ພັກ ແລະ ລັດຖະບານ ຍາມໃດກໍຖືສໍາຄັນ ແລະ ເອົາໃຈໃສ່ວຽກງານສາທາລະນະສຸກ, ເຮັດໃຫ້ປະຊາຊົນບັນດາເຜົ່າ ມີສຸຂະພາບແຂງແຮງ ມີຄວາມຜາສຸກ ແລະ ປະເທດຊາດຮັ່ງມີ ເຂັ້ມແຂງ. ໂດຍເຫັນໄດ້ຄວາມສໍາຄັນດ້ານສຸຂະພາບຂອງປະຊາຊົນ ແລະ ວຽກງານສາທາລະນະສຸກຂອງພັກ, ເພື່ອຕອບສະໜອງເຈດຕະນາລົມ ຂອງປະທານ ໄກສອນ ພົມວິຫານ ຜູ້ນຳທີ່ແສນ ເຄົາລົບຮັກ ຍາມໃດກໍມີຄວາມເປັນຫ່ວງເປັນໃຍ ແລະ ເອົາໃຈໃສ່ຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ, ເພິ່ນຈຶ່ງໄດ້ໃຫ້ທັດສະນະ ແລະ ແນວຄິດຊີ້ນຳຕໍ່ບັນຫາສຸຂະພາບ ແລະ ວຽກງານສາທາລະນະສຸກຕະຫຼອດມາ. ໃນກອງປະຊຸມສາທາລະນະສຸກທົ່ວປະເທດ ຄັ້ງທີ II, ວັນທີ 11 ມິນາ 1987, ເພິ່ນໄດ້ກ່າວວ່າ: “ຈະສະເໜີຄະນະເລຂາທິການສູນກາງພັກ ແລະ ສະພາລັດຖະມົນຕີ ເລືອກເອົາມື້ໃດມື້ໜຶ່ງທີ່ມີຄວາມໝາຍປະຫວັດສາດ ເປັນວັນແພດລາວ.
ອີງຕາມ ກົດໝາຍປິ່ນປົວ ສະປັບປັບປຸງ ເລກທີ 58/ສພຊ ລົງວັນທີ 24 ທັນວາ 2014 ໃນໝວດທີ 10 ມາດຕາ 76; ຈຶ່ງໄດ້ກໍານົດເອົາ ວັນທີ 18 ມີຖຸນາ ຂອງທຸກປີ ເປັນວັນແພດລາວ ຊຶ່ງແມ່ນວັນທີ່ມີຄວາມໝາຍ ເພື່ອລະນຶກເຖິງການກໍາເນີດ ການເຕີບໃຫຍ່ ຂະຫຍາຍຕົວຂອງວຽກງານສາທາລະນະສຸກ, ການຮັກສາສຸຂະພາບຂອງພໍ່ແມ່ປະຊາຊົນບັນດາເຜົ່າ ແລະ ການພັດທະນາບຸກຄະລາກອນສາທາລະນະສຸກ, ໂດຍສະເພາະ ເພື່ອຈາລຶກບຸນຄຸນ ຕໍ່ແພດໝໍ ແລະ ພະນັກງານສາທາລະນະສຸກລາວ ທີ່ໄດ້ເສຍສະຫຼະ ອຸທິດສະຕິປັນຍາ ແລະ ເຫື່ອແຮງ ເປັນເຈົ້າການໃນການປະຕິບັດໜ້າທີ່ເຂົ້າໃນການປິ່ນປົວໃນແຕ່ລະໄລຍະ. ເພື່ອສ້າງໂອກາດໃຫ້ແພດໝໍ ແລະ ພະນັກງານສາທາລະນະສຸກໄດ້ທົບທວນວຽກງານໃຫຍ່ດ້ານສາທາລະນະສຸກຂອງພັກເຮົາ; ເພື່ອເຊີດຊູກຽດສັກສີ, ຖານະບົດບາດ ແລະ ຄຸນງາມຄວາມດີ ຂອງແພດໝໍ ແລະ ພະນັກງານສາທາລະນະສຸກລາວ ຕໍ່ສັງຄົມ ແລະ ປະເທດຊາດ. ທັງເປັນການປຸກລະດົມມວນຊົນໃຫ້ເຫັນ ຄວາມສໍາຄັນ ແລະ ເປັນເຈົ້າການໃນການສົ່ງເສີມ, ຮັກສາສຸຂະພາບຂອງຕົນເອງ, ຄອບຄົວ ແລະ ຊຸມຊົນ.
ເພື່ອປູກຈິດສໍານຶກໃຫ້ແກ່ແພດໝໍ ແລະ ພະນັກງານສາທາລະນະສຸກຮຸ່ນສືບທອດຮໍ່າຮຽນເອົາແບບຢ່າງອັນດີງາມຂອງແພດໝໍ ແລະ ພະນັກງານສາທາລະນະສຸກຮຸ່ນກ່ອນ, ອອກແຮງຝຶກຝົນຫຼໍ່ຫຼອມສ້າງຕົນເອງ ໃຫ້ກາຍເປັນແພດໝໍທີ່ພຽບພ້ອມໄປດ້ວຍຄຸນສົມບັດ, ຈັນຍາທໍາວິຊາຊີບ ແລະ ຄວາມຊຳນານງານດ້ານວິຊາສະເພາະ; ສົມກຽດສັກສີ ວ່າເປັນນັກຮົບເສື້ອຂາວປະຕິວັດຂອງພັກ; ເປັນຂີດໝາຍແຫ່ງການກໍາເນີດຂອງວັນແພດລາວ, ເປັນວັນປູກລະດົມສ້າງຂະບວນການ, ກິດຈະກຳຕ່າງໆ ເພື່ອລະນຶກເຖິງຜົນງານ ແລະ ສັນລະເສີນຄຸນງາມຄວາມດີຂອງແພດລາວ ໃນສະໄໝຕໍ່ສູ້ກູ້ຊາດກໍຄືສະໄໝປົກປັກຮັກສາ ແລະ ພັດທະນາປະເທດ.
ຮຽບຮຽງ: ວັນໄຊ ຕະວິນຍານ
