ໄລຍະເກືອບ 1 ປີ ຜ່ານມາ, GDP ຂອງປະເທດເຮົາ ຂະຫຍາຍຕົວສະເລ່ຍໃນລະດັບ 4.6% (ໂຕເລກສະຫຼຸບ 9 ເດືອນ) ຊຶ່ງຄາດຄະເນໝົດປີ ຈະສາມາດບັນລຸໄດ້ຕາມແຜນ (ສະພາແຫ່ງຊາດ ຮັບຮອງ 4.5%) ໂດຍໄດ້ແຮງຍູ້ຈາກຂະແໜງບໍລິການ, ການຂົນສົ່ງ ແລະ ການຂາຍຍົກ-ຂາຍຍ່ອຍ.
ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ຂຶ້ນລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ ປະຈໍາປີ 2024 ແລະ ແຜນການ ປະຈໍາປີ 2025 ຕິດພັນກັບວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ແຜນການລົງທຶນ ປະຈໍາປີ 2025, ແຜນງົບປະມານ ໃຫ້ກະຊວງ-ອົງການ ແລະ ທ້ອງຖິ່ນ ປະຈໍາປີ 2025; ການດັດແກ້ງົບປະມານແຫ່ງລັດ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 18 ພະຈິກ ນີ້ ພານໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານ ສອນໄຊ ສີພັນດອນ ກ່າວວ່າ: ໃນໄລຍະເກືອບ 1 ປີ ຜ່ານມາ ເຖິງວ່າຈະພົບຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສະເພາະບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າເພີ່ມຂຶ້ນ ທີ່ກະທົບຕໍ່ຄ່າຄອງຊີບ, ໜີ້ສິນຕ່າງປະເທດ ແລະ ຫຼາຍແຂວງ ກໍໄດ້ຖືກຜົນກະທົບຢ່າງໜັກໜ່ວງຈາກໄພນໍ້າຖ້ວມ (ໜັກກວ່າໝູ່ແມ່ນຢູ່ແຂວງຫຼວງນໍ້າທາ ແລະ ແຂວງຫົວພັນ), ແຕ່ພາຍໃຕ້ການນໍາພາ-ຊີ້ນໍາ ຢ່າງໃກ້ຊິດຂອງສູນກາງພັກ ກໍຄືການຕິດຕາມກວດກາ ຢ່າງເປັນປົກກະຕິຂອງສະພາແຫ່ງຊາດ ແລະ ທຸກພາກສ່ວນໃນສັງຄົມ, ລັດຖະບານ ແລະ ອົງການປົກຄອງທ້ອງຖິ່ນ ກໍໄດ້ສືບຕໍ່ສຸມໃສ່ຜັນຂະຫຍາຍ ແລະ ແກ້ໄຂບັນຫາລວມຂອງຊາດ ຢ່າງຕັ້ງໜ້າ, ເຮັດໃຫ້ເສດຖະກິດ ຂອງປະເທດເຮົາສືບຕໍ່ຂະຫຍາຍຕົວ ແລະ ສາມາດປະຄັບປະຄອງ ບໍ່ໃຫ້ຕົກເປັນປະເທດທີ່ບໍ່ຊໍາລະໜີ້ສິນໄດ້, ການຈັດເກັບລາຍຮັບ ກໍໄດ້ລື່ນແຜນທີ່ກໍານົດໄວ້ ເປັນປີທີ 4 ຢ່າງຕໍ່ເນື່ອງ, ຍັງຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບເປັນລະບຽບຮຽບຮ້ອຍໂດຍພື້ນຖານ.
ລັດຖະບານ ໄດ້ສຸມໃສ່ຈັດຕັ້ງປະຕິບັດບັນດາໂຕເລກຄາດໝາຍ ແລະ ມາດຕະການຕ່າງໆ ຕາມມະຕິກອງປະຊຸມສະພາແຫ່ງຊາດ ແລະ ແຜນວຽກຈຸດສຸມຂອງລັດຖະບານ ໃນປີ 2024 ທີ່ກໍານົດໄວ້ ໂດຍສະເພາະການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຕາມມະຕິ ເລກທີ 19/ກມສພ, ໂດຍລວມເຫັນວ່າ ການພັດທະນາຂະແໜງເສດຖະກິດ ມີທັງໝົດ 11 ຕົວຊີ້ວັດ. ໃນນີ້, ມີ 10 ຕົວຊີ້ວັດ ຄາດວ່າຈະບັນລຸຕາມແຜນ ແລະ ມີ 1 ຕົວຊີ້ວັດຄາດວ່າຈະບໍ່ສາມາດບັນລຸແຜນ ຄື: ການຜະລິດເຂົ້າເປືອກ ໝົດປີຄາດວ່າຈະປະຕິບັດໄດ້ 3.64 ລ້ານໂຕນ ເທົ່າກັບ 94% ຂອງແຜນການ (ມະຕິ 3.86 ລ້ານໂຕນ) ສາເຫດຍ້ອນໄດ້ຮັບຄວາມເສຍຫາຍຈາກໄພພິບັດທໍາມະຊາດນໍ້າຖ້ວມ ທີ່ເກີດຂຶ້ນໃນໄລຍະລະດູຝົນ.
ໃນໄລຍະເກືອບ 1 ປີ ຜ່ານມາ, GDP ຂອງປະເທດເຮົາ ຂະຫຍາຍຕົວສະເລ່ຍໃນລະດັບ 4.6% (ໂຕເລກສະຫຼຸບ 9 ເດືອນ) ຊຶ່ງຄາດຄະເນໝົດປີ ຈະສາມາດບັນລຸໄດ້ຕາມແຜນ (ສະພາແຫ່ງຊາດ ຮັບຮອງ 4.5%). ປັດໄຈຕົ້ນຕໍ ທີ່ເຮັດໃຫ້ໂຕເລກຂອງ GDP ເພີ່ມຂຶ້ນ ແມ່ນຂະແໜງບໍລິການ, ການຂົນສົ່ງ ແລະ ການຂາຍຍົກ- ຂາຍຍ່ອຍ; ໃນນັ້ນ, ເພີ່ມຂຶ້ນຫຼາຍກວ່າໝູ່ແມ່ນ ຈາກການເປັນເຈົ້າພາບກອງປະຊຸມສຸດຍອດອາຊຽນ ແລະ ການເປີດປີທ່ອງທ່ຽວລາວ ຊຶ່ງເຮັດໃຫ້ມີນັກທ່ອງທ່ຽວ ຈາກພາຍໃນ ແລະ ຕ່າງປະເທດເດີນທາງທ່ອງທ່ຽວໃນ ສປປ ລາວ ລວມທັງໝົດຫຼາຍກວ່າ 5 ລ້ານເທື່ອຄົນ, ສ້າງລາຍຮັບໝູນວຽນໄດ້ຫຼາຍກວ່າ 1 ພັນລ້ານໂດລາ ໂດຍສະເພາະນັກທ່ອງທ່ຽວພາຍໃນ ເຫັນວ່າບັນລຸໄດ້ເກີນແຜນຂອງປີ (127%). ນອກນັ້ນ, ຂະແໜງກະສິກໍາ, ຂະແໜງອຸດສາຫະກໍາປຸງແຕ່ງ ແລະ ກໍ່ສ້າງ ກໍມີການຂະຫຍາຍຕົວດີສົມຄວນ ອັນພົ້ນເດັ່ນ ແມ່ນການຜະລິດສະບຽງອາຫານ ຮອດປັດຈຸບັນ ສາມາດປະຕິບັດໄດ້ 3,185.10 ຕື້ກີບ ເທົ່າກັບ 74.66% ຂອງແຜນການປີ; ການຜະລິດແຮ່ທາດ ທັງຮູບແບບປົກກະຕິ ແລະ ທົດລອງປະຕິບັດໄດ້ 34,000 ກວ່າຕື້ກີບ ເທົ່າກັບ 127.52% ແຜນການປີ.
ມູນຄ່າການຄ້າຕ່າງປະເທດ ປະຕິບັດໄດ້ 13,798.33 ລ້ານໂດລາ, ເທົ່າກັບ 86.19% ຂອງ ແຜນການປີ (16,010.09 ລ້ານໂດລາ); ໃນນັ້ນ, ມູນຄ່າການສົ່ງອອກ ປະຕິບັດໄດ້ 7,314.85 ລ້ານໂດລາ, ເທົ່າກັບ 83.84% ຂອງແຜນການປີ (8,724.33 ລ້ານໂດລາ), ມຸນຄ່າການນໍາເຂົ້າ ປະຕິບັດໄດ້ 6,483.48 ລ້ານໂດລາ ເທົ່າກັບ 88.99% ຂອງແຜນການປີ (7,285.76 ລ້ານໂດລາ). ອັນພົ້ນເດັ່ນແມ່ນການສົ່ງອອກຜະລິດຕະພັນກະສິກໍາ ປະຕິບັດໄດ້ 1 ພັນກວ່າລ້ານໂດລາ ເທົ່າກັບ 86.94% ຂອງແຜນການປີ.
ດ້ານການລົງທຶນ ໃນໄລຍະ 9 ເດືອນຜ່ານມາ ປະຕິບັດໄດ້ 69,110.57 ຕື້ກີບ ລື່ນແຜນ 22%; ໃນນີ້, ການລົງທຶນຈາກງົບປະມານຂອງລັດ ປະຕິບັດໄດ້ 4,013.41 ຕື້ກີບ ເທົ່າກັບ 80% ຂອງແຜນການ ແລະ ການລົງທຶນຈາກພາກເອກະຊົນພາຍໃນ ແລະ ຕ່າງປະເທດ ປະຕິບັດໄດ້ 2.61 ຕື້ໂດລາ ເທົ່າກັບ 56,132.25 ຕື້ກີບ ຫຼື ເທົ່າກັບ 173% ຂອງແຜນການ.
