບວິສາຫະກິດ 15 ເປົ້າໝາຍ, ກວດສອບໂຄງການ 18 ເປົ້າໝາຍ, ອົງການກວດສອບປະຈໍາພາກເໜືອ 1 ຈໍານວນ 16 ເປົ້າໝາຍ, ອົງການກວດສອບປະຈໍາພາກເໜືອ 2 ຈໍານວນ 12 ເປົ້າໝາຍ, ອົງການກວດສອບປະຈໍາພາກກາງ 1 ຈໍານວນ 18 ເປົ້າໝາຍ, ອົງການກວດສອບປະຈໍາພາກກາງ 2 ຈໍານວນ 12 ເປົ້າໝາຍ ແລະ ອົງການກວດສອບປະຈໍາພາກໃຕ້ ຈໍານວນ 20 ເປົ້າໝາຍ.
ຂ່າວ: ທະນູທອງ
ພາບ: ຂັນໄຊ
