ພິທີພົບປະນັກຂ່າວ ກ່ຽວກັບການກະກຽມຈັດກອງປະຊຸມໂຕະມົນ ປະຈໍາປີ 2023 ຈັດຂຶ້ນໃນວັນທີ 7 ກຸມພາ 2024 ຢູ່ກະຊວງແຜນການ ແລະ ການລົງທຶນ ມີທ່ານນາງ ພອນວັນ ອຸທະວົງ ຮອງລັດຖະ ມົນຕີ ກະຊວງແຜນການ ແລະ ການລົງທຶນ ທ່ານ ບັກໂຄເດັຍ ເບີຄານ໋ອຟ ຜູ້ປະສານງານອົງການສະຫະປະຊາຊາດ ປະຈໍາ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ ພອນວັນ ອຸທະວົງ ກ່າວວ່າ:ປັດຈຸບັນຂະບວນການໂຕະມົນທີ່ຈັດຕັ້ງປະຕິບັດຢູ່ ສປປ ລາວ ໄດ້ດໍາເນີນມາເປັນເວລາ 25 ປີເຕັມແລ້ວ ຜ່ານການຈັດຕັ້ງປະຕິບັດຕົວຈິງ ພວກເຮົາເຫັນໄດ້ເຖິງການມີສ່ວນຮ່ວມຢ່າງຫ້າວຫັນຂອງທຸກພາກສ່ວນ ກໍຄືບັນດາກະຊວງ ຂະແໜງການ ແລະ ອໍານາດການປົກຄອງຂັ້ນທ້ອງຖິ່ນ ຄູ່ຮ່ວມພັດທະນາ ແລະ ພາກສ່ວນອື່ນໆທີ່ກ່ຽວຂ້ອງ ພາຍໃຕ້ຄວາມຮັບຜິດຊອບສູງ ແລະ ເປັນເຈົ້າການຂອງລັດຖະບານ ແຫ່ງ ສປປ ລາວ ລວມທັງຄວາມພະຍາຍາມເຮັດໃຫ້ການປະສານງານທີ່ດີຂຶ້ນໃນທົ່ວປະເທດ.ຜ່ານການປັບປຸງຂອດການປະສານງານ ແລະ ຄວາມຮ່ວມມືຜ່ານມາ ເຫັນວ່າຂະບວນການໂຕະມົນ ໄດ້ຮັບໝາກຜົນເປັນຢ່າງດີໃນການປະກອບສ່ວນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ປັບປຸງຊີວິດການເປັນຢູ່ຂອງປະຊາຊົນລາວບັນດາເຜົ່າ ການລືບລ້າງຄວາມທຸກຍາກ ແລະ ຊຸກຍູ້ການພັດທະນາຊັບພະຍາກອນມະນຸດໃນໄລຍະຍາວ ຂອງ ສປປ ລາວ.
ສໍາລັບ 10 ໜ່ວຍງານຂະແໜງການ (SWGs) ທີ່ຢູ່ພາຍໃຕ້ຂະບວນການໂຕະມົນ ກໍເປັນປັດໄຈໜຶ່ງທີ່ສໍາຄັນ ທີ່ຊ່ວຍສ້າງຄວາມເຊື່ອໝັ້ນ ລະຫວ່າງ ລັດຖະບານ ແລະ ຄູ່ຮ່ວມພັດທະນາຂອງພວກເຮົາ ແລະ ຊຸກຍູ້ການພັດທະນາໃນຫຼາຍຂະແໜງການທີ່ສໍາຄັນ ປັດຈຸບັນ ບັນດາຄູ່ຮ່ວມພັດທະນາມີບົດບາດອັນສໍາຄັນ ໃນການສະໜັບສະໜູນການປຶກສາຫາລື ເພື່ອສ້າງແຜນພັດທະນາເສດຖະກິດ-ສັງຄົມແຫ່ງຊາດ ກໍຄືບູລິມະສິດຂອງຂະແໜງການ ແລະ ທ້ອງຖິ່ນ ໂດຍຜ່ານການເຂົ້າຮ່ວມໃນກອງປະຊຸມປຶກສາຫາລື ຂອງໜ່ວຍງານຂະແໜງການຕ່າງໆ.
ສໍາລັບກອງປະຊຸມໂຕະມົນ 2023 ນີ້ ຈະຈັດຂຶ້ນໃນວັນທີ 13 ກຸມພາ 2024 ຢູ່ຫໍປະຊຸມແຫ່ງຊາດ ເຊິ່ງລັດຖະບານ ແຫ່ງ ສປປ ລາວ ຈະເຊື້ອເຊີນຜູ້ແທນກອງປະຊຸມເຂົ້າຮ່ວມຫຼາຍກວ່າ 300 ທ່ານ ໃນນັ້ນ ລວມມີອົງການຈັດຕັ້ງຂອງລັດຖະບານ ກໍຄືກະຊວງຂະແໜງການ ແລະ 17 ແຂວງ ແລະ ນະຄອນຫຼວງ ບັນດາປະເທດຄູ່ຮ່ວມພັດທະນາ ອົງການຈັດຕັ້ງທາງສັງຄົມ ພາກເອກະຊົນ ແລະ ພາກ ສ່ວນອື່ນໆທີ່ກ່ຽວຂ້ອງ
