ຂ່າວຕ່າງປະເທດລາຍງານ ຫວ່າງມໍ່ໆມານີ້ ວ່າ: ກົດໝາຍໃໝ່ຂອງລັດຖະບານອົສຕຣາລີ ກຽມກຳນົດໃຫ້ທະນາຄານອົສຕຣາລີ ຊົດເຊີຍຄ່າເສຍຫາຍແກ່ລູກຄ້າທີ່ເສຍເງິນຈາກການຖືກຫຼອກລວງ.
ທ່ານ ສະຕີເຟນ ໂຈນ ຜູ້ຊ່ວຍລັດຖະມົນຕີກະຊວງການເງິນ ລະບຸວ່າ: ກົດໝາຍໃໝ່ນີ້ໃຫ້ຄວາມຊ່ວຍເຫຼືອຜູ້ທີ່ຕົກເປັນເຫຍື່ອຖືກຫຼອກລວງໃຫ້ໄດ້ເງິນຄືນນ້ອຍເກີນໄປ ຊຶ່ງໃນຫຼາຍກໍລະນີຜູ້ຄົນບໍ່ໄດ້ຮັບການຊົດເຊີຍ ເນື່ອງຈາກຖືກຫຼອກໃຫ້ໂອນເງິນຜ່ານການເຮັດທຸລະກຳທີ່ໄດ້ຮັບອະນຸຍາດ ຊຶ່ງໝາຍຄວາມວ່າບໍ່ໄດ້ຂັດກັບກົດໝາຍໃນປັດຈຸບັນ.
ກ່ອໜ້ານີ້, ລັດຖະບານອົສຕຣາລີ ໄດ້ຈັດຕັ້ງສູນຕໍ່ຕ້ານການຫຼອກລວງແຫ່ງຊາດ ໃນເດືອນກໍລະກົດ 2023 ເພື່ອປາບປາມກຸ່ມມິດສາຊີບ, ໂດຍທ່ານ ໂຈນ ກ່າວວ່າ: ການປາບປາມປະສົບຄວາມສຳເລັດໃນລະດັບໜຶ່ງ ແຕ່ທະນາຄານ, ບໍລິສັດໂທລະຄົມມະນາຄົມ ແລະ ແພລັດຟອມດີຈີຕອນຈະຕ້ອງດຳເນີນການປ້ອງກັນຫຼາຍຂຶ້ນອີກ.
ພາຍໃຕ້ມາດຕະການປາບປາມໄລຍະທີສອງ ກຸ່ມທະນາຄານ, ແພລັດຟອມດີຈີຕອນ ແລະ ບໍລິສັດ ໂທລະຄົມມະນາຄົມ ຈະປະເຊີນກັບການລົງໂທດ ຫາກບໍ່ດຳເນີນການກວດສອບໃນແບບປ້ອງກັນຕາມກົດໝາຍໃໝ່ ທີ່ປ້ອງກັນການສູນເສຍຈາກການຫຼອກລວງ.
ໃນເດືອນເມສາ ຜ່ານມາ ສູນດັ່ງກ່າວ ເປີດເຜີຍວ່າ: ຊາວອົສຕຣາລີສູນເສຍເງິນຈາກການຖືກຫຼອກລວງ ລວມເປັນເງິນ 2,74 ຕື້ໂດລາອົສຕຣາລີ ໃນປີ 2023 ຫຼຸດລົງ 13,1% ໃນປີ 2022 ໂດຍຄົນອາຍຸ 65 ປີຂຶ້ນໄປ ເປັນກຸ່ມຄົນອາຍຸດຽວທີ່ສູນເສຍເງິນຈາກການຖືກຫຼອກລວງໃນປີ 2023 ຫຼາຍກວ່າ ປີ 2022.
ທັງນີ້, ການຫຼອກລວງໃຫ້ລົງທຶນສ້າງມູນຄ່າຄວາມເສຍຫາຍຫຼາຍທີ່ສຸດ ຄິດເປັນ 47,7% ຂອງການສູນເສຍເງິນຈາກການຫຼອກລວງທັງໝົດ ຮອງລົງມາຄືການຫຼອກລວງທີ່ຖືກຄວບຄຸມອຸປະກອນຈາກໄລຍະໄກ ແລະ ການຫຼອກໃຫ້ຫຼົງຮັກ.
