Wednesday, July 24, 2024
Homeຂ່າວພາຍໃນເຈົ້າແຂວງຊຽງຂວາງ ລົງຊຸກຍູ້ການຜະລິດຊາ ຢູ່ບ້ານຍອດປຽງ

ເຈົ້າແຂວງຊຽງຂວາງ ລົງຊຸກຍູ້ການຜະລິດຊາ ຢູ່ບ້ານຍອດປຽງ

ແຫລ່ງຂ່າວຈາກ ແຂວງຊຽງຂວາງ ໃຫ້ຮູ້ວ່າ: ໃນທ້າຍອາທິດຜ່ານມາ, ທ່ານ ບຸນຈັນ ສີວົງພັນ ເຈົ້າແຂວງໆຊຽງຂວາງ ພ້ອມດ້ວຍຄະນະ ລົງຢ້ຽມຢາມ ແລະ ຊຸກຍູ້ການຜະລິດຊາ ຂອງປະຊາຊົນຢູ່ບ້ານຍອດປຽງ ເມືອງແປກ ແຂວງຊຽງຂວາງ.

ທ່ານ ສີພັນ ຈັນທະວົງ ນາຍບ້ານໆຍອດປຽງ ໄດ້ລາຍງານວ່າ: ບ້ານຍອດປຽງ ມີ 22 ຫລັງຄາເຮືອນ, 33 ຄອບຄົວ, ພົນລະເມືອງ 141 ຄົນ ຍິງ 64 ຄົນ, ເປັນເຜົ່າລາວລຸ່ມ 100% ມີເນື້ອທີ່ນາ 11,8 ເຮັກຕາ, ເນື້ອທີ່ສວນຊາ 36,7 ເຮັກຕາ. ປະຊາຊົນໄດ້ຖືອາຊີບຜະລິດຊາ ເປັນຕົ້ນຕໍ ແລະ ເຮັດນາ ລ້ຽງສັດເປັນສຳຮອງ. ບ້ານຍອດປຽງ ສາມາດຜະລິດຊາໄດ້ 70 ໂຕນ ແລະ ສ້າງລາຍຮັບຈາກການຜະລິດຊາ ເກືອບ 2 ຕື້ກີບຕໍ່ປີ, ເຊິ່ງເຮັດໃຫ້ປະຊາຊົນພາຍໃນບ້ານ ມີວຽກເຮັດງານທຳ ແລະ ລາຍຮັບຄົງທີ່ ສາມາດແກ້ໄຂຄວາມທຸກຍາກໃຫ້ຫລຸດລົງເທື່ອລະກ້າວ. ພ້ອມນີ້, ປະຊາຊົນບ້ານດັ່ງກ່າວ ຍັງໄດ້ສະເໜີໃຫ້ຂັ້ນເທິງ ຊ່ວຍຊອກຫາຕະຫລາດ ເພື່ອຈຳໜ່າຍຊາ ແລະ ທຶນຈຳນວນໜຶ່ງ ເພື່ອມາຊື້ຜະລິດຕະພັນຫຸ້ມຫໍ່ ຜະລິດຕະພັນຊາ.

ໂອກາດນີ້, ທ່ານ ບຸນຈັນ ສີວົງພັນ ໄດ້ມີຄຳເຫັນຊີ້ນຳ ໂດຍເນັ້ນໃຫ້ອຳນາດການປົກຄອງບ້ານ ແລະ ປະຊາຊົນ ເສີມຂະຫຍາຍມູນເຊື້ອ ຄວາມສາມັກຄີໃຫ້ແໜ້ນແຟ້ນ, ຄະນະພັກຊຸດໃໝ່ຈົ່ງນຳພາ-ຊີ້ນຳຈັດຕັ້ງປະຕິບັດ ຕາມມະຕິກອງປະຊຸມໃຫຍ່ຂອງບ້ານ, ມອບໃຫ້ພະແນກການທີ່ກ່ຽວຂ້ອງ ຈົ່ງຊ່ວຍຊີ້ນຳ, ເຕັກນິກ, ຕະຫລາດເພື່ອສົ່ງອອກຊາ, ພ້ອມກັນປົກປັກຮັກສາປ່າໄມ້ ແລະ ຮ່ວມມືໃນການສັກຢາກັນພະຍາດໃຫ້ບັນລຸຕາມແຜນການທີ່ວາງໄວ້. ໂອກາດດຽວກັນນີ້, ທ່ານເຈົ້າແຂວງໆຊຽງຂວາງ ໄດ້ມອບເຄື່ອງນຸ່ງຫົ່ມຈຳນວນໜຶ່ງ ໃຫ້ປະຊາຊົນບ້ານຍອດປຽງ ຕື່ມອີກ.

ຂ່າວ: ບຸນມີ ແສງທຸມມີ

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments