ຄະນະຜູ້ແທນພັກ ປປ ລາວ ນໍາໂດຍ ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ຮອງປະທານປະເທດແຫ່ງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມໃຫຍ່ຂອງອົງການບັນດາພັກການເມືອງໃນອາຊີ (ICAPP) ຄັ້ງທີ 12 ພາຍໃຕ້ຫົວຂໍ້: “ການສະແຫວງຫາສັນຕິພາບ ແລະ ຄວາມປອງດອງ” (A Quest for Peace and Reconciliation), ເຊິ່ງຈັດຄຽງຄູ່ກັບ ກອງປະຊຸມສະພາວັດທະນະທໍາອາຊີ ຄັ້ງທີ 3, ເວທີສໍາມະນາສື່ມວນຊົນ ICAPP ຄັ້ງທີ 7 ແລະ ກອງປະຊຸມປຶກສາຫາລືໂຕະມົນ ລະຫວ່າງ ບັນດາພັກການເມືອງທີ່ມາຈາກອາຊີ, ອາຟຣິກາ, ອາເມລິກາລາຕິນ ແລະ ກາຣາອິບ, ເອີຣົບ ໃນລະຫວ່າງວັນທີ 21-24 ພະຈິກ 2024 ທີ່ນະຄອນຫລວງພະນົມເປັນ, ຣາຊະອານາຈັກກໍາປູເຈຍ, ໂດຍການເປັນເຈົ້າພາບຂອງພັກປະຊາຊົນກໍາປູເຈຍ ຮ່ວມກັບກອງເລຂາ ICAPP, ມີຄະນະຜູ້ແທນຂອງ 65 ພັກການເມືອງ ຈາກ 43 ປະເທດ ເຂົ້າຮ່ວມ.
ກອງປະຊຸມໃຫຍ່ຂອງໄອແຄັບ ຄັ້ງນີ້, ບັນດາຜູ້ແທນທີ່ເຂົ້າຮ່ວມກອງປະຊຸມ ໄດ້ລົງເລິກແລກປ່ຽນ ກ່ຽວກັບ ບັນຫາເພື່ອສັນຕິພາບໃນໂລກ; ເສີມຂະຫຍາຍສາຍພົວພັນ ແລະ ຄວາມປອງດອງຂອງບັນດາພັກການເມືອງ ກໍຄື ບັນດາປະເທດ ໃນການແກ້ໄຂບັນຫາສິ່ງທ້າທ້າຍຂອງໂລກຮ່ວມກັນ. ໃນໂອກາດເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນ ພັກ ປປ ລາວ ໄດ້ປະກອບຄຳເຫັນໃນ 3 ກອງປະຊຸມດັ່ງກ່າວ ໂດຍຍົກໃຫ້ເຫັນເຖິງສະພາບການຂອງໂລກໃນປັດຈຸບັນ ທີ່ກຳລັງປະເຊີນໜ້າກັບສິ່ງທ້າທາຍທາງດ້ານການເມືອງ ແລະ ເສດຖະກິດ ທີ່ຄາດຄະເນໄດ້ຍາກ ອັນໄດ້ສົ່ງຜົນກະທົບຢ່າງໃຫຍ່ຫລວງຕໍ່ປະຊາຄົມໂລກ, ເຊິ່ງມີຄວາມຮຽກຮ້ອງຢ່າງຍິ່ງໃຫ້ບັນດາພັກການເມືອງເພີ່ມທະວີຄວາມສາມັກຄີ ແລະ ການຮ່ວມມືໃນແຕ່ລະດ້ານ, ສະໜັບສະໜູນເຊິ່ງກັນ ແລະ ກັນ ບົນຫລັກການຢູ່ຮ່ວມກັນໂດຍສັນຕິ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ ເພື່ອປົກປັກຮັກສາສັນຕິພາບ, ຄວາມໝັ້ນຄົງ ແລະ ນຳເອົາຄວາມສົມບູນພູນສຸກມາສູ່ພາກພື້ນ ແລະ ທົ່ວໂລກ. ພັກ ປປ ລາວ ເຊື່ອໝັ້ນວ່າ ໄອແຄັບ ຈະສາມາດເປັນກົນໄກໜຶ່ງທີ່ສໍາຄັນທີ່ຊ່ວຍຊຸກຍູ້ການສ້າງຄວາມເຂັ້ມແຂງໃຫ້ແກ່ການຮ່ວມມືຫລາຍຝ່າຍ ເພື່ອສົ່ງເສີມການພັດທະນາ ແລະ ຈະນໍາເອົາຄວາມຈະເລີນຮຸ່ງເຮືອງ ມາສູ່ພາກພື້ນ ກໍຄື ໃນໂລກ.
ໃນການເຂົ້າຮ່ວມກອງປະຊຸມຄັ້ງນີ້, ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ຮອງປະທານປະເທດແຫ່ງ ສປປ ລາວ ໄດ້ເຂົ້າຢ້ຽມຂໍ່ານັບ ສົມເດັດ ອັກຄະມະຫາເສນາບໍດີ ເຕໂຈ ຮຸນເຊນ ປະທານພັກປະຊາຊົນກໍາປູເຈຍ, ປະທານສະພາສູງ ແຫ່ງ ຣາຊະອານາຈັກກໍາປູເຈຍ ແລະ ພົບປະ ກັບ ສົມເດັດ ມະຫາບໍວອນ ທິບໍດີ ຮຸນ ມາເນັດ ຮອງປະທານພັກປະຊາຊົນກຳປູເຈຍ, ນາຍົກລັດຖະມົນຕີແຫ່ງຣາຊະອານາຈັກກຳປູເຈຍ.
ໃນການພົບປະສອງຝ່າຍຄັ້ງນີ້, ໄດ້ຕີລາຄາສູງ ສາຍພົວພັນມິດຕະພາບ ອັນເປັນມູນເຊື້ອ ແລະ ການ ຮ່ວມມືແບບຄູ່ຮ່ວມຍຸດທະສາດ ຮອບດ້ານ ໝັ້ນຄົງ ຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ- ກຳປູເຈຍ; ໄດ້ແລກປ່ຽນສະພາບພາຍໃນພັກ, ພາຍໃນປະເທດ ໂດຍສະເພາະສະພາບການພັດທະນາເສດຖະກິດ- ສັງຄົມຂອງແຕ່ລະປະເທດ; ເຫັນດີເປັນເອກະພາບກັນໃນການສືບຕໍ່ເສີມຂະຫຍາຍສາຍພົວພັນຂອງສອງພັກ, ສອງລັດ ເພື່ອຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ, ການທ່ອງທ່ຽວ, ວຽກງານຊາຍແດນ ແລະ ພະລັງງາານ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ກໍາປູເຈຍ.
ກອງປະຊຸມຄັ້ງນີ້, ໄດ້ປະສົບຜົນສຳເລັດຢ່າງຈົບງາມ ແລະ ໄດ້ເປັນເອກະພາບຮັບຮອງເອົາເອກະສານສຸດທ້າຍຂອງກອງປະຊຸມ ເຊິ່ງມີເນື້ອໃນຍົກໃຫ້ເຫັນເຖິງຄວາມສໍາຄັນໃນການເພີ່ມທະວີຄວາມສາມັກຄີຂອງບັນດາພັກການເມືອງ ກໍຄື ການສຸມໃສ່ຄວາມພະຍາຍາມຮ່ວມກັນໃນການຮັບມືກັບບັນດາສິ່ງທ້າທ້າຍ ຕໍ່ສັນຕິພາບ, ຄວາມໝັ້ນຄົງ, ເສດຖະກິດ ແລະ ການພັດທະນາ ທີ່ບັນດາປະເທດໃນໂລກກໍາລັງຜະເຊີນຢູ່, ທັງເປັນການເພີ່ມທະວີການຮ່ວມມື ລະຫວ່າງ ບັນດາປະເທດອາຊຽນ ແລະ ປະເທດຕ່າງໆໃນໂລກ ເພື່ອເສີມຂະຫຍາຍຄວາມເຂັ້ມແຂງຮອບດ້ານ, ປະກອບສ່ວນເຂົ້າໃນການສ້າງສັນຕິພາບ, ມິດຕະພາບ ໃນພາກພື້ນສາກົນ.
ຂ່າວ-ພາບ: ຄຕພ
