—-
ໃນຕອນເຊົ້າວັນທີ 13 ພະຈິກ 2023 ທີ່ຫ້ອງປະຊຸມຊັ້ນ2 ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງສະຫວັນນະເຂດ ທາງຫ້ອງການ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທຽວ ໄດ້ລົງມາເເຄື່ອນໄຫວເຮັດວຽກການລົບລ້າງໃບເກັບເງິນ ກອງທຶນ 1$ ແລະ ຊຸກຍູ້ກວດກາການຈັດຕັ້ງປະຕິບັດ ລາຍຮັບກອງທຶນການທ່ອງທຽວປະຈໍາປີ 2023 ທີ່ແຂວງສະຫວັນນະເຂດ ໂດຍການເປັນປະທານຂອງທ່ານ ຄຳພັນ ພົມວຽງໄຊ ຮອງຫົວໜ້າພະແນກ ຖວທ ແຂວງ, ເຂົ້າຮ່ວມມີ ທ່ານ ວິໄລທອງ ທຳມະວົງ ຮອງຫົວໜ້າສ່ວຍສາອາກອນແຂວງ ,ທ່ານ ທອງສົດ ໂຄດຕະວົງສາ ຫົວໜ້າພະແນກລາຍຮັບ ແລະ ກອງທຶນຂອງລັດຫ້ອງການ ກະຊວງ ຖວທ , ມີຄະນະຮັບຜິດຊອບລົບລ້າງໃບເກັບເງິນກອງທຶນ ຈາກຫ້ອງການກະຊວງ ຖວທ, ຄະນະບໍລິຫານ-ຈັດຕັ້ງກວດກາ ແລະ ວິຊາການກ່ຽວຂ້ອງຂອງຂະແໜງການ ພະແນກ ຖວທ ແຂວງເຂົ້າຮ່ວມ.
ຈຸດປະສົງການລົງມາເຄື່ອນໄຫວເຮັດວຽກໃນຄັ້ງນີ້ກໍເພື່ອລົບລ້າງໃບເກັບເງິນກອງທຶນການທ່ອງທ່ຽວ1 $ ແລະ ຊຸກຍູ້ການກວດກາ ການຈັດຕັ້ງປະຕິບັດ ລາຍຮັບກອງທຶນການທ່ອງທ່ຽວປີ2023 ເຊິ່ງຄະນະຮັບຜິດຊອບ ລົງກວດນັບໃບເກັບເງິນກອງທຶນການທ່ອງທ່ຽວ ກະຊວງ ຖວທ ຮ່ວມກັບ ພະແນກ ຖວທ ແຂວງ ສະຫວັນນະເຂດ ແລະ ສ່ວຍສາອາກອນປະຈໍາແຂວງ ກວດກາໃບເກັບເງິນກອງທຶນການທ່ອງທ່ຽວ ແລະ ໄດ້ມີການກວດນັບຕົວຈິງ, ໃບເກັບເງິນກອງທຶນການທ່ອງທ່ຽວຢູ່ດ່ານສາກົນ ເກັບຈາກນັກທ່ອງທຽວເຂົ້າ-ອອກ ສປປ ລາວ ໃນລາຄາ 1 ໂດລາຕໍ່ຄົນ ຕໍ່ຄັ້ງ ຈໍານວນ 1,000,000ໃບ (ບໍ່ໄດ້ນໍາໃຊ້) ແລະ ໃບເກັບເງິນ ກອງທຶນການທ່ອງທ່ຽວ ຕາມກິດຈະກໍາ ການທ່ອງທ່ຽວຂອງບັນດາພະແນກ ຖວທ ແຂວງ, ນະຄອນຫຼວງວຽງຈັນ ຈໍານວນ 50,000ໃບ (ບໍ່ໄດ້ນໍາໃຊ້) ,ການໄລ່ລຽງໃບເກັບເງິນກອງທຶນການທ່ອງທ່ຽວ ເພື່ອທໍາລາຍ ຢູ່ບັນດາພະແນກ ຖວທ ແຂວງ, ນະຄອນຫຼວງວຽງຈັນ ແມ່ນໃຫ້ຄະນະຮັບຜິດຊອບລົບລ້າງໃບເກັບເງິນກອງທຶນ ກະຊວງ ຖວທ ຕາມຂໍ້ຕົກລົງສະບັບເລກທີ 1106/ຖວທ, ລົງວັນທີ 10 ຕຸລາ 2024 ສົມທົບກັບ ພະແນກ ຖວທ ແຂວງ, ນະຄອນຫຼວງວຽງຈັນ ແລະ ສ່ວຍສາອາກອນປະຈຳແຂວງ, ນະຄອນຫຼວງວຽງຈັນ.
ສໍາລັບການທໍາລາຍໃບເກັບເງິນກອງທຶນການທ່ອງທ່ຽວ ຢູ່ພະແນກ ຖວທ ແຂວງສະຫວັນນະເຂດ ແມ່ນໃຫ້ ແຕ່ງຕັ້ງຄະນະກຳມະການ ເພື່ອທໍາລາຍໃບເກັບເງິນດັ່ງກ່າວ ຕາມລະບຽບຂອງສ່ວຍສາອາກອນ ໂດຍປະກອບ ມີ ພະແນກ ຖວທ ແຂວງສະຫວັນນະເຂດ, ສ່ວຍສາອາກອນປະຈຳແຂວງ ແລະ ພາກສ່ວນກ່ຽວຂ້ອງ. ພາຍຫຼັງທໍາລາຍແລ້ວໃຫ້ລາຍງານຫາກະຊວງ ຖວທ ໃຫ້ສຳເລັດພາຍໃນວັນທີ 30 ທັນວາ 2024 ນີ້.
