ງານວາງສະແດງຜະລິດຕະພັນທ່ອງທ່ຽວ ອາຊຽນ 2024 ພາຍໃຕ້ຫົວຂໍ້ “ການທ່ອງ ທ່ຽວທີ່ມີຄຸນນະພາບ ແລະ ຄວາມຮັບຜິດຊອບ ຍືນຍົງໃນອະນາຄົດຂອງອາຊຽນ” ຈັດຂຶ້ນຢ່າງເປັນທາງການໃນວັນທີ 24-27 ມັງກອນ 2024 ທີ່ສູນການຄ້າລາວໄອເຕັກ (ຕຶກເກົ່າ) ນະຄອນຫລວງວຽງຈັນ. ໂດຍມີ ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍຜູ້ຕ່າງໜ້າຈາກບັນດາປະເທດສະມາຊິກອາຊຽນ ເຂົ້າຮ່ວມ.
![](https://medialaos.net/wp-content/uploads/2024/01/421731156_816800537140921_5995527441611104262_n.jpg)
ງານວາງສະແດງຜະລິດຕະພັນ ທ່ອງທ່ຽງອາຊຽນ 2024 ຄັ້ງນີ້, ມີຮ້ານວາງສະແດງຜະລິດຕະພັນທ່ອງທ່ຽວ, ໂຮງແຮມ, ສາຍການບິນຂອງບັນດາປະເທດສະມາຊິກອາຊຽນ, ລວມທັງຜະລິດຕະພັນລາວ, ອາຫານ ແລະ ເຄື່ອງດື່ມ ຈຳນວນໜຶ່ງ ເຂົ້າຮ່ວມວາງສະແດງຫລາຍກວ່າ 100 ຮ້ານ. ໃນນັ້ນ, ຮ້ານວາງສະແດງຂອງ ສປປ ລາວ ມີຫລາຍກວ່າ 30 ຮ້ານ, ຄາດວ່າພາຍໃນງານຈະມີການຊື້-ຂາຍ ຫລາຍ ການທ່ອງທ່ຽວ ຂອງບັນດາປະເທດສະມາຊິກ ຫລາຍຂຶ້ນ.
ໂອກາດນີ້, ທ່ານ ນາງ ມະນີສາຄອນ ທຳມະວົງໄຊ ຮອງຫົວໜ້າກົມໂຄສະນາການທ່ອງທ່ຽວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ຮູ້ວ່າ: ການຈັດງານວາງສະແດງຄັ້ງນີ້, ເປັນການໂຄສະນາ, ກະຕຸກຊູກຍູ້ ການທ່ອງທ່ຽວພາຍໃນອາຊຽນໃຫ້ກັບມາມີບັນຍາກາດຄຶກຄື້ນ ທັງເປັນການເປີດໂອກາດໃຫ້ ຜູ້ບໍລິການດ້ານການທ່ອງທ່ຽວ, ບໍລິສັດທ່ອງທ່ຽວ, ໂຮງແຮມ ແລະ ສາຍການບິນ ໄດ້ພົບປະໂອ້ລົມ ແລະ ກ້າວໄປເຖິງການຊື້-ຂາຍ ລາຍການທ່ອງທ່ຽວຮ່ວມກັນ. ທັງນີ້, ກໍເພື່ອແນໃສ່ເຮັດໃຫ້ຕະຫລາດທ່ອງທ່ຽວອາຊຽນ ແລະ ພາກພື້ນສາກົນ ກັບຄືກຄື້ນ ພາຍຫລັງໄດ້ຮັບຜົນກະທົບຈາກການລະບາດຂອງພະຍາດໂຄວິດ-19.
ຂ່າວ: ກິດຕາ
ພາບ: ຂັນໄຊ