Saturday, July 13, 2024
Homeຂ່າວໜ້າໜຶ່ງທ່ານຮອງ ລມຕ ກະຊວງ ຖວທ ຕ້ອນຮັບຄະນະຜູ້ແທນກະຊວງວັດທະນະທໍາ ແລະ ທ່ອງທ່ຽວ ສປ ຈີນ

ທ່ານຮອງ ລມຕ ກະຊວງ ຖວທ ຕ້ອນຮັບຄະນະຜູ້ແທນກະຊວງວັດທະນະທໍາ ແລະ ທ່ອງທ່ຽວ ສປ ຈີນ

………..

ທ່ານນາງ ດາລານີ ພົມມະວົງສາ ຮອງລັດຖະມົນຕີ (ລມຕ) ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ຈາງ ຊີຫຼົງ ອະດີດຮອງຫົວໜ້າກົມ ເຈົ້າໜ້າທີ່ອາວຸໂສຂັ້ນ 1 ກົມພົວພັນ ແລະ ຮ່ວມມືສາກົນກະຊວງວັດທະນະທໍາ ແລະ ທ່ອງທ່ຽວແຫ່ງ ສປ ຈີນ ພ້ອມດ້ວຍຄະນະໃນວັນທີ 3 ກໍລະກົດນີ້ ທີ່ກະຊວງ ຖວທ ໃນໂອກາດເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມ ພົບປະພາກທຸລະກິດ ເພື່ອສົ່ງເສີມການທ່ອງທ່ຽວລະຫວ່າງສະມາຄົມສົ່ງເສີມການທ່ອງທ່ຽວວັດທະນະທໍາລາວ-ຈີນ ແຫ່ງ ສປປ ລາວ ແລະ ສະພາອຸດສາຫະກຳການທ່ອງທ່ຽວແຫ່ງ ສປ ຈີນ ໃນລະຫວ່າງວັນທີ 2-7 ກໍລະກົດນີ້. ໂອກາດນີ້, ທ່ານນາງ ດາລານີ ພົມມະວົງສາ ໄດ້ສະແດງຄວາມຕ້ອນຮັບ ແລະ ສະແດງຄວາມຂອບໃຈທີ່ໄດ້ມີການຮ່ວມມືຄູ່ຮ່ວມຍຸດທະສາດຮອບດ້ານໝັ້ນຄົງຍາວນານ ຄົບຮອບ 13 ປີ ກໍຄືການສ້າງຄູ່ຮ່ວມຊາຕາກຳສັງຄົມນິຍົມລາວ-ຈີນທີ່ມີຄວາມໝາຍຍຸດທະສາດ. ພ້ອມດຽວກັນນີ້, ທ່ານຮອງລັດຖະມົນຕີໄດ້ແຈ້ງໃຫ້ຊາບວ່າ: ພັກ-ລັດ ຖະບານແຫ່ງ ສປປ ລາວ ຖືສໍາຄັນວຽກງານການທ່ອງທ່ຽວໃນການເປີດກວ້າງ ການພົວພັນຮ່ວມມືກັບພາຍນອກດ້ວຍການໂຄສະນາສົ່ງເສີມການທ່ອງທ່ຽວທາງທຳມະຊາດ, ວັດທະນະທຳ ແລະ ປະຫວັດສາດອັນອຸດົມສົມບູນ ໂດຍສະເພາະການເປີດປີທ່ອງທ່ຽວລາວ 2024 ໃນຄັ້ງນີ້ກໍໄດ້ໂຄສະນາຜ່ານຫຼາຍຮູບຫຼາຍແບບ ເພື່ອເຊີນຊວນນັກທ່ອງທ່ຽວ ແລະ ນັກລົງທຶນຈາກ ສປ ຈີນ ກໍຄືນັກທ່ອງທ່ຽວຈາກຕ່າງປະເທດມາທ່ອງທ່ຽວ ແລະ ລົງທຶນຢູ່ ສປປ ລາວ ໃຫ້ຫຼາຍຂຶ້ນກວ່າເກົ່າ. ໃນປີທ່ອງທ່ຽວລາວ 2024 ນີ້ໄດ້ຕັ້ງເປົ້າດຶງດູດນັກທ່ອງທ່ຽວ ສປ ຈີນ ເຂົ້າມາທ່ອງທ່ຽວ ສປປ ລາວ ໃຫ້ໄດ້ 1.500.000 ເທື່ອຄົນ. ສະນັ້ນ, ຈຶ່ງສະເໜີໃຫ້ບັນດາທ່ານຊ່ວຍຊຸກຍູ້, ໂຄສະນາ ແລະ ສະໜັບສະໜູນເພື່ອໃຫ້ບັນລຸຕາມເປົ້າໝາຍ.

ໂອກາດດຽວກັນນີ້, ທ່ານ ຈາງ ຊີຫຼົງ ໄດ້ສະແດງຄວາມຂອບໃຈຕໍ່ທ່ານຮອງລັດຖະມົນຕີທີ່ໄດ້ໃຫ້ກຽດຕ້ອນຮັບອັນອົບອຸ່ນ ລວມທັງໄດ້ແຈ້ງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ສປປ ລາວ ໃນຄັ້ງນີ້. ໃນໂອກາດດັ່ງກ່າວ ຄະນະຜູ້ແທນສະພາອຸດສາຫະກໍາການທ່ອງທ່ຽວຈີນຈະໄດ້ສືບຕໍ່ຢ້ຽມຊົມສະຖານທີ່ທ່ອງທ່ຽວແຫ່ງຕ່າງໆທີ່ແຂວງວຽງຈັນ ແລະ ແຂວງຫຼວງພະບາງຕື່ມອີກ.

ຂ່າວ: ຍຸພິນທອງ

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments