Tuesday, April 23, 2024
Homeຂ່າວການເມືອງເອກອັກຄະລັດຖະທູດລາວປະຈຳ ສສ ຫວຽດນາມ ຢ້ຽມຂ່ຳນັບລັດຖະມົນຕີກະຊວງການຕ່າງປະເທດຫວຽດນາມ

ເອກອັກຄະລັດຖະທູດລາວປະຈຳ ສສ ຫວຽດນາມ ຢ້ຽມຂ່ຳນັບລັດຖະມົນຕີກະຊວງການຕ່າງປະເທດຫວຽດນາມ

ຕອນແລງວັນທີ 13 ກຸມພາ 2024 ທີ່ກະຊວງການຕ່າງປະເທດ ສສ ຫວຽດນາມ ນະຄອນຫຼວງຮ່າໂນ້ຍ, ສະຫາຍນາງຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມພ້ອມຄະນະ ໄດ້ເຂົ້າຢ້ຽມຂ່ຳນັບສະຫາຍບຸ່ຍແທັງເຊີນ, ກຳມະການສູນກາງພັກ, ລັດຖະມົນຕີກະຊວງການຕ່າງປະເທດແຫ່ງ ສສ ຫວຽດນາມ ໃນໂອກາດທີ່ສະຫາຍໄດ້ດໍາລົງຕໍາແໜ່ງເປັນເອກອັກຄະລັດຖະທູດລາວຄົນໃໝ່ປະຈໍາຫວຽດນາມ.

ສະຫາຍນາງຄຳເພົາເອີນທະວັນ ໄດ້ນຳເອົາຄຳຢື້ຢາມຖາມຂ່າວ ແລະຄຳອວຍພອນປີໃໝ່ອັນປະເສີດຈາກສະຫາຍສະເຫຼີມໄຊ ກົມມະສິດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ມາຍັງສະຫາຍບຸ່ຍແທັງເຊີນແລະຄະນະ. ພ້ອມດຽວກັນນີ້, ສະຫາຍທູດຍັງໄດ້ສະແດງຄວາມຂອບໃຈຕໍ່ການຕ້ອນຮັບອົບອຸ່ນ, ສະໜິດສະໜົມຂອງສະຫາຍບຸ່ຍແທັງເຊີນ ແລະສະແດງຄວາມຮູ້ສຶກປິຕິຍິນດີເປັນຢ່າງຍິ່ງຕໍ່ຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີXIIIຂອງພັກກອມມູນິດຫວຽດນາມໃນໄລຍະຜ່ານມາ ຊຶ່ງສາມາດນຳພາປະເທດຊາດພັດທະນາຮອບດ້ານຢ່າງວ່ອງໄວແລະກ້າວກະໂດດ, ເຮັດໃຫ້ເສດຖະກິດສືບຕໍ່ເຕີບໂຕ, ຊີວິດການເປັນຢູ່ຂອງປະຊາຊົນດີຂຶ້ນເຫັນໄດ້ຢ່າງຈະແຈ້ງ. ສຳລັບການພົວພັນກັບຕ່າງປະເທດ, ຫວຽດນາມໄດ້ປະຕິບັດນະໂຍບາຍຢ່າງຫ້າວຫັນເຂົ້າສູ່ລວງກວ້າງ ແລະເລິກເຊິ່ງ, ການນຳຂັ້ນສູງພັກ-ລັດໄດ້ໄປເຄື່ອນໄຫວຢ້ຽມຢາມ, ເຮັດວຽກຢູ່ຫຼາຍປະເທດ ແລະກໍໄດ້ຕ້ອນຮັບການມາຢ້ຽມຢາມ, ເຮັດວຽກຂອງຜູ້ນຳຫຼາຍປະເທດອັນໄດ້ສະແດງເຖິງຖານະບົດບາດ ແລະຊື່ສຽງຂອງຫວຽດນາມນັບມື້ນັບພົ້ນເດັ່ນໃນເວທີພາກພື້ນ ແລະສາກົນ.

ສຳລັບການພົວພັນຮ່ວມມືສອງຝ່າຍເວົ້າລວມ, ເວົ້າສະເພາະແມ່ນການຮ່ວມມືລະຫວ່າງສອງກະຊວງການຕ່າງປະເທດນັບມື້ນັບຂະຫຍາຍຕົວແລະເລິກເຊິ່ງໃນບັນດາກົນໄກຮ່ວມມືຂອງສອງຝ່າຍໃນແຕ່ລະຂັ້ນໄດ້ຮັບການຈັດຕັ້ງປະຕິບັດຢ່າງມີຜົນສຳເລັດອັນຈົບງາມ.ໃນກອງປະຊຸມລະຫວ່າງສອງກົມການເມືອງລາວ ແລະຫວຽດນາມ, ກອງປະຊຸມຄະນະກຳມະການຮ່ວມມືທະວິພາຄີລະຫວ່າງລັດຖະບານແຫ່ງ ສປປ ລາວ ແລະລັດຖະບານແຫ່ງສສຫວຽດນາມຄັ້ງທີ46, ການຢ້ຽມຢາມ ສສ ຫວຽດນາມຢ່າງເປັນທາງການຂອງນາຍົກລັດຖະມົນຕີ ແລະຂອງລັດຖະມົນຕີກະຊວງການຕ່າງປະເທດແຫ່ງ ສປປ ລາວ ທີ່ຜ່ານມາ, ການນຳທັງສອງປະເທດລ້ວນແຕ່ໄດ້ຕີລາຄາສູງຕໍ່ການຈັດຕັ້ງຜັນຂະຫຍາຍບັນດາແຜນການຮ່ວມມືໃນໄລຍະຜ່ານມາ ແລະສືບຕໍ່ຊຸກຍູ້ແຜນການເຄື່ອນໄຫວໃນຕໍ່ໜ້າ. ໃນໂອກາດນີ້, ສະຫາຍທູດຍັງໄດ້ຕາງໜ້າໃຫ້ພັກ, ລັດແລະປະຊາຊົນລາວບັນດາເຜົ່າສະແດງຄວາມຄວາມຮູ້ບຸນຄຸນແລະຂອບໃຈຢ່າງຈິງໃຈມາຍັງພັກ, ລັດແລະປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ສປປ ລາວ ໃນໄລຍະຜ່ານມາຊຶ່ງເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະປະຊາຊົນສອງຊາດ ລາວ-ຫວຽດນາມ ແລະ ຢືນຢັນວ່າຈະສືບຕໍ່ເປັນຂົວຕໍ່, ຮ່ວມມືກັບທຸກພາກສ່ວນຂອງທັງສອງຝ່າຍປະຕິບັດໜ້າທີ່ດັ່ງກ່າວນີ້ໃຫ້ນັບມື້ມີໝາກຜົນຍິ່ງໆຂຶ້ນ.

ສະຫາຍບຸ່ຍແທັງເຊີນໄດ້ສະແດງຄວາມຊົມເຊີຍສະຫາຍນາງຄຳເພົາ ເອີນທະວັນ ໄດ້ມາດຳລົງຕຳແໜ່ງເປັນເອກອັກຄະລັດຖະທູດລາວ ປະຈໍາ ສສ ຫວຽດນາມ ພຽງໄລຍະ4ເດືອນແຕ່ສະຫາຍກໍໄດ້ຫ້າວຫັນເຮັດສຳເລັດໜ້າທີ່ຫຼາຍພໍສົມຄວນເປັນຕົ້ນແມ່ນປະກອບສ່ວນເຂົ້າໃນການເຄື່ອນໄຫວຫຼາຍເຫດການສຳຄັນທີ່ພັກ ແລະລັດຖະບານສອງປະເທດຈັດຂຶ້ນຢູ່ຫວຽດນາມ ນອກຈາກນັ້ນຍັງໄດ້ເຄື່ອນໄຫວພົບປະ, ຢ້ຽມຢາມບັນດາແຂວງຕ່າງໆຂອງຫວຽດນາມ, ເຂົ້າຮ່ວມກອງປະຊຸມລະດັບສອງຝ່າຍ ແລະ ຫຼາຍຝ່າຍທີ່ຝ່າຍຫວຽດນາມຈັດຂຶ້ນຫຼາຍຄັ້ງ ຊຶ່ງເປັນການປະກອບສ່ວນສຳຄັນເຂົ້າໃນການເພີ່ມທະວີສາຍພົວພັນມິດຕະພາອັນພິເສດລະຫວ່າງສອງພັກ, ສອງລັດແລະປະຊາຊົນສອງຊາດລາວ-ຫວຽດນາມໃຫ້ນັບມື້ນັບງອກງາມຂຶ້ນໄປເລື້ອຍໆ. ຜ່ານມາ, ສອງກະຊວງການຕ່າງປະເທດໄດ້ເພີ່ມທະວີກົນໄກການຮ່ວມມືໃນຫຼາຍລະດັບ ເພື່ອຊ່ວຍເຫຼືອ, ສະໜັບສະໜູນເຊິ່ງກັນແລະກັນ. ຫວຽດນາມສະໜັບສະໜູນລາວໃນການເປັນປະທານອາຊຽນປີ2024. ສະຫາຍລັດຖະມົນຕີເຊື່ອໝັ້ນວ່າ, ສະຫາຍເອກອັກຄະລັດຖະທູດລາວຄົນໃໝ່ຈະສືບຕໍ່ເປັນຂົວຕໍ່ແລະປະຕິບັດໜ້າທີ່ການເມືອງທີ່ພັກແລະລັດຖະບານລາວມອບໝາຍໃຫ້ສຳເລັດອັນໃຫຍ່ຫຼວງກວ່າເກົ່າ.

ຂ່າວ-ພາບ: ສະຖານທູດລາວທີ່ຮ່າໂນ້ຍ.

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments