ສຳນັກຂ່າວ ຕ່າງປະເທດ ລາຍງານ ຈາກ ນະຄອນຫລວງ ພະນົມເປັນຂອງ ກຳປູເຈຍ ເມື່ອວັນທີ 3 ເມສາວ່າ: ວຸດທິສະພາ ກຳປູເຈຍ ມີມະຕິ ເປັນເອກະສັນ ໃນກອງປະຊຸມວ່າ ໄດ້ເລືອກທ່ານ ຮຸນເຊນ ອະດິດ ນາຍົກ ລັດຖະມົນຕີ ຊຶ່ງເປັນ ບິດາ ຂອງ ທ່ານ ຮຸນມາເນດ ນາຍົກລັດ ຖະມົນຕີ ຄົນປັດຈຸບັນ ໃຫ້ດຳລົງຕໍາແໜ່ງ ປະທານ ວຸດທິສະພາ.
ທ່ານ ຮຸນເຊນ ອາຍຸ 71 ປີ ໄດ້ສະແດງ ຄວາມຂອບໃຈ ຕໍ່ຄວາມໄວ້ວາງໃຈ ແລະ ຄວາມເຊື່ອໝັ້ນ ໃນການໃຫ້ດຳລົງ ຕໍາແໜ່ງ ດັ່ງກ່າວ ເຖິງວ່າ ເປັນຕໍາແໜ່ງ ພິທີການ ຫລາຍກວ່າ ທາງການເມືອງ ແຕ່ຖືວ່າ ມີສະຖານະ ຢູ່ອັນດັບສອງ. ກຳປູເຈຍ ໄດ້ຈັດການເລືອກຕັ້ງ ວຸດທິສະມາຊິກ ເມື່ອວັນທີ 25 ກຸມພາ ທີ່ຜ່ານມາ ປະກົດວ່າ ພັກປະຊາຊົນ ກຳປູເຈຍ (ຊີພີພີ) ໄດ້ຮັບການ ເລືອກຕັ້ງ 55 ຈາກ ທັງໝົດ 58 ບ່ອນນັ່ງ, ໂດຍໜຶ່ງໃນ ຜູ້ທີ່ໄດ້ຮັບການເລືອກຕັ້ງ ຄື ທ່ານ ຮຸນເຊນ ອະດິດ ນາຍົກ ລັດຖະມົນຕີ ຊຶ່ງ ປັດຈຸບັນ ຍັງດຳລົງຕໍາແໜ່ງ ເປັນຫົວໜ້າພັກ ຊີພີພີ.ສ່ວນອີກ 3 ທີ່ນັ່ງທີ່ເຫລືອ ເປັນຂອງພັກ ສັນທະ ກຳປູເຈຍ ຊຶ່ງເປັນພັກ ການເມືອງ ຂະໜາດນ້ອຍ . ໂດຍການເລືອກຕັ້ງ ສະມາຊິກ ວຸດທິສະພາ ຊຸດໃໝ່ 58 ບ່ອຍນັ່ງ ມາຈາກການອອກສຽງ ໂດຍສະມາຊິກ ສະພາ ຜູ້ແທນຕໍ່າ 125 ຄົນ ແລະ ສະມາຊິກ ສະພາລະດັບ ທ້ອງຖິ່ນ ຫລາຍກວ່າ 11.000 ຄົນ, ໃນຂະນະທີ່ ວຸດທິສະພາ ກຳປູເຈຍ ມີທັງໝົດ 62 ທີ່ນັ່ງ.
