ແຫລ່ງຂ່າວຈາກ ແຂວງອັດຕະປື ໃຫ້ຮູ້ວ່າ: ກົມພັດທະນາແມ່ຍິງລາວ ສູນກາງສະຫະພັນແມ່ຍິງລາວ ຮ່ວມກັບສະຫະພັນແມ່ຍິງ ແຂວງອັດຕະປື ຈັດຝຶກອົບຮົມ ພາຍໃຕ້ຫົວຂໍ້ “ຮັກລູກໃຫ້ໃສ່ໃຈ” ໃນວັນທີ 17 ມິຖຸນາ 2024 ທີ່ແຂວງອັດຕະປື ໂດຍການເປັນປະທານຂອງທ່ານ ນາງ ນິນປະເສີດ ໄຊຍະພອນສີ ຫົວໜ້າກົມພັດທະນາແມ່ຍິງລາວ ສູນກາງສະຫະພັນແມ່ຍິງລາວ, ທ່ານ ຄາວີ ຫອມສົມບັດ ຊ່ຽວຊານການປ່ຽນແປງພຶດຕິກຳ ແລະ ສັງຄົມ ຂອງອົງການສົງເຄາະແມ່ ແລະ ເດັກ ສະຫະປະຊາຊາດ (ອຸຍນີເຊັບ), ທ່ານ ນາງ ຈັນເພັດ ຈັນທະມາດ ປະທານສະຫະພັນແມ່ຍິງ ແຂວງອັດຕະປື ພ້ອມດ້ວຍສຳມະນາກອນ ຈາກ 3 ເມືອງ ແລະ 6 ພະແນກການອ້ອມຂ້າງແຂວງເຂົ້າຮ່ວມ.
ນາງ ນິນປະເສີດ ໄຊຍະພອນສີ ໄດ້ກ່າວວ່າ: ການຝຶກອົບຮົມ ພາຍໃຕ້ຫົວຂໍ້ “ຮັກລູກໃຫ້ໃສ່ໃຈ” ຄັ້ງນີ້ ເພື່ອໃຫ້ຜູ້ເຂົ້າຮ່ວມສາມາດເຂົ້າໃຈ ແລະ ອະທິບາຍໄດ້ ກ່ຽວກັບຊຸດເຄື່ອງມື ລວມທັງປຶ້ມຄູ່ມື 5 ເຫລັ້ມ ໃນການຈັດຕັ້ງຜັນຂະຫຍາຍແຜນງານ “ຮັກລູກໃຫ້ໃສ່ໃຈ” ເພື່ອໃຫ້ຄູຝຶກຂັ້ນແຂວງ ແລະ ຂັ້ນເມືອງ ສາມາດຝຶກປະຕິບັດຕົວຈິງ ແລະ ເປັນເຈົ້າການ ໃນການຈັດຝຶກອົບຮົມ ໃຫ້ສະມາຊິກແຜນງານຂັ້ນບ້ານ ຈໍານວນ 20 ບ້ານຢູ່ເມືອງໄຊເສດຖາ, ເມືອງຊານໄຊ ແລະ ເມືອງສະໜາມໄຊ, ຫ້ອງກຽມ ປະຖົມ 34 ແຫ່ງ ແລະ ກຸ່ມຮຽນຜ່ານການຫລິ້ນ 7 ແຫ່ງ. ການຈັດຕັ້ງປະຕິບັດແຜນງານ “ຮັກລູກໃຫ້ໃສ່ໃຈ” ແມ່ນເພື່ອສົ່ງເສີມໃຫ້ພໍ່ແມ່ຜູ້ປົກຄອງ ແລະ ຜູ້ດູແລເດັກ ຮັບຮູ້ຂໍ້ຄວາມການສື່ສານ ໃນແຜນງານ ຮັກລູກໃຫ້ໃສ່ໃຈ ແລະ ນໍາໄປຈັດຕັ້ງປະຕິບັດ ໃນການເບິ່ງແຍງດູແລລູກຂອງຕົນເອງ ໃນສະພາບແວດລ້ອມທີ່ມີການປົກປ້ອງ ໂດຍປາສະຈາກການໃຊ້ຄວາມຮຸນແຮງ ເພື່ອໃຫ້ເດັກກ່ອນໄວຮຽນອາຍຸຕໍ່າກວ່າ 6 ປີ ມີຄຸນສົມບັດ, ຄວາມຮູ້ ແລະ ຄວາມສາມາດ ທີ່ເປັນພື້ນຖານກ່ອນເຂົ້າຮຽນຊັ້ນປະຖົມສຶກສາ ທັງນີ້ກໍເພື່ອສົ່ງເສີມພັດທະນາການ ແລະ ຄວາມຮູ້ທົ່ວໄປ, ດ້ານອາລົມຈິດ ແລະ ສັງຄົມ, ການຈັດຕັ້ງປະຕິບັດກິດຈະກໍານີ້ ຍັງເປັນການຜັນຂະຫຍາຍຄໍາໝັ້ນໝາຍ ຂອງ ສປປ ລາວ ຕໍ່ສາກົນ ເພື່ອເປັນການປະກອບສ່ວນບັນລຸເປົ້າໝາຍ ກ່ຽວກັບເດັກ ແລະ ແມ່ຍິງ ໂດຍສະເພາະໃນ ສປປ ລາວ ໄດ້ໃຫ້ຄຳໝັ້ນສັນຍາ ໃນການນໍາພາປະເທດ ໃຫ້ຫລຸດພົ້ນອອກຈາກຄວາມດ້ອຍພັດທະນາໃນຊຸມປີ 2030.
ການຝຶກອົບຮົມຄັ້ງນີ້ ຈະໄດ້ດໍາເນີນມາເປັນເວລາ 5 ວັນ, ເຊິ່ງບັນດາຜູ້ເຂົ້າຮ່ວມ ຈະໄດ້ຮຽນຮູ້ຄວາມຮູ້ພື້ນຖານ ກ່ຽວກັບຫົວຂໍ້ບົດຮຽນ ການຮັກລູກໃຫ້ໃສ່ໃຈ, ພ້ອມທັງມີການແລກປ່ຽນບົດຮຽນຕ່າງໆ ຈາກວິທະຍາກອນຕື່ມອີກ.
ຂ່າວ: ວັດທະນາ
