ກົມຊັບສິນທາງປັນຍາ ກະຊວງອຸດສາຫະກໍາ ແລະ ການຄ້າ ຮ່ວມກັບ ອົງການຊັບສິນທາງປັນຍາໂລກ WIPO ຈັດກອງປະຊຸມສຳມະນາ ໃຫ້ແກ່ພາກລັດ ແລະ ຜູ້ປະກອບການເອກະຊົນ ໃນຫົວຂໍ້ “ຜົນປະໂຫຍດຂອງການເຂົ້າເປັນພາຄີຂອງສັນຍາເຮັກ ວ່າດ້ວຍການຈົດທະບຽນສາກົນ ກ່ຽວກັບແບບອຸດສາຫະກໍາ ຂຶ້ນໃນວັນທີ 2 ກໍລະກົດ 2024 ທີ່ໂຮງແຮມ ເມືອງແທັງ, ນະຄອນຫຼວງວຽງຈັນ.
ທ່ານ ໄຊສົມເພັດ ນໍລະສິງ ກົມຊັບສິນທາງປັນຍາ ກ່າວວ່າ: ການປົກປ້ອງແບບອຸດສາຫະກຳ ແມ່ນໜ້າທີ່ໜຶ່ງທີ່ສຳຄັນທີ່ຈະຕ້ອງໄດ້ປະຕິບັດ ຂອງບັນດາປະເທດສະມາຊິກ ອົງການຊັບສິນທາງປັນຍາໂລກ. ນອກຈາກນັ້ນ, ເພື່ອແນ່ໃສ່ຮັບປະກັນໃນການຈັດຕັ້ງປະຕິບັດແຜນງານ ດ້ານຊັບສິນທາງປັນຍາອາຊຽນ (ASEAN Working Group on Intellectual Property Cooperation: AWGIPC) ທີ່ກຳນົດໃຫ້ບັນດາປະເທດສະມາຊິກອາຊຽນ ຕ້ອງເຂົ້າເປັນພາຄີຂອງສັນຍາເຮັກ ວ່າດ້ວຍການຈົດທະບຽນສາກົນ ກ່ຽວກັບແບບອຸດສາຫະກຳ ແລະ ເພື່ອປະກອບສ່ວນເຂົ້າໃນເປົ້າໝາຍຂອງການເຊື່ອມໂຍງທາງດ້ານເສດຖະກິດໃນພາກພື້ນ ແລະ ສາກົນ.
ທ່ານ ກ່າວຕື່ມອີກວ່າ: ປັດຈຸບັນປະເທດທີ່ເປັນພາຄີຂອງສັນຍາເຮັກ ມີທັງໝົດ 79 ຄູ່ສັນຍາ ລວມມີ 96 ປະເທດ (ສໍາລັບປະເທດສະມາຊິກອາຊຽນແມ່ນມີ 4 ປະເທດ ທີ່ເຂົ້າຮ່ວມເປັນພາຄີຂອງສັນຍາດັ່ງກ່າວແລ້ວ ປະກອບມີ: ສິງກະໂປ (2005), ບຣູໄນ (2013), ກຳປູເຈຍ (2017)ແລະ ຫວຽດນາມ (2019) ແລະ ຍັງມີອີກ 3 ປະເທດ ທີ່ກໍາລັງກະກຽມເຂົ້າເປັນພາຄີຂອງສັນຍາດັ່ງກ່າວໃນມໍ່ໆນີ້ຄຶ: ລາວ (2024-2025), ຟີລິບປິນ (2024-2025) ແລະ ໄທ (2025-2026). ໃນການຈົດທະບຽນສາກົນພາຍໃຕ້ອະນຸສັນຍາເຈນີວາ ສາມາດຂະຫຍາຍການປົກປ້ອງໄປອີກໄດ້ເຖິງ 90 ປະເທດ.
ທີ່ມາ: ເສດຖະກິດ-ການຄ້າ
