ແຫລ່ງຂ່າວຈາກ ແຂວງຈຳປາສັກ ໃຫ້ຮູ້ວ່າ: ກອງປະຊຸມເຜີຍແຜ່ໂຄງການປະກວດຜະລິດຕະພັນຫັດຖະກຳດີເດັ່ນປະຈຳປີ 2024 “ສິລະປະລາຍນາກ ແລະ ລວດລາຍດອກໄມ້ປະຈຳທ້ອງຖິ່ນ” ໃນງານມະຫາກໍາສີມືຫັດຖະກຳລາວ ຄັ້ງທີ 23 ປີ 2024 ຈັດຂຶ້ນໃນວັນທີ 5 ກໍລະກົດ 2024 ທີ່ນະຄອນປາກເຊ ໂດຍການເປັນປະທານຂອງ ທ່ານ ນາງ ຈັນເທົາ ປະຖໍາມະວົງ ປະທານກິດຕິມະສັກສະມາຄົມຫັດຖະກຳລາວ (ສຫລ), ທ່ານ ນາງ ມາລາ ຈັນທະລາມ ປະທານສະມາຄົມຫັດຖະກຳ ແຂວງຈຳປາສັກ, ມີບັນດາທ່ນຜູ້ປະກອບການທຸລະກິດຜະລິດຕະພັນຫັດຖະກຳ, ພະແນກການກ່ຽວຂ້ອງຂອງແຂວງ, ສະມາຄົມຫັດຖະກຳຈາກ 5 ແຂວງພາກໃຕ້ຄື: ສະຫວັນນະເຂດ, ສາລະວັນ, ເຊກອງ,ອັດຕະປື ແລະ ຈຳປາສັກ ເຂົ້າຮ່ວມ.
ທ່ານ ນາງ ມາລາ ຈັນທະລາມ ໄດ້ກ່າວວ່າ: ກອງປະຊຸມເຜີຍແຜ່ໂຄງການປະກວດການແຂ່ງຂັນຜະລິດຕະພັນຫັດຖະກຳດີເດັ່ນປະຈຳປີ 2024 “ສິລະປະລາຍນາກ ແລະ ລວດລາຍດອກໄມ້ປະຈຳທ້ອງຖິ່ນ” ແມ່ນມີຄວາມໝາຍຄວາມສຳຄັນຫລາຍ ເພື່ອແນໃສ່ເຮັດໃຫ້ທຸກພາກສ່ວນທີ່ເຂົ້າຮ່ວມໄດ້ຮູ້ເຖິງຈຸດປະສົງຂອງການຈັດງານ, ຄວາມສຳຄັນຂອງງານ, ຄວາມສຳຄັນຂອງການມີສ່ວນຮ່ວມຕ່າງໆ ທັງນີ້ກໍເພື່ອແນໃສ່ໃຫ້ບັນດາພາກສ່ວນທີ່ກ່ຽວຂ້ອງຂອງແຂວງພາກໃຕ້ ໄດ້ມີສ່ວນຮ່ວມ ນຳເອົາຜະລິດຕະພັນທີ່ເປັນເອກກະລັກຂອງທ້ອງຖິ່ນ ຕາມເງື່ອນໄຂເຂົ້າຮ່ວມໃນມະຫາກຳສີມືຫັດຖະກຳລາວ ຄັ້ງທີ 23 ເພື່ອເປັນການເອກອ້າງໃຫ້ນັກທ່ອງທ່ຽວທີ່ເຂົ້າມາທ່ຽວໃນງານຮູ້ຈັກແຂວງເຮົາຫລາຍຂຶ້ນ.
ທ່ານ ນາງ ຈັນເທົາ ປະຖໍາມະວົງ ໄດ້ກ່າວວ່າ: ຈຸດປະສົງຂອງການຈັດງານດັ່ງກ່າວ ເພື່ອສະເຫລີມສະຫລອງ “ວັນຫັດຖະກຳລາວ ວັນທີ 1 ພະຈິກ”, ເພື່ອສ້າງຂະບວນການຂໍ່ານັບຮັບຕ້ອນການເປັນເຈົ້າພາບ ຈັດສໍາມະນາການຕໍ່າແຜ່ນແພພື້ນເມືອງອາຊຽນ ຄັ້ງທີ 9 ທີ່ຈະໄດ້ຈັດຂຶ້ນໃນລະຫວ່າງວັນທີ 4-6 ພະຈິກ 2024 ທີ່ນະຄອນຫລວງວຽງຈັນ, ເພື່ອສ້າງຂະບວນການຕ້ອນຮັບປີທ່ອງທ່ຽວລາວ ປີ 2024 ເປັນສະຖານທີ່ທ່ອງທ່ຽວດ້ານ ຫັດຖະກຳ ດັ່ງຄໍາຂັວນ “ສີໄມ້ລາຍມືຄືອຸທິຍານແຫ່ງການທ່ອງທ່ຽວ” ພ້ອມນີ້ກໍເພື່ອເປັນການສະເຫລີມສະຫລອງ “ຫັດຖະກຳພູມປັນຍາການຕໍ່າລາຍນາກ ຂອງຊຸມຊົນເຊື້ອຊາດລາວ” ທີ່ໄດ້ຮັບເຂົ້າເປັນມໍລະດົກໂລກ ຈາກອົງການ ອຸຍແນັສໂກ ແລະ ເພື່ອສ້າງກາລະໂອກາດໃຫ້ຊຸມຊົນ ແລະ ລູກຄ້າ ຜູ້ມາທ່ຽວຊົມ ທ່ຽວຊື້ ໄດ້ພົບ ໄດ້ເຫັນຄວາມຫລາກຫລາຍຂອງເຄື່ອງຫັດຖະກຳລາວ, ສ້າງຄວາມປະທັບໃຈ ແລະ ຫລົງໄຫລ ໃນຄວາມ ມະຫັດສະຈັນຂອງສີໄມ້ລາຍມືຂອງນາຍຊ່າງຫັດຖະກຳລາວ, ເຊິ່ງມະຫາກຳສີມືຫັດຖະກຳລາວ ຄັ້ງທີ 23 ຈັດຂຶ້ນພາຍໃຕ້ ຫົວຂໍ້: ສີໄມ້ລາຍມືຄືອຸທິຍານແຫ່ງການທ່ອງທ່ຽວ, ເຊື່ອມໂຍງມໍລະດົກຜ້າແພພື້ນເມືອງອາຊຽນ” ຄາດວ່າຈະຈັດຂຶ້ນໃນວັນທີ 26 ຕຸລາ-03 ພະຈິກ 2024 ທີ່ສູນວາງສະແດງສິນຄ້າລາວ-ໄອເຕັກ ນະຄອນຫລວງວຽງຈັນ.
ຂ່າວ-ພາບ: ຈັນທະວີສັກ
