ຂ່າວສານຫວຽດນາມລາຍງານວ່າ: ກອງທຶນເງິນຕາສາກົນ (IMF) ຮັກສາການຄາດຄະເນການເຕີບໂຕເສດຖະກິດຂອງໂລກສໍາລັບປີ 2024, ເຖິງແມ່ນວ່າຈະຫຼຸດການຄາດຄະເນການເຕີບໂຕເສດຖະກິດຢູ່ ອາເມຣິກາ ແລະ ຍີ່ປຸ່ນ, ໃນຂະນະດຽວກັນຍັງໄດ້ກ່າວເຕືອນກ່ຽວກັບຄວາມສ່ຽງຂອງອັດຕາເງິນເຟີ້ ແລະ ຄວາມເຄັ່ງຕຶງດ້ານການຄ້າທີ່ຈະມາເຖິງ.
ໃນບົດລາຍງານການຄາດຄະເນເສດຖະກິດໂລກທີ່ປະກາດໃນວັນທີ 16 ກໍລະກົດ ຜ່ານມາ, IMF ຄາດຄະເນວ່າ: ເສດຖະກິດໂລກຈະເຕີບໂຕ 3,2% ໃນປີ 2024, ບໍ່ປ່ຽນແປງຈາກການຄາດຄະເນໃນເດືອນເມສາ. ການຄາດຄະເນສໍາລັບປີ 2025 ແມ່ນ 3,3%. IMF ກ່າວວ່າ: ກິດຈະກໍາທົ່ວໂລກ ແລະ ການຄ້າໂລກ ໄດ້ເພີ່ມຂຶ້ນໃນຕົ້ນປີນີ້, ຍ້ອນການສົ່ງອອກທີ່ເຂັ້ມແຂງຈາກອາຊີ, ໂດຍສະເພາະໃນຂະແໜງເຕັກໂນໂລຊີ.
ຈີນ ແລະ ອິນເດຍ ຄາດວ່າຈະຊຸກຍູ້ການເຄື່ອນໄຫວຢູ່ອາຊີ. ການເຕີບໂຕທາງເສດຖະກິດຂອງຈີນ ໃນປີ 2024 ແມ່ນໄດ້ຮັບການປັບປຸງຂຶ້ນເປັນ 5% ໃນການຟື້ນຕົວການບໍລິໂພກຂອງເອກະຊົນ ແລະ ການສົ່ງອອກທີ່ເຂັ້ມແຂງ ແລະ ອິນເດຍ ຄາດວ່າຈະບັນລຸ 7%, ສ່ວນໜຶ່ງແມ່ນເນື່ອງຈາກທ່າອ່ຽງໃນດ້ານການບໍລິໂພກທີ່ດີຂຶ້ນ. ເຂດເອີຣົບຍັງສະແດງໃຫ້ເຫັນສັນຍານທາງບວກທີ່ຈະຟື້ນຕົວ.
