ກອງປະຊຸມກວດກາຄວາມສ່ອດຄ່ອງທາງດ້ານກົດໝາຍ ຂອງຮ່າງລັດຖະບັນຍັດວ່າດ້ວຍ ເຂດຍຸດທະສາດປ້ອງກັນຊາດ ຈັດຂຶ້ນໃນວັນທີ 2 ກໍລະກົດ 2024 ທີ່ກະຊວງປ້ອງກັນປະເທດ ໄດ້ຈັດ ໂດຍການເປັນປະທານຂອງ ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ເສນາທິການກອງທັບ, ມີ ທ່ານ ກົງຈີ ຢ່າງຈື່ ຮອງລັດຖະມົນຕີກະຊວງຍຸດຕິທຳ, ມີຜູ້ຕາງໜ້າກົມກົດໝາຍກະຊວງປ້ອງກັນປະເທດ ແລະ ພະນັກ ງານ ກ່ຽວຂ້ອງເຂົ້າຮ່ວມ.
ໃນກອງປະຊຸມ, ໄດ້ຜ່ານຮ່າງລັດຖະບັນຍັດ ວ່າດ້ວຍເຂດຍຸດທະສາດປ້ອງກັນຊາດ ເຊິ່ງຮ່າງລັດຖະບັນຍັດດັ່ງກ່າວ ປະກອບມີ 9 ໝວດ 34 ມາດຕາ, ໃນນີ້ ໄດ້ກຳນົດ ຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ ແລະ ຕິດຕາມ ກວດກາ ເຂດຍຸດທະສາດປ້ອງກັນຊາດ ເພື່ອເຮັດໃຫ້ເຂດດັ່ງກ່າວ ໄດ້ຮັບການປົກປັກຮັກສາ, ພັດທະນາ ແລະ ນຳໃຊ້ໃຫ້ຖືກຕ້ອງ, ສອດຄ່ອງ ຕາມ ແຜນຍຸດທະສາດປ້ອງກັນຊາດ ແນໃສ່ຮັບປະກັນຄວາມໝັ້ນຄົງຂອງຊາດ, ສ້າງເງື່ອນໄຂໃນການ ພັດທະນາເສດຖະກິດ-ສັງຄົມ ຕິດພັນກັບວຽກງານປ້ອງກັນຊາດ ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ.
ຈາກນັ້ນ, ຜູ້ເຂົ້າຮ່ວມ ກໍໄດ້ພ້ອມກັນຄົ້ນຄວ້າປະກອບຄໍາຄິດເຫັນໃສ່ ຮ່າງລັດຖະບັນຍັດ ວ່າດ້ວຍ ເຂດຍຸດທະສາດປ້ອງກັນຊາດ ຢ່າງກົງໄປກົງມາ ເຮັດໃຫ້ເນື້ອໃນຮ່າງລັດຖະບັນຍັດດັ່ງກ່າວ ຖືກ ຕ້ອງສອດຄ່ອງ ກັບການຄຸ້ມຄອງ, ກວດກາ, ປົກປັກຮັກສາ, ນຳໃຊ້ ແລະ ພັດທະນາເຂດຍຸດທະສາດປ້ອງກັນຊາດ ຕົວຈິງໃນປັດຈຸບັນ.
ຂ່າວ: ນາງ ນົກ + ຄຳໄຕ
