ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະ ມົນຕີ, ລັດຖະມົນຕີ ກະຊວງປ້ອງກັນປະເທດ ໄດ້ຖະແຫຼງຂ່າວຜົນສຳເລັດຂອງກອງປະຊຸມລັດຖະມົນຕີປ້ອງກັນປະເທດອາຊຽນ (ADMM) ຄັ້ງທີ 18, ກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ (ADMM-Plus) ຄັ້ງທີ 11 ແລະ ກອງປະຊຸມປິ່ນອ້ອມອື່ນໆ ເຊິ່ງໄດ້ຈັດຂຶ້ນທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ, ສປປ ລາວ ໃນລະຫວ່າງວັນທີ 19-22 ພະຈິກ 2024. ກອງປະຊຸມກິດຈະກຳປິ່ນອ້ອມ ໄດ້ດຳເນີນໂດຍການເປັນເຈົ້າພາບ ແລະ ເປັນປະທານຂອງກະຊວງປ້ອງກັນປະເທດ ແຫ່ງ ສປປ ລາວ, ພາຍໃຕ້ຄຳຂວັນ: “ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງອາຊຽນ”. ກອງປະຊຸມ ADMM ຄັ້ງທີ 18 ໄດ້ຈັດຂຶ້ນໃນວັນທີ 20 ພະຈິກ 2024, ເຊິ່ງລວມມີ ບັນດາລັດຖະມົນຕີປ້ອງກັນປະເທດອາຊຽນ, ລວມທັງ ຕີມໍ-ແລັດສະເຕ ໃນນາມເປັນປະເທດສັງເກດການ ແລະ ເລຂາທິການໃຫຍ່ອາຊຽນ, ພ້ອມດ້ວຍຄະນະຜູ້ແທນທັງໝົດ ເຂົ້າຮ່ວມກອງປະຊຸມດັ່ງກ່າວ; ກອງປະຊຸມ ADMM ຄັ້ງນີ້ ໄດ້ປຶກສາຫາລືຫຼາຍວາລະທີ່ສຳຄັນ, ລວມທັງການລາຍງານຫຍໍ້ກ່ຽວກັບຜົນຂອງກອງປະຊຸມເຈົ້າໜ້າທີ່ອາວຸໂສປ້ອງກັນປະເທດອາຊຽນ, ການຮັບຮອງເອົາລະບຽບຫຼັກການເພີ່ມເຕີມວ່າດ້ວຍການສັງເກດການຂອງໜ່ວຍງານຜູ້ຊ່ຽວຊານໃນຂອບກອງປະຊຸມ ADMM-ບວກ, ເອກະສານຍຸດທະສາດວ່າດ້ວຍຄວາມພ້ອມຂອງກອງປະຊຸມ ADMM ໃນອະນາຄົດ, ບົດແນວຄວາມຄິດວ່າດ້ວຍກອງປະຊຸມການຮ່ວມມື ແລະ ການເຊື່ອມຈອດທາງທະເລ, ການສະເໜີເອົາມາດຕະຖານການປະຕິບັດງານຂອງກອງກຳລັງກຽມພ້ອມທະຫານອາຊຽນເພື່ອການຊ່ວຍເຫຼືອມະນຸດສະທຳ ແລະ ບັນເທົາທຸກໄພພິບັດ ໃຫ້ຄະນະກຳມະການຄຸ້ມຄອງໄພພິບັດອາຊຽນ ແລະ ເອກະສານຊ້ອນທ້າຍຂອງບົດແນວຄວາມຄິດວ່າດ້ວຍການສ້າງຄວາມກົມກຽວກິດຈະກຳການຮ່ວມມືຂອງກອງປະຊຸມ ADMM ແລະ ADMM-ບວກ; ກອງປະຊຸມ ADMM ຍັງໄດ້ຮັບຮອງເອົາການປະເມີນຜົນກ່ຽວກັບການເຂົ້າຮ່ວມສັງ ເກດການຂອງໜ່ວຍງານຜູ້ຊ່ຽວຊານໃນຂອບກອງປະຊຸມ ADMM-ບວກ ໃນຮອບວຽນປີ 2021-2023 ແລະ ການສະໝັກເຂົ້າຮ່ວມສັງເກດການຂອງໜ່ວຍງານດັ່ງກ່າວ ແລະ ໃນຮອບວຽນປີ 2024-2027; ສິ່ງສຳຄັນທີ່ສຸດ, ໃນກອງປະຊຸມຄັ້ງນີ້, ບັນດາປະເທດສະມາຊິກອາຊຽນ ໄດ້ເຫັນດີຢ່າງເປັນເອກະສັນ ແລະ ຮັບຮອງເອົາ ຖະແຫຼງ ການຮ່ວມຂອງກອງປະຊຸມ ADMM ຄັ້ງທີ 18, ເຊິ່ງເອີ້ນວ່າ: “ຖະແຫລງການຮ່ວມວຽງຈັນຂອງລັດຖະມົນຕີປ້ອງກັນປະເທດອາຊຽນ ວ່າດ້ວຍ ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງອາຊຽນ”. ຖະແຫຼງການດັ່ງກ່າວ ໄດ້ເນັ້ນໜັກບາງເນື້ອໃນ ທີ່ສຳຄັນ ຄືດັ່ງນີ້:
ການເພີ່ມທະວີຄວາມສາມັກຄີ ແລະ ຄວາມເປັນແກນກາງຂອງອາຊຽນ ເພື່ອເປັນພະລັງຂັບເຄື່ອນໃຫ້ແກ່ການພົວພັນຮ່ວມມືກັບພາຍນອກ; ການສະແດງຄວາມໝາຍໝັ້ນຂອງອາຊຽນ ໃນການສືບຕໍ່ການຮ່ວມມືດ້ານວຽກງານປ້ອງກັນຊາດ ແລະຄວາມໝັ້ນຄົງ ລະຫວ່າງ ບັນດາປະເທດສະມາຊິກອາຊຽນ-ບວກ ເພື່ອຮັບມືກັບບັນດາສິ່ງທ້າທາຍຕໍ່ຄວາມໝັ້ນຄົງຂອງພາກພື້ນ; ການເນັ້ນໜັກຄວາມສຳຄັນຕໍ່ການປົກປັກຮັກສາ ແລະ ການສືບຕໍ່ສົ່ງເສີມສັນຕິພາບ, ສະຖຽນລະພາບ, ຄວາມໝັ້ນຄົງທາງທະເລ ແລະ ການຮັບມືກັບໄພຂົ່ມຂູ່ ແລະ ສິ່ງທ້າທາຍຕໍ່ຄວາມໝັ້ນຄົງໃນພາກພື້ນ ໂດຍສັນຕິວິທີ; ການຢ້ຳຄືນຄວາມພະຍາຍາມຂອງອາຊຽນ ໃນການຈັດຕັ້ງປະຕິບັດ 5 ຂໍ້ຕົກລົງທີ່ເປັນເອກະສັນຂອງຜູ້ນຳອາຊຽນ; ການຮັບຮອງເອົາເອກະສານທີ່ສຳຄັນໃນຂອບການຮ່ວມມືຂອງກອງປະຊຸມ ADMM ແລະ ADMM-ບວກ; ການສະແດງຄວາມປິຕິຍິນດີຕໍ່ຖະແຫລງການຮ່ວມຂອງລັດຖະມົນຕີປ້ອງກັນປະເທດອາຊຽນ ວ່າດ້ວຍຜົນສຳເລັດຂອງກອງປະຊຸມ ADMM ໃນການຈັດຕັ້ງປະຕິບັດແຜນແມ່ບົດຂອງປະຊາຄົມການເມືອງ-ຄວາມໝັ້ນຄົງອາຊຽນ ໃນປີ 2025, “ຖະແຫລງຮ່ວມຂອງລັດຖະມົນຕີປ້ອງກັນປະເທດອາຊຽນ-ບວກ ວ່າດ້ວຍການສ້າງຄວາມເຂັ້ມແຂງໃນການຮັບມືກັບໄພພິບັດທີ່ໄດ້ຮັບຜົນກະທົບຈາກການປ່ຽນແປງສະພາບດິນຟ້າອາກາດ ແລະ ໄພພິບັດທາງທຳມະຊາດ, ລວມທັງການແລກປ່ຽນບົດຮຽນທີ່ດີ ແລະ ການສ້າງຂີດຄວາມສາມາດ”, ລວມທັງການສືບຕໍ່ເປັນປະທານອາຊຽນຂອງມາເລເຊຍ ໃນປີ 2025, ແຜນງານ 3 ປີຂອງໜ່ວຍງານຜູ້ຊ່ຽວຊານໃນຂອບກອງປະຊຸມ ADMM-ບວກ ໃນຮອບວຽນປີ 2024-2027 ແລະ ບັນຫາອື່ນໆທີ່ກ່ຽວຂ້ອງ.
ນອກຈາກ ກອງປະຊຸມ ADMM ແລ້ວ, ໃນວັນທີ 21 ພະຈິກ 2024, ກະຊວງປ້ອງປ້ອງກັນປະເທດພວກເຮົາ ຍັງໄດ້ເປັນເຈົ້າພາບ ແລະ ເປັນປະທານກອງປະຊຸມ ADMM-ບວກ ຄັ້ງທີ 11. ເຂົ້າຮ່ວມກອງປະຊຸມດັ່ງກ່າວ ລວມມີລັດຖະມົນຕີປ້ອງກັນປະເທດຂອງບັນດາປະເທດສະມາຊິກອາຊຽນ-ບວກ ທັງໝົດ 18 ປະເທດ, ເຊິ່ງໃນນັ້ນ ປະກອບມີ 10 ປະເທດສະມາຊິກອາຊຽນ ແລະ ອີກ 8 ປະເທດບວກ ຄື: ອົດສະຕຣາລີ, ຈີນ, ອິນເດຍ, ຍີ່ປຸ່ນ, ສ.ເກົາຫລີ, ຍີ່ປຸ່ນ, ນີວຊີແລນ, ຣັດເຊຍ ແລະ ອາເມລິກາ. ນອກນັ້ນ, ຍັງມີ ຕີມໍ-ແລັດສະເຕ ໃນນາມປະເທດສັງເກດການ ແລະ ເລຂາທິການໃຫຍ່ອາຊຽນ ກໍ່ໄດ້ເຂົ້າຮ່ວມ;
ກອງປະຊຸມ ADMM-ບວກ ຄັ້ງນີ້ ໄດ້ຮັບຟັງການລາຍງານຫຍໍ້ກ່ຽວກັບຜົນຂອງກອງປະຊຸມເຈົ້າໜ້າທີ່ອາວຸໂສປ້ອງກັນປະ ເທດອາຊຽນ-ບວກ ແລະ ການລາຍງານຂອງກອງເລຂາອາຊຽນ ກ່ຽວກັບການເຄື່ອນໄຫວວຽກງານທີ່ພົ້ນເດັ່ນຂອງອາຊຽນ; ບັນດາລັດຖະມົນຕີປ້ອງກັນປະເທດອາຊຽນ-ບວກ ຍັງໄດ້ແລກປ່ຽນສະພາບການເມືອງ-ຄວາມໝັ້ນຄົງທີ່ພົ້ນເດັ່ນໃນພາກພື້ນ ແລະ ສາກົນ ແລະ ແລກ ປ່ຽນທັດສະນະກ່ຽວກັບການຮັບມືກັບບັນດາສິ່ງທ້າທາຍຕໍ່ຄວາມໝັ້ນຄົງ ໃນປັດຈຸບັນ ແລະ ອະນາຄົດ; ວາລະທີ່ສຳຄັນທີ່ສຸດໃນກອງປະຊຸມດັ່ງກ່າວນີ້ ແມ່ນການຮັບຮອງເອົາ “ຖະແຫຼງຮ່ວມຂອງລັດຖະມົນຕີປ້ອງກັນປະເທດອາຊຽນ-ບວກ ວ່າດ້ວຍການສ້າງຄວາມເຂັ້ມແຂງໃນການຮັບມືກັບໄພພິບັດທີ່ໄດ້ຮັບຜົນກະທົບຈາກການປ່ຽນແປງສະພາບດິນຟ້າອາກາດ ແລະ ໄພພິບັດທາງທຳມະຊາດ, ລວມທັງການແລກປ່ຽນບົດຮຽນທີ່ດີ ແລະ ການສ້າງຂີດຄວາມສາ ມາດ”. ການຮັບຮອງເອົາຖະ ແຫຼງການດັ່ງກ່າວ ສະແດງເຖິງຜົນສຳເລັດອັນໜື່ງທີ່ມີຄວາມໝາຍຄວາມສຳຄັນໃນການເປັນປະທານກອງປະຊຸມ ADMM-ບວກ ຄັ້ງທີ 11 ທີ່ ສປປ ລາວ, ທັງເປັນການປະກອບສ່ວນອັນສຳຄັນເຂົ້າໃນການສົ່ງເສີມການ ຮ່ວມມື ລະຫວ່າງ ປະເທດສະມາຊິກອາຊຽນ ແລະ ອາຊຽນ-ບວກ ໃນການສ້າງຂີດຄວາມສາມາດ ເພື່ອຮັບມືກັບຜົນກະທົບຈາກໄພ ພິບັດທາງທຳມະຊາດ ແລະ ການປ່ຽນແປງສະພາບດິນຟ້າອາ ກາດ; ກະຊວງປ້ອງກັນປະເທດ ແຫ່ງ ສປປ ລາວ ໄດ້ມອບໂອນການເປັນປະທານກອງປະຊຸມ ADMM ຄັ້ງທີ 19 ແລະ ກອງປະຊຸມ ADMM-ບວກ ຄັ້ງທີ 12 ໃຫ້ແກ່ກະຊວງປ້ອງກັນປະເທດ ແຫ່ງ ມາເລເຊຍ ສືບຕໍ່ເປັນເຈົ້າພາບ ໃນປີ 2025; ໃນໄລຍະກອງປະຊຸມ, ພວກເຮົາ ຍັງໄດ້ຈັດກອງປະຊຸມບໍ່ເປັນທາງການຂອງລັດຖະມົນຕີປ້ອງກັນປະເທດອາຊຽນ-ສປ ຈີນ ແລະ ອາຊຽນ-ສ.ອາເມລິກາ ເພື່ອປຶກສາຫາລືກ່ຽວກັບການຮ່ວມມືດ້ານວຽກງານປ້ອງກັນຊາດ ລະຫວ່າງ ອາຊຽນ ກັບສອງປະເທດດັ່ງກ່າວ; ນອກນັ້ນ, ພວກເຮົາ ຍັງໄດ້ຈັດພິທີສະເຫຼີມສະຫຼອງການພົວພັນຮ່ວມມື ລະຫວ່າງ ອາຊຽນ-ອົດສະຕຣາລີ ຄົບຮອບ 50 ປີ ແລະ ອາຊຽນ-ສ.ເກົາຫລີ ຄົບຮອບ 35 ປີ, ເຊິ່ງເປັນກິດຈະກຳອັນໜື່ງທີ່ມີຄວາມໝາຍຄວາມສຳຄັນ ສຳລັບການເປັນປະທານອາຊຽນຂອງກະຊວງປ້ອງກັນປະເທດ ແຫ່ງ ສປປ ລາວ ໃນປີນີ້; ສັງເກດເຫັນວ່າ ໂດຍລວມແລ້ວ, ການເປັນເຈົ້າພາບ ແລະ ປະທານກອງປະຊຸມ ADMM ຄັ້ງທີ 18, ກອງປະຊຸມ ADMM-ບວກ ຄັ້ງທີ 11 ແລະ ກິດຈະກຳປິ່ນອ້ອມອື່ນໆ ໄດ້ດຳເນີນໄປດ້ວຍບັນຍາກາດທີ່ສ້າງສັນ ແລະ ມີເນື້ອໃນຄົບຖ້ວນ. ບັນດາປະເທດສະມາຊິກອາຊຽນ ແລະ ອາຊຽນ-ບວກ ໄດ້ມີສ່ວນຮ່ວມ ແລະ ປະກອບສ່ວນເຂົ້າໃນກອງປະຊຸມຄັ້ງນີ້ ດ້ວຍຜົນສຳເລັດຢ່າງຈົບງາມ.
