ໃນວັນທີ 11 ມີນາ 2024 ທີ່ສໍານັກງານນາຍົກລັດຖະມົນຕີ, ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ດິງ ຕຽນ ຢຸງ ກຳມະການກົມການເມືອງສູນກາງພັກ, ເລຂາຄະນະພັກນະຄອນຫລວງຮ່າໂນ້ຍ ພ້ອມດ້ວຍພັນລະຍາ ແລະ ຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ນະຄອນຫລວງວຽງຈັນ ໃນລະຫວ່າງວັນທີ 11-12 ມີນາ 2024 ນີ້.
ສະຫາຍ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ, ເຮັດວຽກຢູ່ ສປປ ລາວ ຂອງ ສະຫາຍ ດິງ ຕຽນ ຢຸງ ພ້ອມຄະນະໃນຄັ້ງນີ້ ແລະ ຊົມເຊີຍຕໍ່ການພົວພັນຮ່ວມມືລະຫວ່າງ ນະຄອນຫລວງວຽງຈັນ ແລະ ນະຄອນຫລວງຮ່າໂນ້ຍ ເຊິ່ງເປັນຂີດໝາຍສຳຄັນຕໍ່ການເສີມຂະຫຍາຍສາຍພົວພັນແບບພິເສດ, ທັງເປັນການຮັດແໜ້ນຄວາມສາມັກຄີ ຂອງສອງພັກ ສອງລັດ ກໍຄື ປະຊາຊົນ ຂອງສອງປະເທດ ລາວ-ຫວຽດນາມ, ຫວຽດນາມ-ລາວ ໃຫ້ໝັ້ນຄົງຂະໜົງແກ່ນຂຶ້ນເລື້ອຍໆ.
ໂອກາດດຽວກັນ, ສະຫາຍ ດິງ ຕຽນ ຢຸງ ກໍໄດ້ສະແດງຄວາມຂອບໃຈເປັນຢ່າງຍິ່ງຕໍ່ ສະຫາຍ ສອນໄຊ ສີພັນດອນ ທີ່ໃຫ້ການ ຕ້ອນຮັບດ້ວຍບັນຍາກາດອັນອົບອຸ່ນ, ພ້ອມນີ້, ສະຫາຍໄດ້ລາຍງານຈຸດປະສົງການມາຢ້ຽມຢາມ, ເຮັດວຽກ ຢູ່ ສປປ ລາວ ໃນຄັ້ງນີ້ ໃຫ້ສະຫາຍ ສອນໄຊ ສີພັນດອນ ໄດ້ຮັບຊາບຕື່ມອີກ.
ຂ່າວ ສົມຫວັງ
ພາບ ຂັນໄຊ
