ແຫລ່ງຂ່າວຈາກ ແຂວງຈຳປາສັກ ໃຫ້ຮູ້ວ່າ: ພິທີເຊັນສັນຍາສໍາປະທານ ໂຄງການແຫລ່ງທ່ອງທ່ຽວອຸທິຍານນໍ້າຕົກຕາດແຊ ທ້າວບາຈຽງ ເນື້ອທີ່ຫລາຍກວ່າ 14 ເຮັກຕາ ຢູ່ບ້ານຫົວແຊ ເມືອງບາຈຽງຈະເລີນສຸກ, ແຂວງຈໍາປາສັກ ລະຫວ່າງ ອົງການປົກຄອງແຂວງຈຳປາສັກ ຕາງໜ້າໂດຍ ພະແນກແຜນການ ແລະ ການລົງທຶນແຂວງ ກັບ ບໍລິສັດ ຫົງຄໍາຂຸດຄົ້ນແຮ່-ຊາຍ ຈໍາກັດຜູ້ດຽວ ໃນວັນທີ 10 ພຶດສະພາ 2024 ທີ່ພະແນກແຜນການ ແລະ ການລົງທຶນແຂວງ ຕາງໜ້າລົງນາມຄັ້ງນີ້ໂດຍ ທ່ານ ສຸກສະຫວັນ ວິໄລວົງ ຫົວໜ້າພະແນກແຜນການ ແລະ ການລົງທຶນແຂວງຈຳປາສັກ, ທ່ານ ສຸກປະສິດ ບຸດດາວົງ ຜູ້ອໍານວຍ ການ ບໍລິສັດ ຫົງຄໍາຂຸດຄົ້ນແຮ່-ຊາຍ ຈໍາກັດຜູ້ດຽວ ໂດຍການເຂົ້າຮ່ວມຂອງ ທ່ານສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນ ແຂວງຈໍາປາສັກ, ທ່ານ ສົມບູນ ເຮືອງວົງສາ ຮອງເຈົ້າແຂວງຈໍາປາສັກ ພ້ອມດ້ວຍການນໍາພະແນກການກົມກອງທີ່ກ່ຽວຂ້ອງອ້ອມຂ້າງແຂວງ, ຂະແໜງການ ແລະ ພະນັກງານວິຊາການທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ.
ໂຄງການພັດທະນາແຫລ່ງທ່ອງທ່ຽວອຸທິຍານນໍ້າຕົກຕາດທ້າວບາຈຽງ ໄດ້ເຊັນບົດບັນທຶກໃນການອະນຸຍາດສຶກສາສໍາຫລວດ ໃນຄັ້ງວັນທີ 5 ເມສາ 2023, ເຊິ່ງໄດ້ຜ່ານການສຶກສາ ສໍາຫລວດ, ໄດ້ຜ່ານກອງປະຊຸມ ເຈົ້າແຂວງ, ຮອງເຈົ້າແຂວງ ໃນຄັ້ງວັນທີ 21 ມີນາ 2024, ໄດ້ຮັບໃບຢັ້ງຢືນສິ່ງແວດລ້ອມ ສະບັບເລກທີ 1163/ພຊສ.ຈສ ລົງວັນທີ 19 ທັນວາ 2023 ແລະ ໄດ້ຮັບຂໍ້ຕົກລົງອະນຸຍາດ ຂອງເຈົ້າແຂວງຈໍາປາສັກ ສະບັບເລກທີ 457/ຈຂ.ຈສ ລົງວັນທີ 30 ເມສາ 2024, ເຊິ່ງສັນຍາສຳປະທານປະກອບດ້ວຍ 20 ມາດຕາ, ອາຍຸການລົງທຶນ 45 ປີ, ມູນຄ່າການ ລົງທຶນທັງໝົດ 3.546.460 ໂດລາສະຫະລັດ, ເນື້ອທີ່ດິນສໍາປະທານ 14 ກວ່າເຮັກຕາ, ແບ່ງອອກເປັນ 3 ເຂດຄື: ເຂດທີ 01: ເນື້ອທີ່ດິນສໍາປະທານ ພື້ນທີ່ເຂດອະນຸລັກ ພັດທະນາເປັນເຂດສີຂຽວ ເປັນຈຸດອະນຸລັກ ປ່າໄມ້ນາໆພັນ, ເຂດປ່າປ້ອງກັນ, ເຂດປູກປ່າໄມ້ທົດແທນ ແລະ ອື່ນໆ ມີເນື້ອທີ່ດິນ 64.854 ຕາແມັດ; ເຂດທີ 02: ເນື້ອທີ່ດິນສໍາປະທານ ພື້ນທີ່ດິນບໍລິເວນນໍ້າຕົກຕາດ, ບໍລິເວນນໍ້າຫ້ວຍຍາງ ມີເນື້ອທີ່ດິນ 30.179 ຕາແມັດ. ສຳລັບເຂດທີ 03: ເນື້ອທີ່ດິນສໍາປະທານ ພື້ນທີ່ພັດທະນາທ່ອງທ່ຽວ ຈໍານວນ 44.967 ຕາແມັດ.
ສ່ວນກິດຈະການລົງທຶນປະກອບດ້ວຍ ພື້ນທີ່ພັດທະນາທ່ອງທ່ຽວ: ລົງທຶນໃນການພັດທະນາ ຣີສອດ, ຫ້ອງປະຊຸມ, ຮ້ານອາຫານ, ຈຸດຊົມວິວ. ພື້ນທີ່ເຂດອະນຸລັກພັດທະນາເປັນເຂດສີຂຽວ: ປູກໄມ້ອຸດສາຫະກຳປົກປັກຮັກສາປ່າໄມ້, ຂົວເຫລັກ ແລະ ອູ່ສະຫລິງ ເພື່ອການທ່ອງທ່ຽວອະນຸລັກທຳມະຊາດມີຄວາມຍືນຍົງ.
ຂ່າວ-ພາບ: ຈັນທະວີສັກ
