ກອງປະຊຸມສະໄໝສະມັນເທື່ອທີ 7 ຂອງສະພາແຫ່ງຊາດຊຸດທີ IX ໃນຕອນເຊົ້າວັນທີ 25 ມິຖຸນາ 2014 ພາຍໃຕ້ການເປັນປະທານຂອງ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ສະເໜີຮ່າງກົດໝາຍວ່າດ້ວຍອາກອນມູນຄ່າເພີ່ມ ສະບັບປັບປຸງ ເພື່ອໃຫ້ສະມາຊິກສະພາແຫ່ງຊາດ ປະຈຳແຕ່ລະເຂດເລືອກຕັ້ງ ໄດ້ຄົ້ນຄວ້າ, ປັບປຸງ ຕາມຄຳເຫັນຢ່າງເລິກເຊິ່ງ ແລະ ສົມເຫດ ສົມຜົນ ເພື່ອເຮັດໃຫ້ເນື້ອຂອງຮ່າງກົດໝາຍສະບັບນີ້, ມີເນື້ອໃນຄົບຖ້ວນ, ສົມບູນ, ຮັດກຸມຕື່ມ ແລະ ສາມາດປະຕິບັດໄດ້ ໂດຍສອດຄ່ອງກັບສະພາບຕົວຈິງ.
ທ່ານ ສັນຕິພາບ ພົມວິຫານ ໄດ້ຍົກໃຫ້ເຫັນສະພາບການຈັດຕັ້ງປະຕິບັດກົດໝາຍວ່າດ້ວຍອາກອນມູນຄ່າເພີ່ມ, ເຫດຜົນ ແລະ ຄວາມຈຳເປັນ ໃນການສະເໜີປັບປຸງກົດໝາຍດັ່ງກ່າວ ໄດ້ຖືກນໍາໃຊ້ມາເປັນເວລາ 5 ປີ, ຜ່ານການຈັດຕັ້ງປະຕິບັດຕົວຈິງ ເຫັນວ່າ ມີບາງເນື້ອໃນ ຍັງບໍ່ສອດຄ່ອງກັບ ສະພາບການຂະຫຍາຍຕົວ ທາງດ້ານເສດຖະກິດ-ສັງຄົມ ເປັນຕົ້ນ ເນື້ອໃນຢູ່ບາງມາດຕາເຫັນວ່າ ຊໍ້າຊ້ອນກັນ, ການຈັດລຽງຄວາມເວົ້າບໍ່ສອດຄ່ອງ ຕາມກົນໄກການຄຸ້ມຄອງອາກອນມູນຄ່າເພີ່ມ ລວມເຖິງການອະທິບາຍຄໍາສັບ ມີລັກສະນະບໍ່ຄົບຖ້ວນ, ເນື້ອໃນບໍ່ຈະແຈ້ງ ເຊັ່ນ: ມາດຕາ 3 ການອະທິບາຍຄໍາສັບ, ມາດຕາ 11 ກິດຈະກຳທີ່ຖືກເກັບ ອາກອນມູນຄ່າເພີ່ມ ແລະ ອື່ນໆ; ການກໍານົດເນື້ອໃນ ການຍົກເວັ້ນ ໃນມາດຕາ 12 ເຫັນວ່າ ບໍ່ມີລັກສະນະສົ່ງເສີມການຜະລິດພາຍໃນ, ມີຊ່ອງຫວ່າງ ໃນການລົບຫລີກ ເຮັດໃຫ້ການສວຍໃຊ້ນະໂຍບາຍການຍົກເວັ້ນມີຫລັກສະນະເພີ່ມຂຶ້ນ ເຊິ່ງມູນຄ່າການຍົກເວັ້ນ ອາກອນມູນຄ່າເພີ່ມ ໃນແຕ່ລະປີເຫັນວ່າມີສັດສ່ວນຫລາຍກວ່າ ການເກັບອາກອນມູນຄ່າເພີ່ມ ປະມານ 3-4 ເທົ່າຕົວ; ການບໍ່ອະນຸຍາດໃຫ້ຫັກ ຫລື ສົ່ງຄືນອາກອນມູນຄ່າເພີ່ມ ສົ້ນເຂົ້າ ທີ່ຫັກບໍ່ໝົດໃນທ້າຍປີ ຂອງການປະຕິບັດ ອາກອນມູນຄ່າເພີ່ມ ໃນອັດຕາ 10% ຕາມກົດໝາຍວ່າດ້ວຍ ອາກອນມູນຄ່າເພີ່ມ (ສະບັບປັບປຸງ) ສະບັບເລກທີ 48/ສພຊ ເຮັດໃຫ້ບັນດາວິສາຫະກິດ ທີ່ຢູ່ໃນລະບົບອາກອນມູນຄ່າເພີ່ມ ບໍ່ໄດ້ຮັບຄວາມເປັນທຳ ຕາມກົນໄກ ອາກອນມູນຄ່າເພີ່ມ; ການອະນຸຍາດໃຫ້ຫັກ ອາກອນມູນຄ່າເພີ່ມ ສົ້ນເຂົ້າ ທີ່ຕິດພັນກັບການຊົມໃຊ້ບໍລິການຂົນສົ່ງ ຈາກນິຕິບຸກຄົນທີ່ບໍ່ໄດ້ຈົດທະບຽນຢູ່ ສປປ ລາວ ຕາມມາດຕາ 24 ເປັນຕົ້ນ ແມ່ນ ການຊົມໃຊ້ ການບໍລິການລົດຂົນສົ່ງສິນຄ້າ ຈາກນິຕິບຸກຄົນຕ່າງປະເທດ ທີ່ບໍ່ໄດ້ຈົດທະບຽນ ສ້າງຕັ້ງ ຢູ່ ສປປ ລາວ ໂດຍອະນຸຍາດໃຫ້ຫັກ ອາກອນມູນຄ່າເພີ່ມ ຈາກການບໍລິການດັ່ງກ່າວ ເຊິ່ງສົ່ງຜົນກະທົບຕໍ່ ຜູ້ດຳເນີນທຸລະກິດຂົນສົ່ງພາຍໃນປະເທດ; ການກໍານົດເງື່ອນໄຂການສົ່ງຄືນ ອາກອນມູນຄ່າເພີ່ມ ໃນມາດຕາ 27 ໄດ້ລະບຸພຽງແຕ່ ຕ້ອງຊຳລະຜ່ານລະບົບທະນາຄານ ສປປ ລາວ ເທົ່ານັ້ນ ເຊິ່ງເປັນຊ່ອງວ່າງເຮັດໃຫ້ ບາງວິສາຫະກິດທີ່ມີການສົ່ງອອກສິນຄ້າ ໂດຍບໍ່ໄດ້ນຳເງິນຕາກັບຄືນ ສປປ ລາວ ຕາມມູນຄ່າສົ່ງອອກຕົວຈິງ; ມາດຕາ 31 ການມອບອາກອນມູນຄ່າເພີ່ມ ບໍ່ໄດ້ກຳນົດ ກ່ຽວກັບ ການຄຸ້ມຄອງເກັບອາກອນມູນຄ່າເພີ່ມ ທີ່ຕິດພັນກັບການ ນຳໃຊ້ງົບປະມານແຫ່ງລັດ, ເງິນກູ້ ແລະ ຊ່ວຍເຫລືອລ້າຈາກລັດຖະບານ ເຮັດໃຫ້ການຈັດເກັບ ອາກອນມູນຄ່າເພີ່ມ ໃນຂົງເຂດດັ່ງກ່າວ ບໍ່ທັນເຂັ້ມງວດ.
ສໍາລັບ ຮ່າງກົດໝາຍວ່າດ້ວຍອາກອນມູນຄ່າເພີ່ມ ສະບັບປັບປຸງ ປະກອບມີ 8 ພາກ ແລະ 64 ມາດຕາ, ຕັດອອກ 3 ມາດຕາ, ເພີ່ມເນື້ອໃນເຂົ້າໃໝ່ 3 ມາດຕາ, ປັບປຸງເນື້ອໃນ 40 ມາດຕາ ແລະ ຮັກສາເນື້ອໃນໄວຄືເກົ່າ 18 ມາດຕາ ຄາດວ່າຫາກ ກົດໝາຍດັ່ງກ່າວ, ຖືກຮັບຮ້ອງ ແລະ ປະກາດໃຊ້ ຈະສາມາດສ້າງລາຍຮັບເຂົ້າງົບປະມານໄດ້ເພີ່ມຂຶ້ນ, ຈຳກັດຊ່ອງວ່າງຈາການຮົ່ວໄຫລຂອງລາຍຮັບ, ການຄວບຄຸມເງິນຕາ ມີຄວາມຮັດກຸມຂຶ້ນຕື່ມ ແລະ ຖືກຍອມຮັບຈາກສາກົນຫລາຍຂຶ້ນ ທາງດ້ານເນື້ອໃນ; ກົນໄກປະຕິບັດອາກອນມູນຄ່າເພີ່ມ ທີ່ມີຄວາມສອດຄ່ອງ ໄປຕາມຕ່ອງໂສ້ ທີ່ໄດ້ມາດຕະຖານສາກົນ ໂດຍສະເພາະຂອດການຄຸ້ມຄອງການຈັດເກັບ ອາກອນມູນຄ່າເພີ່ມ ສົ້ນເຂົ້າ, ການຫັກ ແລະ ການສົ່ງຄືນ ອາກອນມູນຄ່າເພີ່ມ ໃຫ້ມີຄວາມສະດວກ, ວ່ອງໄວ, ໂປ່ງໃສ ແລະສາມາດກວດສອບໄດ້; ສາມາດ ຄຸ້ມຄອງເງິນຕາຕ່າງປະເທດ ທີ່ຕິດພັນກັບການສົ່ງອອກສິນຄ້າ ຕ້ອງນຳເງິນເຂົ້າມາປະເທດ ໂດຍຜ່ານລະບົບທະນາຄານ ຕາມລະບຽບການ ຢ່າງຄົບຖ້ວນ; ສ້າງຄວາມເປັນທຳໃຫ້ແກ່ວິສາຫະກິດ ຜູ້ທີ່ຢູ່ໃນລະບົບ ອາກອນມູນຄ່າເພີ່ມ ເປັນຕົ້ນການອະນຸຍາດສິນເຊື່ອ ອາກອນມູນຄ່າເພີ່ມ ສົ້ນເຂົ້າ ທີ່ຫັກບໍ່ໝົດໃນປີ ສາມາດນຳໄປຫັກຕໍ່ໃນປີຕໍ່ໄປໄດ້ ແລະ ສ້າງລະບຽບການຄຸ້ມຄອງການສົ່ງຄືນເງິນ ອາກອນມູນຄ່າເພີ່ມ ໃຫ້ສະດວກ ແລະວ່ອງໄວ; ສືບຕໍ່ ເພີ່ມປະສິດທິພາບ ການເຊື່ອມຕໍ່ຖານຂໍ້ມູນ ກັບຂະແໜງອຸດສາຫະກຳ ແລະ ການຄ້າ ແລະ ຂະແໜງທະນາຄານໃນການຄຸ້ມຄອງລະບົບຖານຂໍ້ມູນຂອງວິສາຫະກິດ ລວມທັງລະບົບຄຸ້ມຄອງເງິນຕາຂອງທະນາຄານແຫ່ງ ສປປ ລາວ ແລະ ອື່ນໆ ເຮັດໃຫ້ການຄຸ້ມຄອງ ອາກອນມູນຄ່າເພີ່ມ ມີປະສິດທິພາບ ແລະ ປະສິດທິຜົນດີ.
ຂ່າວ: ກິດຕາ
ພາບ: ເກດສະໜາ
