ກອງພັນໃຫຍ່ 661 ໄດ້ຈັດກອງປະຊຸມສະຫຼຸບຖອດຖອນບົດຮຽນວຽກງານຮອບດ້ານປະຈຳ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024 ຂຶ້ນຫວ່າງບໍ່ດົນມານີ້ ໂດຍການເປັນປະທານຂອງ ສະຫາຍ ພັນເອກ ບຸນປອນ ລົມພະຈັນ ຫົວໜ້າການທະຫານ ກອງພັນໃຫຍ່ 661, ມີຄະນະພັກ-ຄະນະບັນຊາກ່ຽວຂ້ອງເຂົ້າຮ່ວມ.
ສະຫາຍ ພັນໂທ ແຫຼວຄໍາ ຈັນທະວົງ ຫົວໜ້າພະແນກບໍລິຫານ ກອງພັນໃຫຍ່ 661 ໄດ້ຜ່ານບົດສະຫຼຸບຕີລາຄາ ຜົນງານການເຄື່ອນໄຫວວຽກງານຮອບດ້ານ 6 ເດືອນຜ່ານມາວ່າ: ຄະນະພັກ, ຄະນະບັນຊາໄດ້ຖືເອົາວຽກງານເຮັດໃຫ້ສະພາບມີຄວາມສະຫງົບເປັນບັນຫາສຳຄັນ ໄດ້ຊີ້ນໍາພະແນກການ, ກອງພັນນ້ອຍຈັດຕັ້ງພະນັກງານລົງບ້ານພື້ນຖານ ປະສານສົມທົບແລກປ່ຽນບົດຮຽນກັບອໍານາດການປົກຄອງທ້ອງຖິ່ນ ຂອບເຂດກົມກອງຮັບຜິດຊອບເພື່ອກຳແໜ້ນສະ ພາບຮອບດ້ານ, ຮັບປະກັນເຮັດໃຫ້ຂອບເຂດກົມກອງຕັ້ງທັບຢູ່ມີຄວາມສະຫງົບໂດຍພື້ນຖານ, ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດໃຫ້ນາຍ ແລະ ພົນທະຫານດໍາເນີນຊີວິດການເມືອງ, ຈັດຕັ້ງເຜີຍແຜ່, ເຊື່ອມຊຶມມະຕິ, ຄໍາສັ່ງ ແລະ ຈັດຕັ້ງປາຖະກະຖາວັນສໍາຄັນຕ່າງໆ ຕິດພັບກັບການຍູ້ແຮງຂະບວນການແຂ່ງຂັນກິລາ-ສິລະປະ-ວັນນະຄະດີ ຂໍ່ານັບຮັບຕ້ອນວັນປະຫວັດສາດສໍາຄັນຂອງຊາດ, ຂອງພັກ, ຂອງກອງທັບໃຫ້ມີບັນຍາກາດຟົດຟື້ນຕໍ່ເນື່ອງ, ເອົາໃຈໃສ່ປັບປຸງ-ກໍ່ສ້າງພັກຕາມ 5 ຫຼັກການ 3 ທິດນໍາ ແລະ ຄໍາສັ່ງແນະນໍາຄະນະພັກກະຊວງປ້ອງກັນປະເທດ, ຈັດຕັ້ງຄະ ນະຊີ້ນໍາຊຸກຍູ້ຄະນະພັກຮາກຖານ ປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ສ້າງແຜນກໍານົດພະນັກງານສືບທອດ-ປ່ຽນແທນ ແລະ ບໍາລຸງ-ກໍ່ສ້າງຖັນແຖວພະນັກງານການນໍາບັນຊາ, ພະນັກງານວິຊາສະເພາະ,ໜັກແໜ້ນດ້ານຄຸນທາດການເມືອງ, ມີຄວາມຮູ້, ຄວາມສາມາດ, ຄຸນສົມບັດ-ສິນທໍາປະຕິວັດ, ຊີ້ນໍາສອງອົງການຈັດຕັ້ງມະຫາຊົນເຄື່ອນໄຫວຕາມພາລະບົດບາດ ແລະ ອໍານວຍຄວາມສະດວກຢ່າງເຕັມສ່ວນ, ຊີ້ນໍາຂະແໜງປ້ອງກັນພາຍໃນກໍາສະພາບການເມືອງແນວຄິດ, ການເຄື່ອນໄຫວຂອງພະນັກງານ-ນັກຮົບເພື່ອຕ້ານ ແລະ ສະກັດກັ້ນປະກົດການຫຍໍ້ທໍ້ທີ່ອາດຈະເກີດຂຶ້ນປົກປັກຮັກສາບົວລະບັດສ້ອມແປງ ແລະ ນໍາໃຊ້ພາຫະນະ-ເຕັກນິກ, ອາວຸດ-ກະສຸນຕາມຂໍ້ກໍານົດ, ຕອບສະໜອງວຽກງານກຽມພ້ອມສູ້ຮົບ ແລະ ຝຶກແອບຮໍ່າຮຽນຕາມຄໍາສັ່ງຂອງຂັ້ນເທິງ ກໍຄືແຜນການຂອງກົມກອງ.
ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ປະກອບຄຳຄິດຄຳເຫັນໃສ່ບົດສະຫຼຸບ ແລະ ທິດທາງແຜນການ 6 ເດືອນທ້າຍປີ ເພື່ອຖອດຖອນບົດຮຽນເສີມຂະຫຍາຍຈຸດດີ, ແກ້ໄຂຈຸດອ່ອນຂໍ້ຄົງຄ້າງ ເຮັດໃຫ້ບົດສະຫຼຸບທັງສອງພາກມີເນື້ອໃນຖືກຕ້ອງ ແລະ ແທດເໝາະກັບສະພາບຄວາມເປັນຈິງຂອງກົມກອງໃຫ້ບັນລຸຄາດໝາຍ, ມີທ່າກ້າວຂະຫຍາຍຕົວ ແລະ ພົ້ນເດັ່ນຂຶ້ນກວ່າເກົ່າ.
ຂ່າວ-ພາບ: ໄພນາລິນ ອິນທະແສງ
