ມື້ນີ້, ຄະນະບໍລິຫານງານສູນກາງພັກ, ລັດຖະບານ, ສະພາແຫ່ງຊາດ, ສູນກາງແນວລາວສ້າງຊາດ ພ້ອມດ້ວຍຊາວນະຄອນຫຼວງວຽງຈັນ ໄດ້ພ້ອມກັນໂຮມຊຸມນຸມໃຫຍ່ ເພື່ອສະເຫຼີມສະຫຼອງວັນໄຊຊະນະບັ້ນຮົບດຽນບຽນຝູ້ ທີ່ລືຊື່ ຄົບຮອບ 70 ປີ (7/5/1954-7/5/2024), ໃນທ່າມກາງທີ່ປະຊາຊົນຫວຽດນາມ ວິລະຊົນອ້າຍນ້ອງ ພວມຈັດຕັ້ງ ການສະເຫຼີມສະຫຼອງ ວັນສຳຄັນດັ່ງກ່າວໃນລະດັບຊາດ ດ້ວຍຫຼາຍກິດຈະກຳທີ່ມີຄວາມໝາຍ ແລະ ມີເນື້ອໃນອັນເລິກເຊິ່ງ, ແລະ ໃນທ່າມກາງບັນຍາກາດ ທີ່ທົ່ວພັກ, ລັດ, ແລະ ປະຊາຊົນລາວບັນດາເຜົ່າພວມສືບຕໍ່ຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ XI ຂອງພັກ, ການຫ້າງຫາກະກຽມດຳເນີນກອງປະຊຸມໃຫຍ່ 3 ຂັ້ນ ແລະ ທົ່ວພັກລັດ ເເລະ ກອງທັບ ຫາກໍ່ສຳເລັດການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບ 75 ປີ ແລະ ວັນບຸນສຳຄັນຂອງພັກ ແລະ ຂອງຊາດ ຢ່າງເປັນຂະບວນຟົດຟື້ນ.
ໃນພິທີທີ່ມີຄວາມໝາຍນີ້, ຂ້າພະເຈົ້າຕາງໜ້າ ໃຫ້ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ລັດຖະບານ, ສະພາແຫ່ງຊາດ, ສູນກາງແນວລາວສ້າງຊາດ, ບັນດາກຳລັງປະກອບອາວຸດ ແລະ ປະ ຊາຊົນລາວບັນດາເຜົ່າ ຂໍຈາລຶກບຸນຄຸນ ຕໍ່ພັກກອມມູນິດຫວຽດນາມ, ລັດຖະບານ ແລະ ປະຊາຊົນຫວຽດ ນາມອ້າຍນ້ອງ, ຕໍ່ ປະທານໂຮ່ ຈິມິນ ຜູ້ນຳທີ່ຍິ່ງໃຫຍ່, ປະທານ ໄກສອນ ພົມວິຫານ, ປະທານ ສຸພານຸວົງ ທີ່ເຄົາລົບຮັກ, ບັນດາອະດີດການນຳ, ນັກຮົບປະຕິວັດ, ປະຊາຊົນຂອງ 2 ຊາດ ລາວ-ຫວຽດນາມ ທີ່ໄດ້ເສຍສະຫຼະອັນໃຫຍ່ຫຼວງ, ອຸທິດສະຕິປັນຍາ, ເຫື່ອແຮງ, ຕະຫຼອດຮອດຊີວິດເລືອດເນື້ອໃນພາລະກິດຕໍ່ສູ້ກູ້ຊາດຕ້ານກັບຈັກກະພັດຜູ້ຮຸກຮານ, ຊຶ່ງເດັ່ນກວ່າໝູ່ແມ່ນໃນບັ້ນຮົບດຽນບຽນຝູ້ ທີ່ລືຊາ ໃນປີ 1954 ທີ່ຜ່ານມາ.
![](https://medialaos.net/wp-content/uploads/2024/05/GO6A3031-1024x683.jpg)
ກ່ອນໜ້ານີ້ 70 ປີ, ພາຍຫຼັງທີ່ຈັກກະພັດຝຣັ່ງ ໄດ້ກັບຄືນມາຮຸກຮານອິນດູຈີນອີກຄັ້ງໃໝ່ ໃນປີ 1946, ປະຊາຊົນສາມຊາດ ລາວ, ຫວຽດນາມ ແລະ ກຳປູເຈຍ ໄດ້ພ້ອມກັນລຸກຂຶ້ນເພື່ອສືບຕໍ່ຕໍ່ສູ້ຕ້ານກັບພວກຈັກກະພັດຜູ້ຮຸກຮານ. ສະເພາະປະຊາຊົນຫວຽດນາມ ກໍໄດ້ສືບຕໍ່ຕໍ່ສູ້ພາຍໃຕ້ການນຳພາຂອງພັກແຮງງານຫວຽດນາມ (ພັກກອມມູນິດຫວຽດນາມໃນປັດຈຸບັນ) ໂດຍແມ່ນ ປະທານ ໂຮ່ ຈິມິນ ເປັນຜູ້ສ້າງຕັ້ງ ແລະ ນຳພາ.
ການຕໍ່ສູ້ຕ້ານພວກຈັກກະພັດຝຣັ່ງ ໄດ້ດຳເນີນເປັນເວລາ 8 ປີ. ດ້ວຍທາດແທ້ກະຫາຍສົງຄາມ, ພວກເຂົາໄດ້ສ້າງ ແຜນການນາວາ ເພື່ອຫວັງຈະບຽດຍຶດເອົາປະເທດຫວຽດນາມພາຍໃນ 18 ເດືອນ, ດ້ວຍການທ້ອນໂຮມກຳລັງ, ສ້າງຖານທີ່ໝັ້ນທີ່ເຂັ້ມເເຂງ ຢູ່ດຽນບຽນຝູ້ ໂດຍໃຊ້ກຳລັງ 21 ກອງພັນ, ມີອາວຸດຍຸດໂທປະກອນຄົບຊຸດທີ່ທັນສະໄໝ, ພ້ອມທັງຈັດວາງກຳລັງຕາມຈຸດປ້ອມໝັ້ນ 49 ເເຫ່ງຢູ່ 3 ເຂດ ຄື: ເຂດເໜືອ, ເຂດໃຕ້ ແລະ ເຂດໃຈກາງ ເພື່ອຊ່ວຍໜຸນຊຶ່ງກັນ ເເລະ ກັນ ຫວັງປິດລ້ອມດິນເເດນທັງໝົດຂອງ ສສ ຫວຽດນາມ ແລະ ດັບສູນກຳລັງຫຼວງຂອງກອງທັບປະຊາຊົນຫວຽດນາມ ແລະ ກ້າວໄປເຖິງການຫັນປ່ຽນຫວຽດນາມໃຫ້ກາຍເປັນຖານທີ່ໝັ້ນທາງການທະຫານຂອງພວກລ່າເມືອງຂຶ້ນຢ່າງຖາວອນ, ສ້າງດຽນບຽນຝູ້ໃຫ້ກາຍເປັນຖານທັບທີ່ເຂັ້ມເເຂງ ເພື່ອຄວບຄຸມອາຊີຕາເວັນອອກສ່ຽງໃຕ້. ຈັກກະພັດຝຣັ່ງ ແລະ ຈັກກະພັດອາເມຣິກາ ໄດ້ຖືເອົາດຽນບຽນຝູ້ ເປັນເເປ້ນຍັນ ເພື່ອບຽດຢຶດເອົາພາກຕາເວັນຕົກສ່ຽງເໜືອຂອງຫວຽດນາມ, ພາກເໜືອຂອງລາວ, ເປັນການບັນທອນ ແລະ ດັບມອດກຳລັງປະກອບອາວຸດຂອງຫວຽດນາມ. ໂດຍເຫັນໄດ້ກົນອຸບາຍອັນເລິກເເລບຂອງພວກຈັກກະພັດຝຣັ່ງ, ເຫັນໄດ້ໂອກາດທີ່ສຸກງອມມາເຖິງ ແລະ ບົນພື້ນຖານການວິເຄາະ, ຕີລາຄາສະພາບການຂອງໂລກ ກໍຄືພາຍໃນປະເທດ, ຕົ້ນເດືອນທັນວາ ປີ 1953, ກົມການເມືອງສູນກາງພັກກອມມູນິດຫວຽດນາມ ໄດ້ຕົກລົງເປີດບັ້ນຮົບດຽນບຽນຝູ້, ປະທານ ໂຮ່ ຈິມິນ ໄດ້ຊີ້ນຳວ່າ: ບັ້ນຮົບດຽນບຽນຝູ້ ເປັນບັ້ນຮົບທີ່ມີຄວາມໝາຍສຳຄັນ ທາງດ້ານການທະຫານ; ການເມືອງ ແລະ ການຕ່າງປະເທດ. ສະນັ້ນ, “ຕ້ອງຕີໃຫ້ຊະນະ ແລະ ຕ້ອງໄຊຊະນະ ຢ່າງເເນ່ນອນ”. ປະຕິບັດຈິດໃຈຊີ້ນຳຂອງປະທານ ໂຮ່ ຈິມິນ, ກຳລັງກອງທັບ ແລະ ປະຊາຊົນຫວຽດນາມ ໄດ້ກະກຽມຄວາມພ້ອມຢ່າງຮອບດ້ານດ້ວຍການລະດົມກຳລັງຄົນ; ກໍາລັງຊັບຂອງປະຊາຊົນທົ່ວປະເທດ ເພື່ອເຄື່ອນທັບຂຶ້ນສູ່ບັ້ນຮົບດຽນບຽນຟູ ເພື່ອຕີເອົາ ຊະນະຈັກກະພັດຝຣັ່ງຜູ້ຮຸກຮານ. ສະນັ້ນ, ພາຍຫຼັງກະກຽມແລ້ວ, ວັນທີ 13 ມີນາ ປີ 1954, ກອງທັບປະຊາຊົນຫວຽດນາມ ໄດ້ເລີ່ມຕົ້ນບຸກໂຈມຕີ ຢູ່ວົງນອກໃນເຂດຈຸດຮີມລາມ, ດົກເລິບ, ບ້ານແກ້ວ ຊຶ່ງພາຍຫຼັງ 5 ວັນສູ້ຮົບຢ່າງດຸເດືອດຂ້ຽວຂາດ ແລະ ພິລະອາດຫານ, ກອງທັບປະຊາຊົນຫວຽດນາມ ສາມາດດັບສູນທີ່ໝັ້ນຂອງສັດຕູຢູ່ວົງນອກສຳເລັດ, ເປັນການເປີດປະຕູເຂົ້າສູ່ວົງໃຈກາງ ໂດຍໄດ້ ສັງຫານ ແລະ ຈັບທັງເປັນ ທະຫານຝຣັ່ງໄດ້ 2.000 ກວ່າບັກ.
ການຕໍ່ສູ້ລະຫວ່າງກອງທັບຫວຽດນາມ ແລະ ທະຫານຝຣັ່ງຢູ່ສະໜາມຮົບດຽນບຽນຟູ ໄດ້ແກ່ຍາວມາເປັນເວລາ 56 ວັນ, ກໍາລັງກອງທັບຫວຽດນາມ ສາມາດຍຶດໄດ້ ສະໜາມບິນເມືອງແທ່ງ ຊຶ່ງເປັນການຕັດທາງລຳລຽງຂົນສົ່ງທາງອາກາດ ຂອງພວກສັດຕູ, ເຮັດໃຫ້ພວກຝຣັ່ງ ຂາດເຂີນທັງອາວຸດ, ຍຸດໂທປະກອນ, ຢາປົວພະຍາດ, ສະບຽງອາຫານ ແລະ ອື່ນໆ.
ໂດຍປະຕິບັດຕາມຄຳສັ່ງຂອງກອງບັນຊາການດ້ານຮົບ ໂດຍແມ່ນ ນາຍພົນເອກ ວໍ້ຫງວ້ຽນຢາບ ເປັນຜູ້ຊີ້ນຳ ແລະ ບັນຊາໂດຍກົງ, ໃນຕອນເຊົ້າຂອງວັນທີ 1 ພຶດສະພາ ປີ 1954, ກອງກຳລັງທະຫານຫວຽດນາມ ໄດ້ບຸກໂຈມຕີເຂົ້າທັງ 3 ດ້ານ ຄື: ດ້ານຕາເວັນອອກ, ຕາເວັນຕົກ ແລະ ຕາເວັນອອກສ່ຽງເໜືອ…ມາຮອດຕອນທ່ຽງຂອງວັນທີ 7 ພຶດສະພາ, ກອງທັບຫວຽດນາມ ໄດ້ເປັນເຈົ້າການ ທົ່ວສະໜາມຮົບ, ຮອດຕອນແລງຂອງວັນທີ 7 ພຶດສະພາ, ດຽນບຽນຝູ້ ໄດ້ຮັບການປົດປ່ອຍຢ່າງສົມບູນ, ສາມາດດັບສູນ ແລະ ຈັບທະຫານຝຣັ່ງ ໄດ້ເປັນໝື່ນກວ່າບັກ, ນັບທັງຜູ້ບັນຊາການດ້ານຮົບຂອງຝຣັ່ງ ນາຍພົນ ເດີກາດຕຣີ ແລະ ອື່ນໆ.
ໄຊຊະນະດຽນບຽນຝູ້ ເປັນເຫດການທີ່ດັງກ້ອງກັງວານ ແລະ ສັ່ນສະເທືອນໄປທົ່ວໂລກ ແລະ ມີຄວາມໝາຍສຳຄັນໃນປະຫວັດສາດຂອງມວນມະນຸດຄື:
ໄຊຊະນະດຽນບຽນຝູ້ ເປັນເຫດການທີ່ມີຄວາມໝາຍປະຫວັດສາດທີ່ຍິ່ງໃຫຍ່ຂອງປະຊາຊົນຫວຽດນາມວິລະຊົນ,ສະແດງໃຫ້ເຫັນຄວາມເຂັ້ມແຂງຂອງກຳລັງແຮງຂອງມະຫາສາມັກຄີທົ່ວປວງຊົນທັງຊາດ, ໃຫ້ເຫັນຄວາມມຸ່ງຫວັງອັນແຮງກ້າຂອງປະຊາຊົນຕໍ່ສັນຕິພາບ ແລະ ເອກະລາດເເຫ່ງຊາດ ທັງເປັນການສະແດງໃຫ້ເຫັນການເຕີບໃຫຍ່ຂະຫຍາຍຕົວ, ຄວາມອົງອາດກ້າຫານ ບໍ່ຍອມຈຳນົນຂອງກອງກຳລັງປະກອບອາວຸດຂອງຫວຽດນາມ ກໍຄືການເສຍສະຫຼະຂອງທົ່ວປວງຊົນ, ພິເສດແມ່ນປະຊາຊົນໃນພາກຕາເວັນຕົກສ່ຽງເໜືອຂອງປະເທດຫວຽດນາມ;
ໄຊຊະນະດຽນບຽນຝູ້ ເປັນການສະແດງເຖິງຄວາມສະຫຼາດສ່ອງໃສ ໃນການ ນຳພາຂອງພັກແຮງງານຫວຽດນາມ ທີ່ມີປະທານ ໂຮ່ ຈິມິນ ເປັນຜູ້ນຳໃນການວາງເເນວທາງຕໍ່ສູ້ ຍາວນານ, ຮອບດ້ານ, ປະດິດສ້າງ, ເສີມຂະຫຍາຍກຳລັງເເຮງເເຫ່ງຄວາມສາມັກຄີທົ່ວປວງຊົນທັງຊາດ, ອີງໃສ່ກຳລັງພາຍໃນເປັນຕົ້ນຕໍ, ຍາດເເຍ່ງ ການສະໜັບສະໜູນ ແລະ ການຊ່ວຍເຫຼືອຂອງເພື່ອນມິດສາກົນ, ຮູ້ສົມທົບລະຫວ່າງກຳລັງເເຮງຂອງຊາດ ກັບກຳລັງເເຮງຂອງຍຸກສະໄໝ, ທັງສະແດງໃຫ້ເຫັນ ເຖິງຄວາມເກັ່ງກ້າປີຊາສາມາດ, ມີໄຫວພິບຂອງຜູ້ບັນຊາການດ້ານຮົບຄື: ນາຍພົນເອກ ວໍ້ຫງວ້ຽນຢາບ ໃນການຫັນປ່ຽນຍຸດທະວີິທີການທະຫານ: “ຈາກການຕີໄວ, ເເກ້ໄຂໄວ” ມາເປັນ “ການຕີຢ່າງໜັກເເໜ້ນ, ກ້າວຂຶ້ນຢ່າງໜັກເເໜ້ນ” ຂອງກອງທັບປະຊາຊົນຫວຽດນາມ, ຊຶ່ງເປັນກົນລະຍຸດ ການທະຫານທີ່ສຳຄັນ ປະກອບສ່ວນເຂົ້າໃນການປົດປ່ອຍບັ້ນຮົບດຽນບຽນຝູ້ ໄດ້ຮັບໄຊຊະນະຢ່າງສະຫງ່າງາມ;
ໄຊຊະນະດຽນບຽນຝູ້ ແມ່ນໄຊຊະນະທີ່ສະຫວ່າງສະໄຫວທີ່ສຸດ, ດັງກ້ອງກັງວານ ໃນປະຫວັດສາດຂອງມວນມະນຸດ, ທີ່ຕໍ່ສູ້ຕ້ານການຮຸກຮານຂອງຈັກກະພັດພາຍນອກ ຂອງປະຊາ ຊົນຫວຽດນາມວິລະຊົນທີ່ມີກຽດສະຫງ່າ, ຊຶ່ງໄດ້ຖືກບັນທຶກເຂົ້າໃນໜ້າປະຫວັດສາດຂອງໂລກຢູ່ໃນ ສັດຕະວັດທີ 20, ທີ່ໄດ້ທັບມ້າງລະບົບຫົວເມືອງຂຶ້ນ ຂອງລັດທິຈັກກະພັດ ໃຫ້ພັງທະລາຍລົງ, ໄດ້ພິສູດເຖິງສັດຈະທຳທີ່ວ່າ: “ຢູ່ໃນຊາດໜຶ່ງທີ່ເຄີຍເປັນຫົວເມືອງຂຶ້ນ, ເຄິ່ງສັກດີນາ, ດິນແດນ ບໍ່ກວ້າງໃຫຍ່, ປະຊາກອນບໍ່ຫຼາຍ, ເສດຖະກິດຫຼ້າຫຼັງ ແລະ ຂະຫຍາຍຕົວຊ້າ, ກໍາລັງທະຫານອ່ອນນ້ອຍ, ພາຫະນະ, ອຸປະກອນຫຼ້າຫຼັງ, ແຕ່ເມື່ອມີຄວາມສາມັກຄີຢ່າງແໜ້ນແຟ້ນ, ມີການຊີ້ນຳນຳພາຢ່າງຖືກຕ້ອງ, ສະຫຼາດສ່ອງໃສ ແລະ ມີໄຫວພິບຂອງພັກກອມມູນິດ ແລະ ປະທານ ໂຮ່ຈີມິນ ຜູ້ນຳທີ່ຍິ່ງໃຫຍ່, ຮູ້ນຳໃຊ້ກຳລັງປະກອບອາວຸດທົ່ວປວງຊົນ ເພື່ອເຮັດສົງຄາມ ປະຊາຊົນ ກໍສາມາດຕີເອົາໄຊຊະນະສັດຕູຜູ້ຮຸກຮານ ທີ່ມີພື້ນຖານເສດຖະກິດ ແລະ ການທະຫານ ທີ່ເຂັ້ມແຂງ ແລະ ທັນສະໄໝກວ່າຫຼາຍເທົ່າໄດ້ສຳເລັດ”;
ໄຊຊະນະດຽນບຽນຝູ້ ແມ່ນໄຊຊະນະແຫ່ງຄວາມສາມັກຄີ, ຮ່ວມຂຸມຄອງດຽວກັນ ໃນການຕໍ່ສູ້ກູ້ຊາດ ຕ້ານພວກລ່າເມືອງຂຶ້ນຝຣັ່ງ ຂອງປະຊາຊົນຫວຽດນາມ, ລາວ ແລະ ກຳປູເຈຍ, ອັນເປັນການປະກອບສ່ວນທັບມ້າງລັດທິລ່າເມືອງຂຶ້ນແບບເກົ່າ ໃຫ້ພັງທະລາຍລົງຢູ່ໃນໂລກ, ໄຊຊະນະດັ່ງກ່າວ ຍັງເປັນບ່ອນອີງທີ່ໜັກແໜ້ນ, ທັງເປັນແວ່ນແຍ່ງທີ່ໃສແຈ້ງ ໃຫ້ແກ່ບັນດາປະຊາຊາດ ທີ່ຕົກເປັນຫົວເມືອງຂຶ້ນ, ເພື່ອລຸກຂຶ້ນຕໍ່ສູ້ຕ້ານກັບການກົດຂີ່ຂູດຮີດ ແລະ ແອກຄອບຄອງຫົວເມືອງຂຶ້ນ ແບບເກົ່າຢູ່ຫຼາຍບ່ອນໃນທົ່ວໂລກ, ປະກອບສ່ວນອັນສົມກຽດ ເຂົ້າໃນພາລະກິດຕໍ່ສູ້ອັນຍິ່ງໃຫຍ່ ຂອງມວນມະນຸດທີ່ກ້າວໜ້າ ເພື່ອສັນຕິພາບ, ເອກະລາດ, ປະຊາທິປະໄຕ ແລະ ຄວາມກ້າວໜ້າ ຂອງສັງຄົມ;
ໄຊຊະນະດຽນບຽນຝູ້ ບໍ່ພຽງແຕ່ແມ່ນໄຊຊະນະຂອງປະຊາຊົນຫວຽດນາມ, ແຕ່ຍັງເປັນການສະແດງເຖິງໄຊຊະນະຂອງກ້ອນກຳລັງສາມັກຄີ, ການຮ່ວມສຳພັນສູ້ຮົບ ແລະ ຄຽງບ່າຄຽງໄຫລ່ ຂອງປະຊາຊົນລາວ ແລະ ປະຊາຊົນກຳປູເຈຍ ທີ່ໄດ້ຮ່ວມຂຸມຄອງດຽວກັນ, ຕ້ານກັບສັດຕູ ໂຕດຽວກັນ ເພື່ອປົດປ່ອຍຕົນເອງ. ໄຊຊະນະດັ່ງກ່າວ ໄດ້ດັບມອດເຈດຈຳນົງ ການຮຸກຮານ ຂອງລັດທິລ່າເມືອງຂຶ້ນແບບເກົ່າ, ບັງຄັບໃຫ້ລັດຖະບານຝຣັ່ງ ຈຳຕ້ອງຍອມເຊັນສັນຍາເຊີແນວ ກ່ຽວກັບອິນດູຈີນໃນປີ 1954, ຮັບຮູ້ຄວາມເປັນເອກະລາດ ແຫ່ງຊາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຫວຽດນາມ, ລາວ ແລະ ກຳປູເຈຍ. ພາກເໜືອຫວຽດນາມໄດ້ຮັບການປົດປ່ອຍ ຢ່າງສົມບູນ ແລະ ກາຍເປັນຖານທີ່ໝັ້ນຂອງການປະຕິວັດທີ່ເຂັ້ມແຂງ ທັງເປັນແນວຫຼັງທີ່ແໜ້ນແກ່ນ ໃຫ້ແກ່ການດຳເນີນການຕໍ່ສູ້ຕ້ານຈັກກະພັດອາເມຣິກາ ຢູ່ພາກໃຕ້ ຂອງຫວຽດ ນາມໃນເວລາຕໍ່ມາ;
ໄຊຊະນະດຽນບຽນຝູ້ ເປັນຄວາມເອກອ້າງທະນົງໃຈຂອງປະຊາຊົນຫວຽດນາມ, ລາວ ແລະ ກຳປູເຈຍ ໃນພາລະກິດຕໍ່ສູ້ເພື່ອເອກະລາດຂອງຕົນໃນເວລາຊຸມປີຕໍ່ມາຈົນສາມາດປົດ ປ່ອຍປະເທດຊາດ ໄດ້ຢ່າງສົມບູນໃນປີ 1975 ແລະ ດຳເນີນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ. ເຖິງວ່າວັນ ເວລາໄດ້ຜ່ານໄປເປັນເວລາ 70 ປີ ກໍຕາມ, ແຕ່ມານະຈິດຂອງບັ້ນຮົບດຽນບຽນຝູ້ ຍັງໃສແຈ້ງ ແລະ ເປັນກຳລັງອັນແຮງກ້າ ປຸກລະດົມຈິດໃຈຢ່າງໃຫຍ່ຫຼວງຂອງປະຊາຊົນສາມຊາດອິນດູຈີນ ໂດຍຕະຫຼອດມາ.
ໄຊຊະນະດຽນບຽນຝູ້ ລືກ້ອງກັງວານນີ້ ໄດ້ສົ່ງຜົນກະທົບໂດຍກົງຕໍ່ການປະຕິວັດລາວ, ໄດ້ສ້າງເງື່ອນ ໄຂສະດວກໃຫ້ແກ່ການຕໍ່ສູ້ຂອງປະຊາຊົນລາວໃນສະໜາມຮົບຕ່າງໆ. ພວກຂ້າພະເຈົ້າ ມີຄວາມເອກອ້າງ ທີ່ກອງທັບ ແລະ ປະຊາຊົນລາວ ໄດ້ມີການປະກອບສ່ວນ ເຂົ້າໃນໄຊຊະນະດັ່ງກ່າວ ດ້ວຍການເປີດບັ້ນຮົບໂຈມຕີເຂົ້າພາກກາງຂອງລາວ, ສົມທົບກັບກອງທະຫານອາສາສະໝັກຫວຽດນາມ ບຸກໂຈມຕີລົງ ພາກໃຕ້ຂອງລາວ, ປົດປ່ອຍຕົວເມືອງອັດຕະປື, ປົດປ່ອຍສ່ວນໜຶ່ງຂອງແຂວງສາລະວັນ, ດົງບໍລະເວນ, ເວີນໄຊ, ຊຽງປອງ ແລະ ອື່ນໆ, ກອງທະຫານລາວ ແລະ ຫວຽດນາມ ໄດ້ເປີດບັ້ນຮົບ ໂຈມຕີແນວຫຼັງປ້ອງກັນ ຂອງສັດຕູຢູ່ລ້ອງນໍ້າອູ່ ກ້າວເຂົ້າສູ່ຫຼວງພະບາງ ແລະ ໂຈມຕີສັດຕູຢູ່ພາກເໜືອຂອງລາວ, ປົດປ່ອຍໄດ້ແຂວງຜົ້ງສາລີ… ການເປີດບັ້ນຮົບດັ່ງກ່າວຢູ່ໃນດິນແດນລາວ ແລະ ຢູ່ຫວຽດນາມ ໄດ້ເປັນການທັບມ້າງກົນອຸບາຍຂອງເຜນນາວາ, ສ້າງເງື່ອນໄຂໃຫ້ກອງທັບຫວຽດນາມ ເປີດບັ້ນຮົບດຽນບຽນຟູ ກ້າວໄປເຖິງໄຊຊະນະຢ່າງສົມບູນ.
ເມື່ອຫວນຄືນເບິ່ງໄຊຊະນະດຽນບຽນຝູ້ ຄົບຮອບ 70 ປີ ໃນປີນີ້, ພວກເຮົາຍິ່ງເຫັນໄດ້ລັດທິວິລະຊົນຂອງກອງທັບ ແລະ ປະຊາຊົນຫວຽດນາມວິລະຊົນອ້າຍນ້ອງ ແລະ ທັງມີຄວາມຊາບຊຶ້ງຕໍ່ການພົວພັນຮ່ວມມືຂອງ 2 ກອງທັບ ແລະ ປະຊາຊົນສອງຊາດ ລາວ-ຫວຽດນາມ ຊຶ່ງນັບຕັ້ງແຕ່ສົງຄາມຕໍ່ຕ້ານກັບພວກລ່າເມືອງຂຶ້ນຝຣັ່ງ ແລະ ຈັກກະພັດອາເມຣິກາ ໃນໄລຍະຕໍ່ມາ, ປະຊາຊົນ ແລະ ກອງທັບເຮົາ ພາຍໃຕ້ການນຳພາຂອງພັກກອມມູນິດອິນດູຈີນ ແລະ ຕໍ່ມາພັກປະຊາຊົນປະຕິວັດລາວ ໄດ້ພ້ອມກັນຄຽງບ່າຄຽງໄຫຼ່ຮ່ວມຂຸມຄອງດຽວກັນ, ເສຍສະຫຼະ ໃຫ້ກັນ ແລະ ກັນ ເພື່ອເປົ້າໝາຍສຸດທ້າຍຄື ເອກະລາດແຫ່ງຊາດ ແລະ ອິດສະຫຼະພາບບໍ່ຍອມ ເປັນຂ້ອຍຂ້າ ຂອງພວກສັດຕູຜູ້ຮຸກຮານຕ່າງຊາດ.
ພວກເຮົາມີຄວາມເອກະອ້າງ ທີ່ມີສາຍສຳພັນສູ້ຮົບທີ່ແໜ້ນແກ່ນ, ການພົວພັນທີ່ເປັນມູນເຊື້ອຊຶ່ງຖືກສ້າງຂຶ້ນຈາກຢາດເລືອດ, ຢາດເຫື່ອຂອງປະຊາຊົນສອງຊາດ, ຈາກທະຫານລຸງໂຮ່, ຈາກທະຫານເເນວລາວຮັກຊາດ ເເລະ ຈາກນັກຮົບປະຕິວັດ ລາວ-ຫວຽດນາມ ບໍ່ຈັກວ່າເທົ່າໃດພັນຄົນ ທີ່ໄດ້ຕໍ່ສູ້ຢ່າງອົງອາດກ້າຫານ, ເພື່ອປົດປ່ອຍປະເທດຊາດຂອງຕົນຢ່າງບໍ່ຮູ້ອິດຮູ້ເມື່ອຍ, ທະຫານ ເເລະ ປະຊາຊົນສອງຊາດ ລາວ-ຫວຽດນາມ ໄດ້ໃຫ້ການຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນຢ່າງບໍລິສຸດພຸດຜ່ອງ ແບບເຂົ້າເມັດຫັກ ຜັກເສັ້ນແບ່ງ ຊຶ່ງການພົວພັນແບບພິເສດນີ້ ໄດ້ຮັບການສ້າງຕັ້ງຂຶ້ນໂດຍປະທານ ໂຮ່ ຈິມິນ ຜູ້ນຳທີ່ຍິ່ງໃຫຍ່, ປະທານ ໄກສອນ ພົມວິຫານ, ປະທານ ສຸພານຸວົງ ຜູ້ນຳທີ່ເຄົາລົບຮັກ ແລະ ໄດ້ຮັບການຖະນຸຖະໜອມ, ປົກປັກຮັກສາ ແລະ ເສີມຂະຫຍາຍ ໂດຍການນຳຮຸ່ນຕ່າງໆ, ບັນດານັກປະຕິວັດ ແລະ ປະຊາຊົນສອງຊາດ, ທີ່ໄດ້ຜ່ານການທົດສອບບົນແປວໄຟແຫ່ງສົງຄາມ, ຊຶ່ງປັດຈຸບັນໄດ້ກາຍເປັນມໍລະ ດົກລວມອັນລໍ້າຄ່າ, ເປັນກົດເກນ ແຫ່ງການຄົງຕົວ ແລະ ຂະຫຍາຍຕົວຂອງ 2 ຊາດ ແລະ ເປັນໜຶ່ງໃນບັນດາປັດໄຈຕັດສິນໄຊຊະນະຂອງການປະຕິວັດຂອງ 2 ປະເທດ ລາວ-ຫວຽດນາມ.
ໃນສະພາບການຂອງໂລກ ແລະ ພາກພື້ນ ພວມມີການຜັນແປໄປຢ່າງໄວວາ ແລະ ສະລັບສັບຊ້ອນ, ມີທັງເງື່ອນໄຂສະດວກ ແລະ ສິ່ງທ້າທາຍຫຼາຍປະການ ຕໍ່ການພັດທະນາປະເທດ. ແຕ່ສອງປະເທດພວກເຮົາຍັງສືບຕໍ່ປົກປັກຮັກສາ ແລະ ເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີເເບບພິເສດທີ່ເປັນມູນເຊື້ອ ແລະ ການຮ່ວມມືຍຸດທະສາດຮອບດ້ານ ເພື່ອພ້ອມກັນພັດທະນາປະເທດຊາດຂອງຕົນ ກ້າວຂຶ້ນຕາມທິດ ສັງຄົມນິຍົມຢ່າງໜັກແໜ້ນ ໂດຍຕະຫຼອດມາ.
ພວກເຮົາມີຄວາມພາກພູມໃຈ ທີ່ໃນຕະຫຼອດໄລຍະເກືອບ 70 ປີ ແຫ່ງການນຳພາ ຂອງພັກ ປະຊາ ຊົນປະຕິວັດລາວ, ເກືອບ 50 ແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ໃນເງື່ອນໄຂສັນຕິພາບ ແລະ ເກືອບ 40 ປີແຫ່ງການປະຕິບັດແນວທາງປ່ຽນແປງໃໝ່ຮອບດ້ານ ມີຫຼັກການຂອງພັກ ຊຶ່ງພວກເຮົາຍັງສາມາດຮັກສາໄດ້ຄວາມໝັ້ນຄົງທາງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ເສດຖະກິດ-ສັງຄົມມີການຂະຫຍາຍຕົວດີຂຶ້ນ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການຍົກສູງຂຶ້ນເປັນກ້າວໆມາ, ແຕ່ຢ່າງໃດກໍດີ, ພວກເຮົາກໍຍັງປະເຊີນກັບຄວາມຫຍຸ້ງຍາກທາງດ້ານເສດ ຖະກິດ-ການເງິນ-ເງິນຕາ, ອັນເນື່ອງຈາກໄດ້ຮັບຜົນກະທົບຈາກການເເຜ່ລະບາດຂອງພະຍາດໂຄວິດ-19 ໃນ 2-3 ປີທີ່ຜ່ານມາ, ຜົນກະທົບຈາກວິກິດການດ້ານເສດຖະກິດຂອງໂລກ ຕໍ່ການພັດທະນາຢູ່ພາຍໃນປະເທດ, ການພັດທະນາເສດຖະກິດຍັງມີຄວາມບອບບາງ ແລະ ອ່ອນນ້ອຍ, ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍລະບຽບກົດໝາຍຍັງບໍ່ທັນເຂັ້ມເເຂງ, ປະກົດຫຍໍ້ທໍ້ໃນສັງຄົມຍັງມີເເຜ່ຫຼາຍ, ແລະ ຍັງມີຫຼາຍບັນຫາທີ່ສັງຄົມຍັງມີຄວາມເປັນຫ່ວງ ແລະ ອື່ນໆ. ແຕ່ພາຍໃຕ້ການນຳພາຂອງພັກ ແລະ ດ້ວຍຄວາມສາມັກຄີເປັນປຶກເເຜ່ນຂອງປວງຊົນລາວທັງຊາດ, ດ້ວຍການຊີ້ນຳ, ຄຸ້ມຄອງ ແລະ ບໍລິຫານວຽກງານຂອງລັດຖະບານ ແລະ ອົງການປົກຄອງທ້ອງຖິ່ນແຕ່ລະຂັ້ນ ບົນຈິດໃຈບຸກທະລຸ ແລະ ດ້ວຍການສະໜັບສະໜູນ, ຊ່ວຍເຫຼືອ ແລະ ການຮ່ວມມືຈາກບັນດາປະເທດເພື່ອນມິດ ແລະ ອົງການຈັດຕັ້ງສາກົນ, ປະເທດພວກເຮົາສາມາດຜ່ານຜ່າໄດ້ຄວາມຫຍຸ້ງຍາກ ແລະ ການທົດສອບ ນາໆປະການ, ເພື່ອສືບຕໍ່ນຳເອົາ ປະເທດຊາດ ກ້າວຂຶ້ນຢ່າງໜັກແໜ້ນຕາມທິດສັງຄົມນິຍົມ.
ໃນພິທີສະເຫຼີມສະຫຼອງວັນໄຊຊະນະດຽນບຽນຝູ້ ຄົບຮອບ 70 ປີ ໃນປີນີ້, ເພື່ອສືບຕໍ່ມູນເຊື້ອພິລະອາດຫານຂອງນັກຮົບປະຕິວັດຂອງສອງຊາດ, ພວກເຮົາຕ້ອງ ໄດ້ເອົາໃຈໃສ່ບາງບັນຫາ ດັ່ງນີ້:
ໜຶ່ງ, ສືບຕໍ່ສຶກສາອົບຮົມການເມືອງ-ແນວຄິດໃຫ້ພະນັກງານ, ສະມາຊິກພັກ, ປະຊາຊົນບັນດາເຜົ່າໃຫ້ມີຄວາມເຊື່ອໝັ້ນຕໍ່ບາດກ້າວເດີນຂອງປະເທດຕາມທິດສັງຄົມນິຍົມ, ຕໍ່ການນຳພາທີ່ຖືກຕ້ອງຂອງພັກ, ການຄຸ້ມຄອງຂອງລັດ. ຄະນະພັກທຸກຂັ້ນ ຈົ່ງຖືເອົາການເຮັດວຽກການເມືອງ-ແນວຄິດ ເປັນສະໜາມຮົບໃນການຕໍ່ສູ້ປົກປ້ອງແນວທາງ, ແຜນນະໂຍບາຍຂອງພັກ-ລັດ ເພາະວ່າ “ວຽກງານການເມືອງ-ແນວຄິດ ເປັນໜ້າທີ່ສຳຄັນພື້ນຖານ, ເປັນວຽກກົກ, ເປັນວຽກທີ່ຕ້ອງເຮັດກ່ອນ, ເຮັດເປັນປະຈຳ ແລະ ສອດຫ້ອຍໄປໃນທຸກຂົງເຂດວຽກງານຂອງພັກ-ລັດ, ຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງສັງຄົມ, ເປັນປັດໃຈຮັບປະກັນທຸກໄຊຊະນະຂອງການປະຕິວັດ”, ທັງຕ້ອງໃຫ້ປະຊາຊົນ, ໂດຍສະເພາະ ໄວໜຸ່ມຮັບຮູ້ວ່າຍ້ອນມີການເສຍສະຫຼະທີ່ຍິ່ງໃຫຍ່ຂອງນັກຮົບປະຕິວັດຂອງສອງປະເທດໃນເມື່ອກ່ອນ, ພວກເຮົາຈຶ່ງມີສັນຕິພາບຄືວັນນີ້.
ສອງ, ຕັ້ງໜ້າປະກອບສ່ວນເຂົ້າໃນການສ້າງເສດຖະກິດເອກະລາດ, ເປັນເຈົ້າຕົນເອງ ດ້ວຍການຍົກສູງສະຕິຊາດ, ເສີມຂະຫຍາຍສະຕິປັນຍາ, ກຳລັງແຮງ ແລະ ຄວາມສາມາດແຂ່ງຂັນຂອງຄົນໃນຊາດ, ເພື່ອຂຸດຄົ້ນທ່າແຮງບົ່ມຊ້ອນດ້ານຊັບພະຍາກອນມະນຸດ, ຊັບພະຍາກອນທຳມະຊາດ, ທີ່ຕັ້ງພູມສັນຖານ, ວັດທະນະທຳ-ສັງຄົມ ຢ່າງມີການວາງແຜນ, ມີຍຸດທະສາດ ແລະ ຄຳນຶງເຖິງປະສິດທິພາບ, ປະສິດທິຜົນ ເພື່ອການພັດທະນາແບບຍືນຍົງ, ສ້າງຄວາມຢູ່ດີກິນດີໃຫ້ປະຊາຊົນພາຍໃນຊາດ, ເຮັດໃຫ້ປະເທດຊາດ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ແລະ ເສດ ຖະກິດ-ສັງຄົມ ມີການພັດທະນາ, ນຳເອົາປະເທດຊາດຫຼຸດພົ້ນອອກຈາກສະພາວະດ້ອຍພັດທະນາໃນຊຸມປີຕໍ່ໜ້າ.
ສາມ, ສືບຕໍ່ຮັກສາມູນເຊື້ອຄວາມສາມັກຄີເປັນປຶກແຜ່ນ, ຮັກສາມູນເຊື້ອການຕໍ່ສູ້ອົງອາດກ້າແກ່ນເດັດຂາດມີໄຊຂອງກອງທັບເຮົາ, ສືບຕໍ່ປົກປັກຮັກສາມູນເຊື້ອມິດຕະພາບທີ່ຍິ່ງໃຫຍ່, ຄວາມສາມັກຄີເເບບພິເສດທີ່ເປັນມູນເຊື້ອ ແລະ ການຮ່ວມມືຍຸດທະສາດຮອບດ້ານລາວ-ຫວຽດນາມ ທີ່ປະທານ ໂຮ່ຈິມີນ ຜູ້ນຳທີ່ຍິ່ງໃຫຍ່, ປະທານ ໄກສອນ ພົມວິການ, ປະທານ ສຸພານຸວົງ ທີ່ເຄົາລົບຮັກ ໄດ້ສ້າງຂຶ້ນ ແລະ ຖະນຸຖະໜອມ, ສືບທອດໂດຍການນຳຮຸ່ນຕ່າງໆ ໃຫ້ມີຄວາມໜັກເເໜ້ນ ແລະ ຈະເລີນງອກງາມຍິ່ງໆຂຶ້ນ.
ໃນສະພາບສາກົນ, ພາກພື້ນ ສືບຕໍ່ມີຄວາມສັບສົນ ຜັນແປຢ່າງສະຫຼັບຊັບຊ້ອນນີ້, ພວກເຮົາຈະຕ້ອງໄດ້ສືບຕໍ່ປະຕິບັດແນວທາງການຕ່າງປະເທດ: ສັນຕິພາບ, ເອກະລາດ, ມິດຕະພາບ, ການຮ່ວມມືຕາມຫຼາຍທິດ, ຫຼາຍຝ່າຍ, ຫຼາຍລະດັບ ຕ່າງຝ່າຍຕ່າງມີຜົນປະໂຫຍດ.
ສີ່, ເສີມຂະຫຍາຍຈິດໃຈປະຕິວັດ, ຈິດໃຈເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເດັດດ່ຽວຕີຖອຍສະພາບການເສື່ອມຖອຍດ້ານແນວຄິດການເມືອງ, ຄຸນສົມບັດ, ແບບແຜນການດຳ ລົງຊິວິດທີ່ບໍ່ປອດໃສຂອງພະນັກງານ, ສະມາຊິກພັກ ແລະ ໃນທົ່ວສັງຄົມ, ຕ້ານພະຍາດອາດຍາສິດ, ສໍ້ລາດບັງຫຼວງ ແລະ ປະກົດການຫຍໍ້ທໍ້ຕ່າງໆ.
ຫ້າ, ເສີມຂະຫຍາຍມູນເຊື້ອແຫ່ງໄຊຊະນະຂອງບັ້ນຮົບດຽນບຽນຝູ້ ເພື່ອເພີ່ມທະວີຄວາມສາມັກຄີພິເສດລະຫວ່າງສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດນາມ ໃຫ້ແໜ້ນແຟ້ນຍິ່ງຂຶ້ນ ເພື່ອຜົນປະໂຫຍດຂອງປະຊາຊົນສອງຊາດ, ສົມທົບກັບການເສຍສະຫຼະອັນໃຫຍ່ຫຼວງຂອງນັກປະຕິວັດຂອງ 2 ຊາດ, ສືບຕໍ່ສຶກສາອົບຮົມປະຊາຊົນ ແລະ ໄວໜຸ່ມຂອງ 2 ປະເທດໃຫ້ເຫັນໄດ້ຄວາມຮັບຜິດຊອບຂອງຕົນໃນການສືບຕໍ່ປົກປັກຮັກສາສາຍພົວພັນທີ່ຫາຍາກນີ້ໃຫ້ໝັ້ນຄົງທະນົງແກ່ນຕະຫຼອດໄປ.
ມື້ນີ້, ໃນໂອກາດສະເຫຼີມສະຫຼອງວັນແຫ່ງໄຊຊະນະບັ້ນຮົບດຽນບຽນຝູ້ ຄົບຮອບ 70 ປີ, ພວກເຮົາຍິ່ງຈົດຈຳຈາລຶກ ແລະ ຮູ້ບຸນຄຸນຢ່າງສຸດຊຶ້ງຕໍ່ການອຸທິດອັນໃຫຍ່ຫຼວງຂອງປະທານ ໂຮ່ ຈິມິນ ຜູ້ນຳທີ່ຍິ່ງໃຫຍ່, ປະທານ ໄກສອນ ພົມວິຫານ, ປະທານ ສຸພານຸວົງ ຜູ້ນໍາທີ່ແສນເຄົາລົບຮັກ ແລະ ນັກຮົບປະຕິວັດ ສາມຊາດອິນດູຈີນ ແກ່ປິຕິພູມທີ່ແສນຮັກ ແລະ ຫວງແຫນ ເພື່ອຄວາມເປັນເອກະລາດແຫ່ງຊາດ, ອິດສະຫຼະພາບ, ປະຊາທິປະໄຕ, ຄວາມສົມບູນພູນສຸກຂອງປະຊາຊົນລາວບັນດາເຜົ່າ ແລະ ຄວາມວັດທະນາຖາວອນຂອງຊາດລາວເຮົາ.
ຂ້າພະເຈົ້າ ຂໍຮຽກຮ້ອງມາຍັງທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວທັງຊາດ ຈົ່ງເສີມຂະຫຍາຍມິດຕະພາບທີ່ຍິ່ງໃຫຍ່, ຄວາມສາມັກຄີພິເສດທີ່ເປັນມູນເຊື້ອ ແລະ ການຮ່ວມມືຍຸດທະສາດຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ໃຫ້ນັບມື້ແໜ້ນແຟ້ນ, ມີປະສິດທິຜົນ ແລະ ມີຄຸນນະພາບສູງຂຶ້ນ, ພ້ອມກັນສືບທອດ ແລະ ເສີມຂະຫຍາຍມູນເຊື້ອອັນພິລະອາດຫານຂອງສາມຊາດອິນດູຈີນ, ມູນເຊື້ອຮ່ວມສຳພັນສູ້ຮົບລາວ-ຫວຽດນາມ-ກຳປູເຈຍ ອັນສະຫງ່າອົງອາດໃຫ້ໄດ້ຮັບໝາກຜົນສູງຂຶ້ນເລື້ອຍໆ.
ນະໂອກາດນີ້, ຂ້າພະເຈົ້າ ຂໍຕາງໜ້າໃຫ້ ພັກ-ລັດ ແລະ ປະຊາຊົນລາວບັນດາເຜົ່າ ຂໍສະແດງຄວາມຂອບໃຈ ແລະ ຮູ້ບຸນຄຸນ ຢ່າງສູງ ມາຍັງພັກ-ລັດ ແລະ ປະຊາຊົນຫວຽດນາມອ້າຍນ້ອງ ທີ່ຍາມໃດກໍໄດ້ໃຫ້ການສະໜັບສະໜູນ, ໃຫ້ການຊ່ວຍເຫຼືອອັນລໍ້າຄ່າ ຢ່າງທັນການ ແລະ ມີປະສິດທິຜົນ ຕໍ່ການປະຕິວັດຊາດ ປະຊາທິປະໄຕ ປະຊາຊົນ ໃມເມື່ອກ່ອນ ກໍຄືການປົກປັກຮັກສາ ແລະ ພັດທະນາປະເທດຊາດລາວ ໃນປັດຈຸບັນ.
ຂໍອວຍພອນໃຫ້ປະຊາຊົນຫວຽດນາມອ້າຍນ້ອງ, ພາຍໃຕ້ການນຳພາອັນຖືກຕ້ອງຂອງພັກກອມມູນິດຫວຽດນາມ ອັນມີສະຫາຍ ຫງຽວນຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ ເປັນຜູ້ນຳພາ ຈົ່ງສືບຕໍ່ຍາດໄດ້ຜົນສຳເລັດອັນໃຫຍ່ຫຼວງ ໃນພາລະກິດ ປົກປັກຮັກສາ ແລະ ສ້າງສາປະເທດຫວຽດນາມຕາມທິດປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸຕິທຳ ແລະ ສີວິໄລ.
ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດທີ່ເປັນມູນເຊື້ອ ແລະ ການຮ່ວມມືຍຸດທະສາດຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນສອງຊາດລາວ-ຫວຽດນາມ ຈົ່ງໝັ້ນຄົງທະນົງແກ່ນຕະຫຼອດກາລະນານ.