ແຂວງສາລະວັນ ເປີດງານວາງສະແດງສິນຄ້າ ແລະ ຜະລິດຕະພັນທ່ອງທ່ຽວ

————————-

20 ພະຈິກນີ້, ແຂວງສາລະວັນ ໄດ້ເປີດງານວາງສະແດງສິນຄ້າ ແລະ ຜະລິດຕະພັນທ່ອງທ່ຽວ ເນື່ອງໃນໂອກາດງານບຸນປະເພນີແຫ່ພຣະໄຕຣປີດົກ ສືບສານວັດທະນະທຳ ລຳວົງສາລະວັນ ປະຈຳປີ 2024, ຢູ່ທີ່ສະໂມສອນແຂວງ, ໂດຍໃຫ້ກຽດເຂົ້າຮ່ວມຂອງ ທ່ານ ດາວວົງ ພອນແກ້ວ ເຈົ້າແຂວງສາລະວັນ, ມີທ່ານຮອງເລຂາພັກແຂວງ, ຄະນະປະຈຳພັກແຂວງ, ຮອງເຈົ້າແຂວງສາລະວັນ, ທ່ານ ຄຳຜ່ານ ສີລາວີ ຫົວໜ້າພະແນກອຸດສາຫະກຳ ແລະ ການຄ້າແຂວງ, ຫົວໜ້າ-ຮອງພະແນກການ, ຮອງເຈົ້າເມືອງ 8 ຕົວເມືອງ, ຜູ້ປະກອບການ, ນັກທຸລະກິດທັງພາຍໃນ ແລະ ຕ່າງແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານພູທົງ ຄຳມະນີວົງ ຮອງເຈົ້າແຂວງສາລະວັນ ຜູ້ຊີ້ນຳວຽກງານເສດຖະກິດ ໄດ້ກ່າວເປີດງານເຊິ່ງໃຫ້ຮູ້ວ່າ: ເພື່ອເປັນການສົ່ງເສີມການຮ່ວມມື ແລະ ການໂຄສະນາປະຊາສໍາພັນໃຫ້ທຸກພາກສ່ວນໃນທົ່ວສັງຄົມທັງພາຍໃນ ແລະ ຕ່າງປະເທດໄດ້ຮັບຮູ້ເຖິງຜະລິດຕະພັນສິນຄ້າໂອດ໋ອບ(ODOP) ທີ່ເກີດຈາກພູມປັນຍາຂອງປະຊາຊົນ,ທີ່ເປັນ ເອກະລັກຂອງທ້ອງຖິ່ນ ຕິດພັນກັບການຈັດງານບຸນປະເພນີແຫ່ພຣະໄຕປີດົກ ສືບສານວັດທະນະທຳ, ລໍຳວົງສາລະວັນ, ເປັນການຮ່ວມມືສົ່ງເສີມການທ່ອງທ່ຽວລາວ, ການຄ້າ ແລະ ການລົງທຶນ ໃຫ້ມີການຂະຫຍາຍຕົວ, ກະຕຸກ, ຊຸກຍູ້ໃຫ້ບັນດາຫົວໜ່ວຍວິສາຫະກິດຂະໜາດນ້ອຍ, ຂະໜາດກາງ(SME) ໄດ້ແລກປ່ຽນສິນຄ້າຮ່ວມກັນ ສ້າງເງື່ອນໄຂໃຫ້ສິນຄ້າຂອງຕົນໄດ້ເຂົ້າເຖິງຕະຫຼາດໃຫ້ຫຼາຍຂື້ນຕະຫຼອດຮອດການເພີ່ມທະວີການພົວພັນ ລະຫວ່າງພາກລັດ, ພາກທຸລະກິດ ແລະ ປະຊາຊົນ ໃຫ້ມີຄວາມຄ່ອງຕົວ, ຊຸກຍູ້ໃຫ້ເສດຖະກິດມີການຂະຫຍາຍຕົວ. ວຽກງານດັ່ງກ່າວ ແມ່ນມີຄວາມສໍາຄັນ, ເປັນເສົາຄໍ້າຂອງໂຄງປະກອບເສດຖະກິດ ທີ່ພັກ ແລະ ລັດຖະບານໄດ້ເອົາໃຈໃສ່ໃນການຊຸກຍູ້, ສົ່ງເສີມ ໃຫ້ມີຄວາມເຂັ້ມແຂງ ແລະ ມີການພັດທະນາມາຢ່າງຕໍ່ເນື່ອງ, ໝູນໃຊ້ທ່າແຮງບົ່ມຊ້ອນ ທາງດ້ານຊັບພະຍາກອນທໍາມະຊາດ, ປະຫວັດສາດ, ວັດທະນະທໍາ,ຮີດຄອງປະເພນີ ແລະ ວິຖີຊີວິດຂອງປະຊາຊົນລາວບັນດາເຜົ່າ ພ້ອມທັງເປັນການສົ່ງເສີມສິນຄ້າລາວ ເຂົ້າສູ່ຕະຫຼາດພາຍໃນ ແລະ ຕ່າງປະເທດ.

ການວາງສະແດງສິນຄ້າໂອດ໋ອບ(ODOP) ຂອງບັນດາເມືອງ, ບັນດາແຂວງອ້ອມຂ້າງ ແລະ ສິນຄ້າປະເພດຕ່າງໆ ຕາມເງື່ອນໄຂ ແລະ ທ່າແຮງ, ມີຫົວໜ່ວຍທຸລະກິດເຂົ້າຮ່ວມທັງໝົດປະມານ 87 ຫົວໜ່ວຍ, 87 ຮ້ານ ລວມມູນຄ່າສິນຄ້າປະມານ 1,36 ຕື້ກວ່າກີບ, ໃນນັ້ນປະກອບມີ ຫົວໜ່ວຍ ໂອດ໋ອບພາຍໃນແຂວງ 12 ຫົວໜ່ວຍ, ຕ່າງແຂວງ 5 ຫົວໜ່ວຍ ແລະ ສິນຄ້າອື່ນໆ 70 ຫົວໜ່ວຍ, ໂດຍມີໝວດສິນຄ້າຫັດຖະກໍາ ແລະ ຜົນຜະລິດກະສີກໍາ, ເຄື່ອງເອເລັກໂຕນິກ, ໜ່ວຍບໍລິການ, ທ່ອງທ່ຽວ, ອາຫານ ແລະ ສິນຄ້າທົ່ວໄປ. ເຊີ່ງໄດ້ຈັດຂຶ້ນເປັນເວລາ 5 ວັນ ນັບແຕ່ວັນທີ 19 – 23 ພະຈິກ 2024.

ຈາກນັ້ນ, ໃນພິທີກໍ່ໄດ້ມີການຕັດແຖບຜ້າ ພ້ອມທັງເປີດປ້າຍພິທີຢ່າງເປັນທາງການ ແລະ ໃຫ້ກຽດລັ່ນຄ້ອງ 9 ບາດ ໂດຍທ່ານເຈົ້າແຂວງສາລະວັນ. ໂອກາດດຽວກັນນັ້ນ, ບັນດາການນໍາຂອງແຂວງ ແລະ ແຂກທຸກພາກສ່ວນ ກໍໄດ້ທ່ຽວຊົມບຸດວາງສະແດງສິນຄ້າປະເພດຕ່າງໆ ແລະ ໄດ້ຮັບຟັງກ່ຽວກັບການຈັດຕັ້ງປະຕິບັດ, ການດຳເນີນງານ ແລະ ບາດກ້າວຕ່າງໆຂອງບັນດາຫົວໜ່ວຍສິນຄ້າຕ່າງໆ ທີ່ຮ່ວມວາງສະແດງໃນງານຄັ້ງນີ້.

—————————————————–

#ຂ່າວພາບ: ວິໄລວອນ ສິດທິໄຊ