ເມື່ອບໍ່ດົນມານີ້, ຢູ່ສະຖານທູດຝຣັ່ງ ປະຈຳລາວ, ທ່ານ ນາງ ຊີວ-ແລັງ ຊູອອກ ເອກອັກຄະລັດຖະທູດຝຣັ່ງ ປະຈຳ ສປປ ລາວ ໄດ້ຮ່ວມລົງນາມສັນຍາຊ່ວຍເຫລືອລ້າ ໃຫ້ແກ່ 8 ອົງການຈັດຕັ້ງຂອງລາວ ເພື່ອສົ່ງເສີມຄວາມສະເໝີພາບ ລະຫວ່າງ ຍິງ-ຊາຍ ພາຍໃຕ້ແຜນງານກອງທຶນຝຣັ່ງ ສຳລັບອົງການຈັດຕັ້ງທາງສັງຄົມ (FEF-OSC) ປະຈຳປີ 2024, ປະກອບມີ 8 ໂຄງການທີ່ຖືກຄັດເລືອກ ແລະ ຈະຈັດຕັ້ງປະຕິບັດໃນ 6 ແຂວງຄື: ແຂວງບໍ່ແກ້ວ, ສະລະວັນ, ວຽງຈັນ, ສະຫວັນນະເຂດ, ຜົ້ງສາລີ ແລະ ແຂວງຊຽງຂວາງ ເຊິ່ງໂຄງການທີ່ຖືກຄັດເລືອກໃນລາວ ແມ່ນສຸມໃສ່ການຕ້ານການໃຊ້ຄວາມຮຸນແຮງຕໍ່ແມ່ຍິງ, ສົ່ງເສີມການສ້າງຄວາມເຂັ້ມແຂງດ້ານເສດຖະກິດແກ່ແມ່ຍິງ ແລະ ການປັບປຸງການເຂົ້າເຖິງການສຶກສາທີ່ມີຄຸນນະພາບຂອງແມ່ຍິງ ແລະ ເດັກຍິງ ລວມທັງ ຄວາມຍຸຕິທຳ ແລະ ວັດທະນະທຳ.
ກອງທຶນ FEF-OSC ໄດ້ເລືອກຫົວຂໍ້ ສົ່ງເສີມຄວາມສະເໝີພາບ ຍິງ-ຊາຍ ເຊິ່ງເປັນສ່ວນໜື່ງຂອງຍຸດທະສາດແຫ່ງຊາດ ແລະ ລະດັບໂລກ ຂອງລັດຖະບານຝຣັ່ງ ທີ່ແນໃສ່ສົ່ງເສີມສິດທິແມ່ຍິງ ແລະ ຄວາມສະເໝີພາບ ລະຫວ່າງ ຍິງ-ຊາຍ. ບັນຫາຄວາມສະເໝີພາບຍິງ-ຊາຍ ນອກຈາກຈະຖືກກຳນົດເປັນບູລິມະສິດໜຶ່ງໃນທຸກໂຄງການຂອງປະເທດຝຣັ່ງ, ການສົ່ງເສີມຄວາມສະເໝີພາບ ລະຫວ່າງ ຍິງ-ຊາຍ ຍັງເປັນຫົວໃຈສຳຄັນ ແລະ ເປັນເປົ້າໝາຍຫລັກຂອງແຜນງານກອງທຶນດັ່ງກ່າວ. ສຳລັບ 8 ໂຄງການທີ່ຖືກຄັດເລືອກ ໃນປີນີ້, ປະກອບມີ: ສະມາຄົມເພື່ອການພັດທະນາ ແລະ ສົ່ງເສີມຄວາມເປັນຜູ້ນຳຂອງແມ່ຍິງ(ADPWL) ຕາງໜ້າໂດຍ ທ່ານ ນາງ ບົວຄຳ ສີທະວົງ ໄດ້ຮັບທຶນຊ່ວຍເຫລືອ ຈຳນວນ 328 ລ້ານກວ່າກີບ ເພື່ອຈັດຕັ້ງປະຕິບັດໂຄງການ ທີ່ແນໃສ່ຢຸດຕິການໃຊ້ຄວາມຮຸນແຮງຕໍ່ຜູ້ໃຫ້ບໍລິການທາງເພດ ແລະ ຊ່ວຍໃຫ້ພວກເຂົາໄດ້ເຂົ້າເຖິງການບໍລິການສຸຂະພາບໃນນະຄອນຫລວງວຽງຈັນ; ສະມາຄົມເພື່ອພັດທະນາແມ່ຍິງ ແລະ ການສຶກສາກົດໝາຍ(ADWLE) ຕາງໜ້າໂດຍ ທ່ານ ນາງ ອິນທະນາ ບຸບຜາສະຫວັນ ລົງນາມຮັບທຶນຊ່ວຍເຫລືອ 448 ລ້ານກວ່າກີບ ໂດຍມີເປົ້າໝາຍຊ່ວຍເຫລືອແມ່ຍິງ ແລະ ເດັກນ້ອຍ ດ້ອຍໂອກາດ ໃຫ້ໄດ້ຮັບການບໍລິການສຸຂະພາບໂດຍບໍ່ເສຍຄ່າ, ໃຫ້ການຊ່ວຍເຫລືອແກ່ຜູ້ເຄາະຮ້າຍຈາກການໃຊ້ຄວາມຮຸນແຮງທາງເພດ (VBG) ແລະ ຊ່ວຍເຫລືອແມ່ຍິງໃນການປົກປ້ອງສິດທິດ້ານກົດໝາຍ ດ້ວຍການຈົດທະບຽນສົມລົດໃຫ້ຖືກຕ້ອງຕາມກົດໝາຍ; ສະມາຄົມສົ່ງເສີມການອະນຸລັກສິລະປະວັນນະຄະດີ(APPAL) ຕາງໜ້າຮັບທຶນ ໂດຍ ທ່ານ ສຸກພັນສາ ພູຜາສຸກ ຈຳນວນ 227 ລ້ານກີບ ເພື່ອຊ່ວຍເຫລືອນັກສິລະປິນ ແລະ ນັກກະວີ ໃນການສ້າງຜົນງານສິລະປະ ທີ່ສະທ້ອນເຖິງຄວາມສະເໝີພາບ ຍິງ-ຊາຍ ໃນສັງຄົມລາວ; ສະມາຄົມຮ່ວມມືເພື່ອການພັດທະນາ ແລະ ສົ່ງເສີມພູມປັນຍາທ້ອງຖິ່ນ (COSKA) ຕາງໜ້າໂດຍ ທ່ານ ມະນີວອນ ວໍຣະຈັກ ຮັບທຶນຊ່ວຍເຫລືອ 500 ລ້ານກີບ ເພື່ອຈັດຕັ້ງປະຕິບັດໂຄງການຢູ່ແຂວງຜົ້ງສາລີ ໃນການສ້າງຄວາມເຂັ້ມແຂງດ້ານເສດຖະກິດໃຫ້ແກ່ຊາວໜຸ່ມເພດຍິງ ແລະ ຊ່ວຍເຫລືອໃນການປ້ອງກັນການໃຊ້ຄວາມຮຸນແຮງທາງເພດ.
ພ້ອມນີ້, ຍັງມີ ມູນນິທິຊ່ວຍເຫລືອຄົນທຸກຍາກ ແຫ່ງ ສປປ ລາວ ສາຂາຊຽງຂວາງ(FAPPL XK) ຕາງໜ້າໂດຍ ທ່ານ ນາງ ຂັນຄຳ ໄຊຍາລາດ ລົງນາມຮັບເງິນຊ່ວຍເຫລືອ ເກືອບ 500 ລ້ານກີບ ເພື່ອຈັດຕັ້ງປະຕິບັດໂຄງການທີ່ມີເປົ້າໝາຍຫລັກ ຄືເສີມສ້າງຄວາມສາມາດ ດ້ານການເຮັດທຸລະກິດ ແລະ ທັກສະຄວາມສາມາດຂອງການເປັນຜູ້ນຳ ແກ່ແມ່ຍິງຊົນເຜົ່າ; ສະມາຄົມນໍ້າໃຈຊຸມຊົນ (NCA) ຕາງໜ້າໂດຍປະທານສະມາຄົມ ທ່ານ ສຸກກະເສີມ ໂພທິສານ ຈາກແຂວງບໍ່ແກ້ວ ຮ່ວມລົງນາມຮັບທຶນຊ່ວຍເຫລືອ ເກືອບ 500 ລ້ານກີບ ເພື່ອຈັດຕັ້ງປະຕິບັດໂຄງການທີ່ມີເປົ້າໝາຍໃຫ້ການສຶກສາທີ່ມີຄຸນນະພາບແກ່ເດັກຍິງຊົນເຜົ່າ ແລະ ປົກປ້ອງພວກເຂົາຈາກການໃຊ້ຄວາມຮຸນແຮງທຸກຮູບແບບ ລວມທັງ ການແຕ່ງງານກ່ອນໄວອັນຄວນ; ສະມາຄົມແສງສະຫວ່າງ ຕາງໜ້າໂດຍ ທ່ານ ນາງ ວິຣິດ ຄັດຕິຍະວົງ ຮ່ວມລົງນາມຮັບເງິນຊ່ວຍເຫລືອ ເກືອບ 500 ລ້ານກີບ ເພື່ອຈັດຕັ້ງປະຕິບັດໂຄງການທີ່ມີເປົ້າໝາຍສະໜັບສະໜູນຊ່ວຍເຫລືອຜູ້ເຄາະຮ້າຍ ແລະ ແມ່ຍິງທີ່ສ່ຽງຕໍ່ການຄ້າມະນຸດ ແລະ ຄວາມຮຸນແຮງໃນຄອບຄົວ ຢູ່ແຂວງສະຫວັນນະເຂດ ໃຫ້ສາມາດກັບຄືນສູ່ສັງຄົມໄດ້ຢ່າງຍືນຍົງ; ກອງທຶນພັດທະນາແມ່ຍິງ (WDF) ຕາງໜ້າໂດຍ ທ່ານ ນາງ ວຽງເພັດ ພົງຈະເລີນ ຈາກແຂວງສາລະວັນ ຮ່ວມລົງນາມຮັບເງິນຊ່ວຍເຫລືອ 500 ລ້ານກີບ ເພື່ອຈັດຕັ້ງປະຕິບັດໂຄງການພັດທະນາ ບ້ານຕົວແບບດ້ານຄວາມສະ ເໝີພາບ ຍິງ-ຊາຍ (MGV) ແລະ ການປ້ອງກັນການໃຊ້ຄວາມຮຸນແຮງໃນຄອບຄົວ ແລະ ການແຕ່ງງານກ່ອນໄວອັນຄວນ.
ກອງປະຊຸມຄະນະກຳມະການຄັດເລືອກ FEF-OSC 2024 ຈັດຂຶ້ນໃນວັນທີ 21 ມິຖຸນາ 2024 ຜ່ານມາ ເຊິ່ງປະກອບມີ ບັນດາຄູ່ຮ່ວມພັດທະນາ ຊ່ຽວຊານບັນຫາອົງການຈັດຕັ້ງທາງສັງຄົມຂອງລາວ ແລະ ບັນຫາຄວາສະເໝີພາບຍິງ-ຊາຍ ເຊັ່ນ: ອົງການຝຣັ່ງເພື່ອການພັດທະນາ (AFD), ອົງການຮ່ວມມືສາກົນເພື່ອການພັດທະນາ ປະເທດເຢຍລະມັນ (GIZ) ແລະ ອົງການສະຫະປະຊາຊາດເພື່ອການພັດທະນາ (UNDP). ທຸກອົງການຈັດຕັ້ງທີ່ໄດ້ຮັບທຶນຊ່ວຍເຫລືອລ້າໃນປີ 2024 ນີ້. ສາ ມາດສະເໜີຂໍທຶນຊ່ວຍເຫລືອໄລຍະ 2 ໄດ້ ໃນຕົ້ນປີ 2025, ລວມທັງ ບັນດາອົງການຈັດຕັ້ງທາງສັງຄົມທີ່ບໍ່ໄດ້ຖືກຄັດເລືອກ ແລະ ອົງການຈັດຕັ້ງທີ່ຍັງບໍ່ໄດ້ສະໝັກຂໍທຶນຊ່ວຍເຫລືອ ໃນປີນີ້.
ຂໍ້ມູນ-ພາບ: ສະຖານທູດຝຣັ່ງ ປະຈຳລາວ
